afta ḏ-ambra - A Phylactery for Rue (An Invocation of the Personified Herb)
Author: E. S. Drower
Source: Orientalia; Vol. 15 (1946), pp. 324-346
Published by: GBPress- Gregorian Biblical Press
Stable URL: http://www.jstor.org/stable/43073269
Unicode by: Ibrāhīm afiʿī (University of Tehrān)
ࡔࡀࡐࡕࡀ ࡖ ࡔࡀࡌࡁࡓࡀ
ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡅࡄࡀࡕࡀࡌࡕࡀ ࡅࡍࡀࡈࡀࡓࡕࡀ ࡓࡀࡁࡕࡉࡀ ࡖ ࡔࡓࡀࡓࡀ ࡍࡉࡄࡅࡉࡋࡉࡀ ࡋࡃࡉࡋࡉࡀ ࡐࡋࡀࡍ ࡁࡓ ࡐࡋࡀࡍࡉࡕࡀ ࡔࡄࡅࡒ ࡅࡈࡓࡅࡃ ࡅࡀࡍࡐࡉࡒ ࡅࡁࡀࡈࡉࡋ ࡌࡍ ࡐࡋࡀࡍ ࡁࡓ ࡐࡋࡀࡍࡉࡕࡀ ࡀࡍࡀࡕ ࡔࡀࡌࡁࡓࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡅࡌࡀࡅࡌࡉࡍࡀࡋࡀࡊ ࡁࡏࡉࡍ ࡅࡋࡔࡅࡌࡀ ࡓࡁࡀ ࡒࡀࡃࡌࡀࡉࡀ ࡀࡉࡀࡊ ࡄࡅ ࡁࡄࡀࡉࡋࡀࡊ ࡆࡓࡉࡉࡕ ࡅࡋࡀࡆࡉࡓࡉࡀࡊ ࡂࡉࡍࡀࡉࡀ ࡁࡂࡉࡍࡕࡇ ࡅࡋࡀࡐࡀࡓࡃࡉࡎࡐࡀࡍࡀ ࡏࡋ ࡒࡀࡁࡉࡋ ࡐࡀࡓࡃࡀࡎࡉࡀ ࡄࡀࡔࡕࡀ ࡀࡍࡀࡕ ࡔࡀࡌࡁࡓࡀ ࡁࡄࡀࡉࡋࡀࡊ ࡔࡀࡄࡒࡉࡋࡅࡍ ࡅࡁࡀࡈࡋࡉࡍࡅࡍ ࡉࡊࡅࡋࡄࡅࡍ ࡓࡅࡄࡉࡀ ࡆࡀࡃࡀࡍࡉࡀࡕࡀ ࡅࡏࡉࡍ ࡓࡅࡄࡀ ࡄࡏ ࡍࡉࡒࡅࡁࡕࡀ ࡌࡔࡀࡍࡉࡀࡋࡇ ࡋࡐࡋࡀࡍ ࡁࡓ ࡐࡋࡀࡍࡉࡕࡀ ࡁࡊࡅࡄࡓࡀࡍࡉࡀ ࡅࡒࡉࡓࡎࡉࡀ ࡅࡓࡉࡃࡉࡀ ࡅࡓࡅࡌࡀࡉࡉࡀ ࡀࡍࡀࡕ ࡔࡀࡌࡁࡓࡀ ࡅࡏࡉࡉࡋ ࡏࡉࡉࡋ (ࡊࡅࡄࡓࡀࡍࡉࡀ) ࡏࡆࡉࡋ ࡉࡕࡉࡕ ࡀࡉࡀࡊ ࡌࡉࡀ ࡖ ࡍࡀࡐࡒࡉࡀ ࡌࡍ ࡓࡉࡔࡀ ࡖ ࡈࡅࡓࡀ ࡓࡀࡌࡀ ࡕࡏࡉࡅࡋ ࡁࡈࡀࡁࡅࡕࡀ ࡏࡋ ࡐࡀࡂࡓࡀ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡅࡈࡓࡅࡃ ࡅࡀࡍࡐࡉࡒ ࡌࡉࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡔࡀࡕࡀ ࡅࡓࡅࡉࡕࡀ ࡕࡏࡉࡅࡋ ࡁࡈࡀࡁ ࡔࡀࡌࡉࡔ ࡅࡎࡉࡓࡀ ࡉࡃࡉࡋࡀࡊ ࡍࡉࡄࡅࡍ ࡌࡓࡀࡁࡉࡀࡍࡀ ࡌࡉࡀ ࡅࡍࡅࡓࡀ ࡏࡋࡀࡊ ࡌࡓࡀࡁࡉࡀࡍ ࡅࡆࡉࡒࡀ ࡅࡀࡉࡀࡓ ࡉࡃࡉࡋࡀࡊ ࡍࡀࡔࡉࡌ ࡌࡀࡅࡌࡉࡍࡀࡋࡀࡊ ࡁࡁࡉࡋ ࡅࡏࡍࡁࡅ ࡌࡀࡓࡉࡀ ࡀࡋࡀࡄࡉࡀ ࡅࡁࡍࡉࡓࡉࡂ ࡌࡀࡓࡉࡀ ࡄࡀࡉࡋࡀ ࡅࡆࡀࡉࡍࡀ ࡅࡕࡉࡊࡉࡓࡉࡍࡅࡍ ࡉࡄࡀࡍࡀࡕࡉࡍ ࡓࡅࡄࡉࡀ ࡁࡉࡔࡀࡕࡀ ࡅࡄࡅࡌࡓࡉࡀ ࡕࡀࡒࡉࡐࡀࡕࡀ ࡌࡉࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡀࡉࡀࡊ ࡁࡉࡓࡒࡀ ࡖ ࡌࡉࡔࡕࡀࡃࡀࡓ ࡅࡔࡀࡁࡉࡒ ࡉࡄࡀࡄࡅ ࡄࡉࡅࡉࡀ ࡁࡉࡔࡀ ࡅࡌࡀࡐࡉࡒࡋࡇ ࡌࡍ ࡄࡅࡄࡅ ࡁࡀࡉࡕࡀ ࡁࡄࡀࡉࡋࡇ ࡏࡔࡀࡉࡐࡀ ࡅࡀࡐ ࡀࡍࡀࡕ ࡁࡄࡀࡉࡋࡀࡊ ࡅࡁࡄࡀࡉࡀࡋ ࡄࡀࡋࡉࡍ ࡏࡅࡌࡀࡌࡀࡕࡀ ࡈࡓࡅࡃ ࡅࡀࡍࡐࡉࡒ ࡌࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡅࡔࡒࡅࡋ ࡉࡊࡅࡄࡓࡀࡍࡉࡀ ࡅࡓࡅࡄࡉࡀ ࡁࡉࡔࡀࡕࡀ ࡍࡉࡎࡁࡀࡊ ࡔࡅࡌࡀ ࡌࡉࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡀࡉࡀࡊ ࡍࡎࡀࡁࡕࡀࡊ ࡌࡀࡓࡀࡕ ࡀࡋࡀࡄࡉࡀ ࡅࡀࡍࡀࡔࡉࡀ ࡏࡔࡕࡀࡁࡀࡁࡀࡊ ࡋࡀࡋࡀࡄࡉࡀ ࡆࡉࡊࡓࡉࡀ ࡅࡋࡏࡎࡕࡉࡓࡀࡕࡀ ࡍࡅࡒࡁࡀࡕࡀ ࡅࡎࡉࡄࡃࡀࡕ ࡏࡋࡀࡊ ࡉࡈࡀࡁ ࡅࡔࡀࡃࡀࡓ ࡉࡊࡅࡋ ࡌࡀࡍ ࡊࡓࡉࡄࡉࡀ ࡅࡔࡀࡅࡉࡀ ࡀࡎࡅࡕࡀ ࡅࡀࡎࡅࡕࡀ ࡌࡀࡔࡊࡀࡁࡇ ࡄࡀࡔࡕࡀ ࡀࡎࡀࡓ ࡄࡀࡋࡑࡀࡊ ࡅࡒࡀࡁࡉࡋ ࡌࡉࡍࡀࡉ ࡄࡀࡋࡉࡍ ࡏࡅࡌࡀࡌࡀࡕࡀ ࡏࡅࡋ ࡁࡔࡋࡀࡌࡀ ࡁࡄࡀࡉࡋࡀࡊ ࡅࡐࡅࡒ ࡁࡄࡀࡃࡅࡕࡀ ࡉࡊࡅࡋࡌࡀࡍ ࡖ ࡔࡀࡕࡉࡋࡀࡊ ࡏࡅ ࡁࡄࡀࡌࡓࡀ ࡏࡅ ࡁࡔࡀࡊࡓࡀ ࡏࡅ ࡁࡌࡉࡀ ࡉࡁࡉࡋࡃࡁࡀࡁࡀࡊ ࡓࡅࡄࡉࡀ ࡏࡄࡅࡉࡀ ࡈࡓࡅࡃ ࡅࡀࡐࡉࡒ ࡅࡀࡒࡀࡓ ࡅࡑࡍࡀࡐ ࡅࡀࡔࡒࡅࡋ ࡊࡀࡓࡉࡅࡕࡀ ࡅࡀࡒࡕࡀ ࡌࡍ ࡐࡀࡂࡓࡀ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡅࡕࡉࡄࡅࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡅࡄࡀࡕࡀࡌࡕࡀ ࡅࡆࡀࡓࡀࡆࡕࡀ ࡅࡄࡀࡃࡅࡕࡀ ࡅࡋࡔࡀࡕࡉࡀ ࡄࡀࡃࡅࡕࡀ ࡋࡌࡀࡔࡒࡅࡉࡀࡍࡀ ࡀࡌࡓࡉࡕ ࡅࡎࡀࡄࡃࡉࡕ ࡅࡎࡀࡄࡃࡉࡕ (ࡒࡀࡄࡃࡉࡕ ?) ࡀࡎࡉࡀ ࡀࡎࡀࡉ ࡀࡎࡅࡕࡀࡊ ࡅࡕࡉࡌࡀࡓࡍࡉࡍ (ࡕࡉࡌࡀࡓࡋࡀࡍ ?) ࡌࡀࡓࡀࡕ ࡀࡋࡀࡄࡉࡀ ࡅࡀࡍࡀࡔࡉࡀ ࡁࡔࡅࡌࡇ ࡅࡁࡄࡀࡉࡋࡇ ࡖ ࡀࡎࡉࡀ ࡖ ࡌࡀࡎࡉࡀ ࡕࡉࡄࡅࡉࡋࡉࡀ ࡀࡎࡅࡕࡀ ࡖ ࡍࡀࡐࡔࡀ ࡓࡁࡀ ࡅࡋࡀࡆࡅࡈࡀ ࡅࡀࡎࡅࡕࡀ ࡕࡉࡄࡅࡉࡋࡉࡀ ࡋࡐࡋࡀࡍ ࡁࡓ ࡐࡋࡀࡍࡉࡕࡀ ࡅࡄࡉࡉࡀ ࡆࡀࡊࡏࡉࡍ ࡎࡀ
ࡀࡎࡅࡕࡀ ࡕࡉࡄࡅࡉࡋࡇ ࡋࡐࡋࡀࡍ ࡁࡓ ࡐࡋࡀࡍࡉࡕࡀ ࡐࡀࡎ ࡁࡓ ࡐࡀࡎ ࡀࡍࡀࡕ ࡊࡅࡓࡎࡉࡀࡊ ࡓࡀࡌࡀ ࡐࡀࡎ ࡁࡓ ࡐࡀࡎ ࡒࡀࡓࡉࡋࡉࡀ ࡕࡓࡉࡑ ࡔࡃࡉࡊࡉࡀ ࡅࡂࡀࡉࡀ ࡓࡃࡉࡀ ࡌࡊࡀࡍࡉࡋࡇ ࡃࡀࡅࡋࡀ ࡌࡃࡅࡋࡉࡀ ࡀࡍࡀ ࡖ ࡌࡄࡉࡉࡀ ࡌࡉࡕࡉࡀ ࡀࡍࡀ ࡔࡀࡌࡁࡓࡀ ࡔࡉࡁࡀࡁࡀ ࡈࡀࡁࡀ ࡌࡀࡋࡊࡀࡉࡄࡅࡍ ࡖ ࡊࡅࡋࡄࡅࡍ ࡎࡀࡌࡀࡍࡉࡀ ࡌࡀࡍ ࡀࡌࡀࡓࡋࡇ ࡉࡄࡉࡁࡉࡋ ࡆࡉࡅࡀ ࡅࡌࡀࡍ ࡂࡋࡀࡋࡇ ࡋࡐࡋࡀࡍ ࡁࡓ ࡐࡋࡀࡍࡉࡕࡀ ࡄࡀࡌࡀࡓࡀ ࡅࡎࡉࡌࡎࡉࡓࡀ ࡅࡓࡀࡌࡉࡍ ࡋࡌࡀࡃࡉࡒࡕࡀ ࡖ ࡄࡉࡍࡀ ࡅࡂࡋࡀࡋࡀ ࡅࡍࡅࡓࡀ ࡅࡌࡉࡀ ࡅࡓࡌࡉࡀ ࡌࡉࡍࡀࡉ ࡄࡉࡋࡉࡕࡀ ࡊࡀࡎࡉࡕࡀ ࡅࡌࡀࡓࡂࡀࡍࡉࡕࡀ ࡅࡍࡉࡃࡓࡇ ࡈࡀࡁࡀ ࡖ ࡋࡉࡀࡃ ࡏࡅࡌࡀࡍࡉࡀ ࡌࡉࡔࡕࡉࡀ ࡖ ࡔࡕࡉࡀ ࡖ ࡔࡉࡕࡉࡀࡊ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡕࡓࡅࡑ ࡒࡅࡌࡕࡇ ࡁࡀࡋࡁࡅࡔࡉࡀ ࡄࡆࡀࡉࡕࡇ ࡋࡀࡉࡍࡇ ࡅࡓࡅࡀࡆ ࡀࡍࡐࡇ ࡅࡀࡍࡐࡇ ࡔࡅࡌࡀࡒࡉࡀ ࡍࡉࡄࡅࡍ ࡅࡋࡉࡄࡅࡍ ࡅࡋࡉࡄࡅࡉࡀ ࡄࡀࡉࡋࡀ ࡅࡒࡓࡀ (ࡏࡒࡀࡓࡀ ?) ࡐࡀࡎࡉࡄࡉࡀࡕࡀ ࡖ ࡎࡅࡎࡉࡀ ࡖ ࡀࡆࡉࡋ ࡀࡒࡀࡌࡇ ࡅࡋࡀࡌࡀࡍࡃࡉࡁ ࡖ ࡀࡕࡉࡀ ࡌࡍ ࡀࡁࡀࡕࡓࡇ ࡅࡋࡀࡌࡀࡈࡉࡋࡇ ࡅࡌࡉࡍࡉࡋࡉࡀ ࡖ ࡐࡅࡌࡇ ࡍࡀࡐࡒࡀࡍ ࡅࡄࡀࡅࡉࡀࡍ ࡆࡀࡊࡅࡕࡀ ࡖ ࡍࡉࡔࡓࡉࡅࡊ ࡐࡋࡀࡍ ࡁࡓ ࡐࡋࡀࡍࡉࡕࡀ ࡕࡉࡄࡅࡉࡋࡇ ࡀࡓࡃࡉࡊࡋࡀ ࡋࡐࡋࡀࡍ ࡁࡓ ࡐࡋࡀࡍࡉࡕࡀ ࡅࡋ-ࡂࡅࡀࡓࡇ ࡍࡉࡐࡉࡓࡑࡇ ࡅࡍࡉࡐࡒࡅࡍ ࡌࡉࡍࡇ ࡄࡀࡓࡔࡉࡀ ࡁࡉࡔࡉࡀ ࡍࡎࡀࡃࡀࡍࡉࡀ ࡏࡐࡉࡊࡉࡀ ࡅࡃࡅࡁࡒࡉࡀ (ࡁࡅࡃࡒࡉࡀ ?) ࡅࡔࡀࡓࡅࡒࡉࡀ ࡌࡍ ࡊࡀࡁࡕࡀ ࡖ ࡔࡅࡓࡇ ࡅࡌࡍ ࡀࡌࡁࡅࡁࡉࡀ ࡖ ࡋࡉࡁࡇ ࡅࡌࡍ ࡀࡉࡍࡀࡍࡉࡀࡕࡀ ࡖ ࡁࡅࡓࡊࡉࡀ ࡅࡌࡍ ࡈࡅࡐࡓࡉࡀ ࡖ ࡏࡃࡉࡀ ࡅࡋࡉࡂࡓࡉࡀ ࡅࡌࡍ ࡂࡉࡍࡉࡀ ࡀࡌࡇ ࡅࡌࡍ ࡊࡉࡐࡇ ࡅࡋࡀࡋࡀࡌ ࡌࡉࡀ ࡖ ࡊࡀࡔࡓࡉࡍ ࡅࡌࡍ ࡍࡅࡓࡀ ࡐࡉࡔࡓࡀ ࡒࡀࡔࡉࡀ ࡄࡀࡓࡔࡉࡀ ࡀࡍࡀ ࡐࡋࡀࡍ ࡁࡓ ࡐࡋࡀࡍࡉࡉࡀ ࡖ ࡏࡌࡓࡉࡕ ࡏࡌࡓࡉࡕ ࡅࡃࡄࡉࡎࡁࡉࡕ ࡐࡅࡊࡓࡀࡉ ࡀࡃࡊࡉࡓࡉࡕ ࡏࡋࡀࡅࡀࡉࡄࡅࡍ ࡔࡀࡋࡉࡈࡉࡀ ࡐࡉࡈࡉࡀ ࡀࡓࡄࡅࡕ ࡄࡃࡀࡃࡉࡀ ࡀࡌࡈࡅࡍ ࡀࡌࡈࡅࡍ ࡉࡁࡀࡁࡀࡉࡊࡅࡍ ࡐࡕࡉࡀ ࡅࡃࡉࡁࡓࡀࡉࡊࡅࡍ ࡒࡀࡉࡉࡌ ࡏࡎࡉࡓࡉࡕࡅࡍ ࡄࡕࡉࡌࡉࡕࡅࡍ ࡁࡏࡎࡉࡒࡕࡀ ࡓࡁࡀ ࡅࡋࡀࡆࡅࡈࡀ ࡅࡁࡌࡀࡋࡀࡋࡀ ࡖ ࡓࡅࡓࡁࡉࡀ ࡖ ࡏࡎࡕࡉࡒࡀࡕࡉࡀ ࡋࡀࡌࡉࡕࡉࡁࡓࡀ ࡅࡄࡀࡁࡋࡇ ࡋࡀࡌࡉࡐࡎࡀࡒ ࡅࡄࡀࡕࡌࡇ ࡋࡀࡌࡉࡕࡁࡀࡓ ࡅࡌࡉࡍࡉࡋࡉࡀ ࡌࡓࡀࡅࡓࡁࡀࡍ ࡅࡀࡎࡅࡕࡀ ࡕࡉࡄࡅࡉࡋࡉࡀ ࡋࡐࡋࡀࡍ ࡁࡓ ࡐࡋࡀࡍࡉࡕࡀ ࡖ ࡔࡀࡕࡉࡀ ࡎࡀࡌࡀ ࡅࡄࡉࡉࡀ ࡆࡀࡊࡉࡍ ࡎࡀ
ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡀࡎࡅࡕࡀ ࡕࡉࡄࡅࡉࡋࡉࡀ ࡋࡐࡋࡀࡍ ࡁࡓ ࡐࡋࡀࡍࡉࡕࡀ ࡔࡋࡀࡌࡀ ࡏࡋࡀࡊ ࡏࡋࡀࡍ ࡈࡅࡁࡀ ࡀࡋࡀࡄࡀ ࡅࡈࡅࡓࡉࡀ ࡅࡁࡓ ࡌࡀࡓࡉࡀ ࡈࡅࡓࡉࡀ ࡓࡀࡌࡉࡀ ࡁࡓ ࡍࡀࡄࡋࡉࡀ ࡀࡌࡅࡒࡉࡀ ࡅࡁࡓ ࡐࡀࡒࡀࡕࡀ ࡌࡔࡀࡃࡊࡀࡕࡀ ࡔࡋࡀࡌࡀ ࡏࡋࡀࡊ ࡎࡀࡌࡀ ࡂࡀࡉࡀ ࡖ ࡌࡀࡄࡉࡋࡉࡀ ࡄࡀࡆࡉࡍ ࡅࡀࡌࡀࡓࡋࡇ ࡅࡔࡅࡌࡀ ࡔࡋࡀࡌࡀ ࡏࡋࡀࡊ ࡎࡀࡌࡀ ࡀࡎࡉࡀ ࡖ ࡌࡀࡎࡉࡀ ࡓࡅࡄࡉࡀ ࡅࡍࡉࡔࡌࡀࡕࡀ ࡖ ࡌࡉࡍࡇ ࡔࡉࡃࡉࡀ ࡆࡀࡄࡉࡍ ࡅࡓࡅࡄࡉࡀ ࡁࡉࡔࡀࡕࡀ ࡓࡀࡉࡕࡀ ࡅࡌࡉࡕࡐࡀࡓࡒࡀࡍ ࡔࡋࡀࡌࡀ ࡏࡋࡀࡊ ࡎࡀࡌࡀ ࡀࡎࡉࡀ ࡖ ࡌࡀࡎࡉࡀ ࡓࡅࡄࡉࡀ ࡅࡍࡉࡔࡌࡀࡕࡀ ࡀࡍࡀࡕ ࡄࡅ ࡔࡀࡌࡁࡓࡀ ࡂࡀࡉࡀ ࡖ ࡁࡄࡀࡉࡋࡀࡊ ࡈࡀࡓࡃࡉࡕ ࡅࡌࡀࡐࡒࡉࡕ ࡅࡌࡓࡀࡄࡒࡉࡕ ࡊࡅࡋࡄࡅࡍ ࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡀࡍࡀࡕ ࡄࡅ ࡔࡀࡌࡁࡓࡀ ࡂࡀࡉࡀ ࡖ ࡖ ࡔࡀࡉࡋࡉࡋࡀࡊ ࡅࡁࡀࡉࡉࡋࡀࡊ ࡀࡋࡀࡄࡉࡀ ࡆࡉࡊࡓࡉࡀ ࡅࡏࡎࡕࡉࡓࡀࡈࡀ ࡍࡅࡒࡁࡀࡕࡀ ࡋࡀࡎࡅࡕࡀࡊ ࡅࡃࡀࡓࡌࡀࡍࡀࡊ ࡖ ࡍࡀࡎࡉࡅࡊ ࡅࡏࡃࡅࡊ ࡅࡁࡉࡓࡉࡅࡊ ࡅࡀࡌࡀࡓࡋࡀࡊ ࡊࡅࡋ ࡖ ࡀࡁࡀࡃࡕ ࡔࡀࡓࡉࡓ ࡅࡏࡕࡉࡕ ࡅࡎࡀࡄࡃࡉࡕ ࡏࡋࡀࡊ ࡅࡀࡐ ࡀࡍࡀ ࡐࡋࡀࡍ ࡁࡓ ࡐࡋࡀࡍࡉࡕࡀ ࡀࡎࡉࡀ ࡔࡀࡉࡉࡋࡍࡀ ࡌࡉࡍࡀࡊ ࡅࡄࡀࡉࡋࡀ ࡅࡁࡀࡉࡉࡍࡀ ࡌࡉࡍࡀࡊ ࡀࡎࡅࡕࡀ ࡅࡃࡀࡓࡌࡀࡍࡀ ࡉࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡏࡅࡑࡈࡅࡍࡇ ࡅࡄࡉࡊࡋࡇ ࡅࡊࡅࡋࡇ ࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡖ ࡔࡀࡕࡉࡋࡀࡊ ࡏࡅ ࡁࡄࡀࡌࡓࡀ ࡏࡅ ࡁࡔࡀࡊࡓࡀ ࡏࡅ ࡁࡌࡉࡀ ࡏࡅ ࡁࡂࡅࡓࡌࡀࡉࡆࡀ ࡖ ࡕࡀࡅࡓࡀ ࡎࡅࡌࡀࡒࡀ ࡅࡀࡉࡋࡉࡕ ࡁࡊࡅࡋࡄࡅࡍ ࡄࡀࡍࡃࡀࡌࡉࡀ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡀࡍࡀࡕ ࡔࡀࡌࡁࡓࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡉࡊࡅࡋࡄࡅࡍ ࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡉࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡁࡓࡉࡔࡇ ࡅࡋࡀࡂࡈࡇ ࡅࡄࡉࡃࡓࡀ ࡖ ࡓࡉࡔࡀ ࡅࡋࡌࡉࡕࡒࡉࡓࡉࡀ ࡍࡀࡐࡒࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡄࡓࡀࡍࡉࡀ ࡌࡍ ࡐࡀࡂࡓࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡖ ࡔࡀࡕࡉࡋࡀࡊ ࡏࡉࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡉࡑࡉࡓࡉࡀ ࡅࡌࡉࡕࡒࡉࡓࡉࡀ ࡑࡀࡋࡀࡄࡉࡀࡕࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡏࡋ ࡀࡉࡍࡉࡀ ࡅࡌࡉࡕࡒࡉࡓࡉࡀ ࡀࡉࡍࡉࡀ ࡌࡄࡀࡔࡊࡀ ࡅࡀࡁࡃࡀ ࡊࡉࡁࡀ ࡅࡉࡀࡓࡒࡀࡍࡀ ࡁࡀࡉࡍࡉࡀ ࡅࡌࡉࡕࡒࡉࡓࡉࡀ ࡁࡉࡓࡅࡒࡕࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡉࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡋࡏࡅࡃࡍࡉࡀ ࡅࡌࡉࡕࡒࡉࡓࡉࡀ ࡅࡍࡉࡑࡋࡉࡀ ࡅࡌࡈࡀࡓࡔࡉࡀ ࡏࡅࡃࡍࡉࡀ ࡅࡌࡉࡕࡒࡉࡓࡉࡀ ࡈࡀࡌࡀࡉࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡂ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡉࡀ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡉࡍ ࡓࡅࡄࡀ ࡖ ࡉࡀࡕࡁࡀ ࡏࡋ ࡍࡄࡉࡓࡇ ࡅࡌࡉࡕࡒࡉࡓࡉࡀ ࡔࡀࡌࡁࡓࡀࡍࡉࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡉࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡋࡐࡅࡌࡇ ࡅࡌࡉࡕࡒࡉࡓࡉࡀ ࡂࡉࡃࡉࡀ ࡅࡐࡉࡒࡉࡀ ࡅࡌࡀࡄࡓࡉࡀ ࡅࡌࡎࡀࡓࡉࡀ ࡐࡅࡌࡇ ࡅࡋࡉࡔࡄࡀࡍࡇ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡉࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡉࡊࡀࡊࡉࡀ ࡅࡔࡉࡍࡉࡀ ࡅࡌࡉࡕࡒࡉࡓࡉࡀ ࡀࡎࡕࡀࡓࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡂ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡉࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡏࡋ ࡌࡁࡀࡋࡉࡀࡕࡀ ࡅࡂࡀࡍࡂࡀࡓࡉࡀࡕࡀ ࡅࡌࡉࡕࡒࡉࡓࡉࡀ ࡎࡀࡍࡅࡊࡉࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡉࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡋࡑࡀࡅࡓࡀ ࡅࡌࡉࡕࡒࡉࡓࡉࡀ ࡔࡀࡍࡂࡉࡓࡉࡀ ࡅࡔࡀࡍࡂࡓࡅࡍࡉࡀ ࡁࡀࡐࡒࡅࡕࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡂ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡏࡋ ࡊࡀࡃࡐࡉࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡂ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡁࡉࡕ ࡌࡀࡎࡉࡀ ࡅࡌࡉࡕࡒࡉࡓࡉࡀ ࡁࡂࡀࡍࡁࡀ ࡅࡎࡅࡐࡍࡀ ࡅࡊࡀࡃࡉࡀ ࡅࡁࡀࡁࡀࡓࡉࡀࡕࡀ ࡖ ࡁࡓࡉࡀ ࡅࡌࡉࡕࡒࡉࡓࡉࡀ ࡕࡅࡍࡁࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡋࡏࡃࡉࡀ ࡅࡌࡉࡕࡒࡉࡓࡉࡀ ࡌࡒࡀࡓࡒࡀࡎࡕࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡉࡐࡅࡌࡇ ࡖ ࡒࡅࡓࡒࡁࡀࡍࡀ ࡅࡌࡉࡀࡁࡔࡀ ࡅࡌࡊࡀࡌࡔࡀ ࡅࡌࡀࡊࡑࡉࡓࡀ ࡅࡌࡊࡀࡌࡑࡀ ࡐࡀࡓࡑࡅࡐࡉࡀ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡅࡄࡀࡔࡕࡀ ࡐࡀࡓࡑࡅࡐࡉࡀ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡍࡉࡓࡅࡀࡆ ࡀࡍࡐࡇ ࡍࡉࡐࡑࡅࡍࡅࡍ ࡅࡍࡉࡕࡐࡀࡑࡍࡅࡍ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡉࡀ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡏࡋ ࡋࡉࡁࡇ ࡅࡓࡀࡌࡉࡀ ࡓࡅࡒࡀࡕࡀ ࡅࡌࡀࡁࡀࡃࡉࡀ ࡁࡉࡔࡉࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡏࡋ ࡊࡀࡁࡃࡀ ࡅࡏࡋ ࡄࡀࡔࡀࡔࡀ ࡅࡏࡋ ࡈࡀࡄࡀࡋࡀ ࡅࡏࡋ ࡊࡅࡋࡉࡀࡕࡀ ࡅࡀࡁࡃࡀ ࡔࡀࡅࡋࡀ ࡅࡓࡅࡌࡀࡉࡉࡀ ࡁࡉࡔࡉࡀ ࡁࡄࡀࡓࡔࡉࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡉࡌࡉࡀ ࡅࡋࡊࡀࡓࡊࡀ ࡖ ࡌࡉࡀ ࡅࡌࡉࡕࡒࡉࡓࡉࡀ ࡌࡉࡓࡎࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡉࡄࡀࡋࡑࡀ ࡅࡂࡀࡑࡀ ࡁࡄࡀࡋࡑࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡉࡔࡅࡓࡀ ࡅࡌࡀࡓࡎࡀ ࡅࡊࡀࡐࡕࡀ ࡖ ࡔࡅࡓࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡉࡌࡀࡈࡀࡄࡉࡀࡕࡀ ࡅࡌࡉࡕࡒࡉࡓࡉࡀ ࡓࡉࡐࡎࡉࡀ (ࡓࡉࡐࡅࡄࡀ ? - ࡓࡉࡎࡅࡐ ?) ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡋࡌࡅࡒࡓࡀ ࡅࡌࡉࡕࡒࡉࡓࡉࡀ ࡎࡀࡄࡈࡀࡈࡀࡓࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡉࡄࡀࡍࡀ ࡅࡌࡉࡕࡒࡉࡓࡉࡀ ࡑࡉࡌࡉࡓࡕࡀ ࡅࡂࡀࡉࡁࡀ ࡒࡅࡌࡕࡇ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡏࡋ ࡍࡀࡐࡒࡀ ࡅࡌࡉࡕࡒࡉࡓࡉࡀ ࡎࡓࡅࡍࡂࡉࡀ ࡂࡀࡅࡀࡉࡉࡀ ࡁࡔࡅࡐࡓࡀ (ࡔࡅࡐࡋࡀ) ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡉࡄࡀࡋࡑࡇ ࡅࡃࡅࡐࡍࡇ ࡅࡌࡉࡕࡒࡉࡓࡉࡀ ࡓࡅࡌࡀࡉࡀ ࡁࡄࡀࡋࡑࡀ ࡅࡃࡅࡐࡍࡀ ࡅࡔࡉࡍࡂࡃࡅࡍࡉࡀ ࡁࡀࡈࡌࡀ ࡅࡓࡅࡌࡀࡉࡉࡀ ࡖ ࡁࡅࡓࡊࡉࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡉࡀ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡉࡁࡅࡓࡊࡉࡀ ࡅࡌࡉࡕࡒࡉࡓࡉࡀ ࡁࡅࡓࡊࡉࡍࡉࡀࡕࡀ ࡁࡁࡅࡓࡊࡉࡀ ࡅࡔࡀࡄࡀࡉࡕࡀ ࡁࡔࡀࡒࡉࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡉࡀ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡏࡋ ࡔࡀࡒࡉࡀ ࡅࡌࡉࡕࡒࡉࡓࡉࡀ ࡔࡉࡍࡂࡃࡅࡍࡉࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡏࡋ ࡋࡉࡂࡓࡇ ࡅࡌࡉࡕࡒࡉࡓࡉࡀ ࡐࡀࡓࡂࡀࡋࡕࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡏࡍ ࡓࡅࡄࡀ ࡄࡏ ࡖ ࡉࡀࡕࡁࡀ ࡉࡊࡅࡋࡇ ࡒࡀࡉࡍࡀ ࡖ ࡒࡅࡌࡕࡇ ࡖ ࡌࡉࡕࡒࡉࡓࡉࡀ ࡁࡐࡀࡂࡓࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡆࡉࡍ ࡄࡏ ࡓࡅࡄࡀ ࡁࡉࡔࡕࡀ ࡅࡊࡅࡋࡄࡅࡍ ࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡖ ࡔࡀࡕࡉࡋࡀࡊ ࡅࡄࡀࡔࡕࡀ ࡀࡍࡀࡕ ࡔࡀࡌࡁࡓࡀ ࡂࡀࡉࡀ ࡔࡀࡄࡒࡉࡍࡅࡍ ࡅࡁࡀࡈࡋࡉࡍࡅࡍ ࡉࡊࡅࡋࡄࡅࡍ ࡌࡀࡄࡓࡉࡀ ࡅࡋࡄࡀࡋࡉࡍ ࡓࡅࡄࡉࡀ ࡁࡉࡔࡀࡕࡀ ࡅࡄࡅࡌࡓࡉࡀ ࡆࡀࡃࡀࡍࡉࡀࡕࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡉࡀ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡖ ࡔࡀࡕࡉࡋࡀࡊ ࡅࡌࡔࡀࡍࡉࡋࡀࡊ ࡏࡅ ࡁࡋࡉࡋࡉࡀ ࡅࡏࡅࡌࡀࡍࡀ ࡏࡅ ࡁࡓࡉࡐࡎࡉࡀ ࡏࡅ ࡁࡒࡉࡓࡎࡉࡀ ࡅࡁࡊࡅࡄࡓࡀࡍࡉࡀ ࡅࡓࡉࡃࡉࡀ ࡅࡓࡅࡌࡀࡉࡉࡀ ࡅࡄࡀࡔࡕࡀ ࡀࡍࡀࡕ ࡔࡀࡌࡁࡓࡀ ࡂࡀࡉࡀ ࡌࡀࡅࡌࡉࡍࡀࡋࡀࡊ ࡅࡌࡔࡅࡁࡉࡍࡀࡋࡀࡊ ࡁࡏ ࡉࡍ ࡅࡏࡋ ࡔࡅࡌࡀ ࡓࡁࡀ ࡒࡀࡃࡌࡀࡉࡀ ࡀࡉࡀࡊ ࡀࡍࡀࡕ ࡁࡄࡀࡉࡋࡀࡊ ࡖ ࡍࡀࡐࡔࡀࡊࡇ ࡐࡓࡀࡃࡕ ࡅࡍࡐࡀࡒࡕ ࡅࡄࡀࡅࡉࡕ ࡋࡀࡆࡉࡓࡉࡀࡊ ࡂࡉࡍࡀࡉࡀ ࡁࡂࡉࡍࡕࡇ ࡅࡋࡀࡔࡉࡕࡋࡀࡊ ࡐࡀࡓࡃࡉࡎࡐࡀࡍࡀ ࡁࡐࡀࡓࡃࡉࡎࡐࡇ ࡖ ࡕࡉࡔࡄࡅࡒ ࡅࡕࡉࡈࡓࡅࡃ ࡅࡕࡉࡁࡈࡅࡋ ࡌࡍ ࡄࡀࡆࡉࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡊࡅࡋ ࡓࡅࡄࡉࡀ ࡅࡊࡅࡋ ࡓࡅࡄ ࡀࡍࡀࡍࡀࡉ ࡅࡊࡅࡋࡄࡉࡍ ࡒࡉࡓࡉࡀࡕࡇ ࡅࡊࡅࡋ ࡓࡅࡄ ࡏࡎࡕࡉࡓࡀ ࡅࡊࡅࡋࡄࡉࡍ ࡒࡉࡓࡉࡀࡕࡇ ࡅࡊࡅࡋ ࡓࡅࡄ ࡎࡉࡍ ࡅࡊࡅࡋࡄࡉࡍ ࡒࡉࡓࡉࡀࡕࡇ ࡅࡊࡅࡋ ࡓࡅࡄ ࡊࡉࡅࡀࡍ ࡅࡊࡅࡋࡄࡉࡍ ࡒࡉࡓࡉࡀࡕࡇ ࡅࡊࡅࡋ ࡓࡅࡄ ࡁࡉࡋ ࡅࡊࡅࡋࡄࡉࡍ ࡒࡉࡓࡉࡀࡕࡇ ࡅࡊࡅࡋ ࡓࡅࡄ ࡍࡉࡓࡉࡂ ࡅࡊࡅࡋࡄࡉࡍ ࡒࡉࡓࡉࡀࡕࡇ ࡅࡊࡅࡋ ࡓࡅࡄ ࡁࡓ ࡏࡍࡂࡀࡓࡉࡀ ࡅࡊࡅࡋࡄࡉࡍ ࡒࡉࡓࡉࡀࡕࡇ ࡅࡔࡀࡊࡁࡀ ࡏࡅࡉࡓࡀ ࡅࡀࡃࡅࡍࡀࡉ ࡅࡃࡀࡍࡉࡔ ࡅࡆࡀࡊࡉࡀ ࡁࡓࡎࡐࡅࡄࡓࡀ ࡅࡀࡋࡀࡄࡉࡀ ࡅࡐࡀࡕࡉࡊࡓࡉࡀ ࡆࡉࡊࡓࡉࡀ ࡅࡊࡅࡋࡄࡉࡍ ࡓࡅࡄࡉࡀ ࡁࡉࡔࡀࡕࡀ ࡆࡉࡊࡓࡉࡀ ࡅࡍࡅࡒࡁࡀࡕࡀ ࡖ ࡂࡀࡈࡋࡉࡀ ࡁࡍࡉࡀ ࡅࡌࡎࡀࡅࡈࡉࡀ ࡏࡅࡋࡉࡀ ࡁࡊࡓࡀࡎ ࡏࡌࡀࡉࡄࡅࡍ ࡅࡌࡔࡅࡈࡀ ࡏࡅࡋࡉࡀ ࡁࡊࡓࡀࡎ ࡏࡌࡀࡉࡄࡅࡍ ࡅࡍࡉࡃࡓࡉࡀ ࡅࡋࡅࡈࡀࡕࡀ ࡅࡀࡒࡓࡀࡉࡀࡕࡀ ࡖ ࡀࡋࡀࡄࡉࡀ ࡅࡀࡍࡀࡔࡉࡀ ࡀࡍࡀࡕ ࡎࡀࡌࡀ ࡁࡄࡀࡉࡋࡀࡊ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡄࡀࡋࡉࡍ ࡊࡅࡋࡄࡉࡍ ࡓࡅࡄࡉࡀ ࡁࡉࡔࡀࡕࡀ ࡅࡌࡀࡄࡓࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡁࡉࡔࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡕࡅࡌ ࡌࡀࡅࡌࡉࡍࡀࡋࡀࡊ ࡀࡍࡀࡕ ࡎࡀࡌࡀ ࡂࡀࡉࡀ ࡁࡀࡋࡀࡄࡉࡀ ࡆࡉࡊࡓࡉࡀ ࡅࡁࡏࡎࡕࡉࡓࡀࡉࡀ ࡍࡅࡒࡁࡀࡕࡀ ࡁࡁࡉࡋ ࡌࡀࡓࡉࡀ ࡀࡋࡀࡄࡉࡀ ࡅࡀࡍࡀࡔࡉࡀ ࡅࡁࡍࡉࡓࡉࡂ ࡌࡀࡓࡉࡀ ࡊࡀࡉࡋࡀ ࡅࡆࡀࡉࡍࡀ ࡅࡒࡓࡀࡁࡀ ࡅࡁࡏࡍࡁࡅ ࡌࡀࡓࡉࡀ ࡄࡉࡊࡅࡌࡕࡀ ࡅࡌࡀࡓࡉࡀ ࡐࡉࡄࡕࡀ ࡅࡍࡄࡀࡔࡀ ࡅࡔࡅࡓࡉࡀ ࡁࡔࡀࡌࡉࡔ ࡖ ࡏࡋࡀࡊ ࡍࡉࡃࡍࡉࡀ ࡅࡁࡎࡉࡓࡀ ࡖ ࡏࡋࡀࡊ ࡓࡀࡃࡉࡀ ࡅࡁࡆࡉࡒࡀ ࡅࡍࡅࡓࡀ ࡅࡌࡉࡀ ࡅࡁࡆࡉࡒࡀ ࡖ ࡀࡉࡀࡓ ࡈࡅࡓ ࡈࡅࡓࡀ ࡖ ࡄࡀࡅࡉࡋࡀࡊ ࡌࡓࡀࡁࡉࡀࡍࡀ ࡅࡁࡕࡅࡓࡉࡀ ࡖ ࡉࡀࡃࡋࡅࡊ ࡅࡁࡐࡀࡒࡀࡕࡀ ࡅࡁࡀࡓࡀࡌࡀࡕࡀ ࡖ ࡓࡀࡁࡉࡅࡊ ࡅࡁࡍࡀࡄࡋࡉࡀ ࡖ ࡁࡂࡀࡅࡀࡉࡄࡅࡍ ࡀࡔࡊࡉࡄࡉࡕ ࡅࡔࡉࡄࡉࡕ ࡖ ࡕࡉࡕࡉࡓࡀ ࡖ ࡌࡉࡑࡓࡀ ࡖ ࡕࡉࡑࡓࡀ ࡉࡄࡀࡆࡉࡍ ࡓࡅࡄࡀ ࡁࡉࡔࡕࡀ ࡌࡈࡀࡍࡀࡐࡕࡀ ࡆࡉࡊࡓࡉࡀ ࡅࡍࡅࡒࡁࡀࡕࡀ ࡔࡉࡃࡉࡀ ࡅࡄࡅࡌࡓࡉࡀ ࡅࡐࡀࡕࡉࡊࡓࡉࡀ ࡅࡋࡉࡋࡉࡀࡕࡀ ࡅࡕࡀࡒࡐࡀ ࡌࡍ ࡄࡀࡆࡉࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡌࡍ ࡄࡀࡄࡅ ࡁࡉࡓࡒࡀ ࡖ ࡌࡉࡔࡕࡀࡃࡀࡓ ࡏࡔࡉࡐࡇ ࡉࡄࡀࡄࡅ ࡄࡉࡅࡉࡀ ࡁࡉࡔࡀ ࡖ ࡌࡀࡐࡉࡒࡋࡇ ࡀࡍࡀࡕ ࡎࡀࡌࡀ ࡏࡆࡄࡀ ࡅࡏࡕࡀࡆࡄࡀ ࡁࡄࡀࡉࡋࡀࡊ ࡅࡒࡀࡁࡉࡋ ࡌࡉࡍࡀࡉ ࡄࡀࡋࡉࡍ ࡓࡀࡆࡉࡀ ࡅࡏࡅࡌࡀࡍࡀࡕࡀ ࡉࡄࡀࡆࡉࡍ ࡐࡀࡂࡓࡀ ࡅࡓࡅࡄࡀ ࡅࡍࡉࡔࡉࡌࡕࡀ ࡅࡄࡀࡍࡃࡀࡌࡉࡀ ࡅࡁࡉࡍࡉࡀࡍࡀ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡖ ࡔࡀࡕࡉࡋࡀࡊ ࡏࡅ ࡁࡋࡉࡋࡉࡀ ࡏࡅ ࡁࡏࡅࡌࡀࡍࡀ ࡏࡅࡋ ࡏࡆࡉࡋ ࡁࡐࡀࡂࡓࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡔࡄࡅࡒ ࡅࡈࡓࡅࡃ ࡅࡁࡀࡈࡉࡋ ࡌࡉࡍࡇ ࡎࡀࡍࡉࡀ ࡅࡊࡅࡋࡄࡅࡍ ࡁࡉࡋࡃࡁࡀࡁࡉࡀ ࡅࡔࡉࡃࡉࡀ ࡅࡎࡀࡄࡓࡉࡀ ࡅࡃࡀࡉࡅࡉࡀ ࡅࡐࡉࡒࡃࡉࡀ ࡅࡋࡀࡈࡀࡁࡉࡀ ࡅࡍࡀࡋࡉࡀ ࡅࡍࡉࡅࡋࡉࡀ ࡍࡓࡅࡄࡉࡀ ࡁࡉࡔࡀࡕࡀ ࡅࡄࡅࡌࡓࡉࡀ ࡅࡃࡌࡀࡅࡀࡕࡀ ࡎࡀࡉࡍࡀࡕࡀ ࡅࡈࡅࡋࡀࡍࡉࡀࡕࡀ ࡃࡀࡄࡀࡋࡀࡕࡀ ࡖ ࡄࡔࡅࡊࡀ ࡅࡄࡀࡓࡔࡉࡀ ࡁࡉࡔࡉࡀ ࡅࡌࡀࡁࡀࡃࡉࡀ ࡎࡀࡉࡍࡉࡀ ࡅࡐࡀࡕࡉࡊࡓࡉࡀ ࡆࡉࡊࡓࡉࡀ ࡀࡍࡀࡕ ࡎࡀࡌࡀ ࡄࡀࡉࡊࡉࡍ ࡏࡅࡋ ࡏࡆࡉࡋ ࡀࡉࡀࡊ ࡌࡉࡀ ࡖ ࡍࡀࡐࡒࡉࡀ ࡌࡍ ࡓࡉࡔࡀ ࡖ ࡈࡅࡓࡉࡀ ࡄࡀࡉࡊࡉࡍ ࡏࡅࡋ ࡏࡆࡉࡋ ࡏࡋ ࡊࡅࡄࡓࡀࡍࡉࡀ (ࡁࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ) ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡅࡁࡀࡈࡉࡋ ࡌࡍ ࡄࡀࡍࡃࡀࡌࡇ (ࡊࡅࡄࡓࡀࡍࡉࡀ) ࡁࡉࡔࡉࡀ ࡏࡅࡋ ࡁࡔࡀࡉࡀ ࡅࡐࡅࡒ ࡁࡔࡋࡀࡌࡀ ࡏࡅࡋ ࡁࡓࡀࡁࡅࡕࡀ ࡅࡐࡅࡒ ࡁࡄࡀࡃࡅࡕࡀ ࡅࡎࡀࡌࡀ ࡄࡀࡃࡅࡕࡀ ࡅࡀࡎࡅࡕࡀ ࡉࡔࡀࡕࡉࡀ ࡅࡀࡕࡓࡀࡍࡀ ࡋࡌࡀࡔࡒࡉࡀࡍࡀ ࡀࡍࡀࡕ ࡏࡌࡉࡓࡀ ࡅࡔࡀࡋࡌࡉࡕ ࡔࡋࡀࡌࡀ ࡋࡀࡁࡃࡀࡍࡀ ࡖ ࡕࡉࡌࡉࡓࡉࡍࡅࡍ ࡀࡎࡉࡀ ࡀࡎࡅࡕࡀ ࡀࡎࡀࡉࡕࡇ ࡅࡋࡀࡔࡕࡀࡋࡌࡀࡕ ࡕࡉࡔࡀࡋࡄࡉࡌࡉࡍ ࡖ ࡋࡉࡁࡀࡕ ࡌࡀࡓࡉࡀ ࡀࡋࡀࡄࡉࡀ ࡅࡀࡍࡀࡔࡉࡀ ࡋࡅࡀࡕ ࡐࡋࡀࡍ ࡁࡓ ࡐࡋࡀࡍࡉࡕࡀ ࡅࡀࡔࡅࡕࡀ ࡕࡉࡄࡅࡉࡋࡇ ࡋࡐࡋࡀࡍ ࡁࡓ ࡐࡋࡀࡍࡉࡕࡀ ࡁࡔࡅࡌࡀ ࡖ ࡌࡀࡍ ࡀࡎࡉࡀ ࡖ ࡌࡀࡎࡉࡀ ࡅࡄࡉࡉࡀ ࡆࡀࡊࡉࡍ ࡎࡀ
ࡌࡀࡎࡕࡀ ࡌࡀࡎࡕࡀࡉ ࡎࡀࡌࡀ ࡆࡀࡊࡀࡉࡀ ࡌࡀࡎࡀࡉ ࡆࡀࡊࡀࡉࡀ ࡌࡀࡎࡀࡉ ࡌࡀࡎࡀࡉ ࡌࡀࡎࡀࡉ ࡎࡀࡌࡀ ࡆࡀࡊࡀࡉࡀ ࡀࡅࡌࡉࡕࡀࡊ ࡀࡅࡌࡉࡕࡀࡊ ࡀࡅࡌࡉࡕࡀࡊ ࡁࡈࡅࡓࡉࡀ ࡖ ࡉࡀࡃࡉࡅࡊ ࡅࡁࡀࡓࡀࡌࡀࡕࡀ ࡖ ࡓࡀࡁࡉࡅࡊ ࡅࡁࡀࡉࡀࡓ ࡎࡕࡀࡍࡀ ࡖ ࡍࡀࡔࡉࡌ ࡏࡋࡀࡊ ࡅࡁࡋࡉࡁࡀࡕ ࡊࡅࡊࡁࡀ ࡍࡀࡄࡉࡓࡀ ࡖ ࡌࡀࡍࡄࡀࡓ ࡌࡍ ࡊࡅࡋࡄࡅࡍ ࡊࡅࡊࡁࡉࡀ ࡎࡓࡅࡂ ࡏࡅࡋ ࡁࡇ ࡁࡐࡀࡂࡓࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡊࡅࡋ ࡆࡉࡒࡀ ࡖ ࡌࡀࡔࡊࡀࡕࡋࡇ ࡍࡉࡒࡅࡐ ࡅࡀࡃࡉࡊ ࡅࡀࡒࡉࡐ ࡌࡉࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡓࡅࡄ ࡎࡀࡉࡀࡍࡕࡉࡀ ࡏࡅ ࡔࡀࡊࡀࡑࡕࡀ ࡏࡅ ࡄࡀࡏࡔࡉࡀ ࡏࡅ ࡏࡅࡁࡀࡃࡉࡀ ࡏࡅ ࡃࡀࡍࡉࡔ ࡏࡅ ࡄࡉࡋࡐࡀ ࡖ ࡄࡀࡋࡉࡐ ࡏࡅ ࡂࡀࡎࡀ ࡖ ࡂࡀࡉࡉࡎ ࡏࡅ ࡐࡉࡂࡀ ࡖ (ࡏࡅ) ࡐࡀࡋࡂࡀ ࡏࡅ ࡄࡅࡌࡀࡓࡕࡀ ࡁࡔࡅࡌࡀ ࡖ ࡂࡀࡁࡓࡏࡉࡉࡋ ࡌࡀࡋࡀࡊࡀ ࡅࡁࡔࡅࡌࡀ ࡖ ࡒࡀࡃࡅࡔࡀࡍ ࡌࡀࡋࡀࡊࡀ ࡅࡁࡔࡅࡌࡀ ࡖ ࡊࡀࡓࡊࡅࡍ ࡌࡀࡋࡀࡊࡀ ࡖ ࡊࡀࡓࡉࡊ ࡎࡀࡄࡓࡉࡀ ࡅࡃࡀࡉࡅࡉࡀ ࡅࡔࡉࡃࡉࡀ ࡅࡓࡅࡄࡉࡀ ࡅࡄࡅࡌࡓࡉࡀ ࡅࡋࡉࡋࡉࡀࡕࡀ ࡅࡏࡊࡅࡓࡉࡀ ࡅࡐࡓࡉࡊࡉࡀ ࡅࡐࡀࡕࡉࡊࡓࡉࡀ ࡅࡍࡉࡌࡅࡎࡉࡀ ࡀࡍࡀࡕࡅࡍ ࡌࡋࡀࡊࡉࡀ ࡖ ࡀࡐࡔࡉࡓࡅࡉࡀ ࡅࡀࡐࡒࡅࡉࡀ ࡌࡍ ࡐࡀࡂࡓࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡅࡀࡎࡅࡕࡀ ࡕࡉࡄࡅࡉࡋࡇ ࡋࡐࡋࡀࡍ ࡁࡓ ࡐࡋࡀࡍࡉࡕࡀ ࡅࡄࡉࡉࡀ ࡆࡀࡊࡉࡍ ࡎࡀ
ࡀࡎࡅࡕࡀ ࡕࡉࡄࡅࡉࡋࡇ ࡋࡐࡋࡀࡍ ࡁࡓ ࡐࡋࡀࡍࡉࡕࡀ ࡔࡀࡌࡁࡓࡀ ࡀࡍࡀࡕ ࡁࡓ ࡔࡀࡌࡁࡓࡀ ࡖ ࡌࡍ ࡁࡀࡆࡉࡓࡀ ࡖ ࡔࡀࡌࡁࡓࡀ ࡄࡅࡉࡕ ࡅࡌࡍ ࡊࡀࡍࡀ ࡓࡁࡀ ࡖ ࡀࡎࡀࡅࡀࡕࡀ ࡅࡔࡀࡓࡉࡀ ࡏࡎࡉࡓࡉࡀ ࡅࡒࡉࡓࡎࡉࡀ ࡖ ࡏࡎࡉࡓࡉࡀ ࡅࡌࡃࡀࡊࡉࡕ ࡏࡍࡔࡉࡀ ࡖ ࡌࡈࡀࡍࡐࡀࡍ ࡅࡌࡀࡎࡉࡀ ࡊࡀࡓࡉࡄࡉࡀ ࡀࡍࡀࡕ ࡐࡉࡔࡓࡀ ࡋࡀࡍࡀࡔࡉࡀ ࡉࡀࡄࡁࡉࡕ ࡅࡄࡀࡉࡋࡀ ࡉࡊࡅࡋࡄࡅࡍ ࡏࡋࡉࡌࡀࡍࡉࡀ ࡅࡉࡀࡍࡒࡉࡀ ࡅࡑࡉࡄࡌࡀ ࡅࡏࡒࡀࡓࡀ ࡉࡎࡀࡁࡓࡉࡀ ࡋࡎࡀࡁࡉࡀ ࡅࡓࡂࡀࡂࡕࡀ ࡉࡊࡅࡋࡄࡅࡍ ࡓࡅࡄࡉࡀ ࡔࡀࡒࡋࡉࡕ ࡅࡕࡉࡅࡋࡁࡇ ࡅࡓࡅࡌࡀࡉࡉࡀ ࡅࡓࡉࡐࡎࡉࡀ ࡀࡍࡀࡕ ࡔࡀࡒࡋࡉࡕ ࡅࡄࡀࡓࡔࡉࡀ ࡅࡌࡃࡀࡊࡉࡕ ࡏࡅࡁࡀࡃࡉࡀ ࡌࡍ ࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡊࡅࡋ ࡎࡀࡄࡓࡉࡀ ࡅࡎࡀࡈࡀࡍࡉࡀ ࡅࡎࡀࡓࡍࡁࡅ ࡅࡐࡀࡋࡂࡀ ࡅࡁࡓ ࡏࡍࡂࡀࡓࡉࡀ ࡖ ࡌࡔࡀࡌࡔࡉࡀ ࡁࡐࡀࡂࡓࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡅࡀࡎࡅࡕࡀ ࡅࡆࡀࡊࡅࡕࡀ ࡅࡄࡀࡉࡋࡀ ࡅࡔࡓࡀࡓࡀ ࡅࡏࡌࡓࡀ ࡅࡔࡉࡌࡀ ࡅࡄࡀࡕࡀࡌࡕࡀ ࡅࡆࡀࡓࡀࡆࡕࡀ ࡅࡍࡀࡈࡀࡓࡕࡀ ࡖ ࡔࡀࡓࡀࡓࡀ ࡍࡉࡄࡅࡉࡋࡇ ࡉࡐࡀࡂࡓࡇ ࡅࡓࡅࡄࡇ ࡅࡍࡉࡔࡉࡌࡕࡇ ࡅࡄࡀࡍࡃࡀࡌࡇ ࡅࡏࡅࡑࡈࡅࡍࡇ ࡅࡄࡉࡊࡋࡇ ࡅࡊࡅࡋࡇ ࡁࡉࡍࡉࡀࡍࡇ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡁࡔࡅࡌࡀ ࡖ ࡌࡀࡍ ࡀࡎࡉࡀ ࡖ ࡌࡀࡎࡉࡀ ࡅࡄࡉࡉࡀ ࡆࡀࡊࡉࡍ ࡎࡀ
ࡓࡀࡆࡀࡉࡄࡅࡍ ࡖ ࡄࡀࡍࡉࡍ ࡆࡀࡌࡀࡍࡀࡕࡀ ࡖ ࡔࡀࡌࡁࡓࡀ ࡒࡓࡉࡀ ࡔࡅࡁࡀ ࡆࡉࡁࡍࡉࡀ ࡊࡅࡋ ࡉࡅࡌࡀ ࡔࡅࡁࡀ ࡈࡅࡐࡎࡉࡀ ࡅࡓࡌࡉࡀ ࡁࡄࡀࡌࡓࡀ ࡏࡅ ࡁࡂࡅࡌࡉࡆࡀ ࡖ ࡕࡀࡅࡓࡀ ࡎࡅࡌࡀࡒࡀ ࡏࡅ ࡁࡌࡉࡀ ࡅࡒࡓࡉࡀ ࡔࡅࡁࡀ ࡆࡉࡁࡍࡉࡀ ࡀࡁࡀࡕࡀࡓ ࡄࡃࡀࡃࡉࡀ ࡅࡀࡔࡒࡉࡇ ࡉࡓࡅࡄࡀ ࡅࡋࡌࡀࡁࡀࡃࡉࡀ ࡅࡔࡀࡓࡉࡓ ࡅࡌࡍࡀࡎࡀࡉ ࡄࡀࡆࡉࡍ ࡓࡀࡆࡀ ࡖ ࡀࡐࡑࡀ ࡁࡓ ࡀࡐࡑࡀ ࡄࡀࡆࡉࡍ ࡐࡅࡂࡃࡀࡌࡀ ࡖ ࡔࡀࡌࡁࡓࡀ ࡉࡆࡀࡌࡅࡍࡉࡀ ࡅࡋࡊࡅࡋࡌࡀࡍ ࡖ ࡌࡀࡔࡒࡉࡀࡕࡋࡇ ࡖ ࡌࡑࡉࡀ ࡄࡀࡉࡋࡇ ࡕࡋࡀࡕࡀ ࡆࡉࡁࡍࡉࡀ ࡖ ࡌࡑࡉࡀ ࡄࡀࡉࡋࡇ ࡕࡓࡉࡍ ࡈࡅࡐࡓࡉࡀ ࡅࡖ ࡈࡅࡐࡓࡉࡀ ࡏࡅ ࡄࡃࡀ ࡈࡅࡐࡓࡀ ࡌࡀࡔࡒࡉࡀࡕࡋࡇ ࡄࡀࡆࡉࡍ ࡐࡅࡂࡃࡀࡌࡀ ࡒࡓࡉࡀ ࡏࡋࡇ ࡅࡀࡔࡒࡉࡇ ࡋࡎࡅࡌࡒࡀ ࡁࡄࡀࡌࡓࡀ ࡅࡋࡓࡅࡄ ࡅࡄࡀࡓࡔࡉࡀ ࡅࡋࡏࡅࡁࡀࡃࡉࡀ ࡅࡋࡄࡀࡉࡋࡇ ࡁࡔࡀࡊࡓࡀ ࡅࡋࡎࡅࡁࡀ ࡅࡋࡓࡅࡄ ࡐࡀࡋࡂࡀ ࡁࡌࡉࡀ ࡒࡀࡓࡉࡓࡉࡀ (ࡒࡓࡉࡀ) ࡓࡀࡆࡀ ࡖ ࡄࡀࡆࡉࡍ ࡆࡀࡌࡀࡍࡕࡀ ࡔࡀࡌࡁࡓࡀ ࡁࡓ ࡈࡅࡓࡉࡀ ࡖ ࡋࡀࡔࡀࡌࡉࡋࡇ ࡒࡀࡋࡀ ࡖ ࡕࡀࡓࡍࡀࡅࡋࡀ ࡅࡋࡒࡀࡉࡋࡀ ࡖ ࡓࡅࡄࡀ ࡁࡌࡉࡀ ࡅࡒࡓࡉࡍࡅࡍ ࡉࡄࡀࡋࡉࡍ ࡐࡅࡂࡃࡀࡌࡉࡀ ࡖ ࡔࡀࡌࡁࡓࡀ ࡅࡀࡔࡒࡉࡇ ࡉࡌࡀࡍ ࡖ ࡓࡅࡄࡀ ࡉࡂࡉࡈࡋࡇ ࡔࡅࡁࡀ ࡉࡅࡌࡉࡀ ࡅࡊࡅࡋ ࡉࡅࡌࡀ ࡔࡅࡁࡀ ࡈࡅࡐࡓࡉࡀ ࡓࡌࡉࡀ ࡁࡔࡀࡊࡓࡀ ࡏࡅ ࡁࡌࡉࡀ ࡅࡀࡔࡒࡉࡀ ࡌࡍ ࡕࡋࡀࡕࡀ ࡔࡉࡕࡀ ࡒࡀࡃࡌࡀࡉࡕࡀ ࡅࡆࡀࡊࡀࡓࡋࡇ ࡌࡍ ࡆࡅࡐࡓࡀ ࡖ ࡂࡀࡁࡓࡀ ࡀࡁࡀࡃࡋࡇ ࡋࡅࡀࡕ ࡆࡀࡅࡇ ࡅࡏࡍࡕࡀ ࡋࡅࡀࡕ ࡂࡀࡁࡓࡇ ࡖ ࡀࡁࡉࡃࡋࡇ ࡋࡀࡕࡉࡒࡓࡉࡁ ࡅࡋࡅࡀࡕ ࡄࡃࡀࡃࡉࡀ ࡋࡀࡍࡉࡒࡉࡓࡁࡅࡍ
ࡕࡅࡌ ࡓࡀࡆࡀ ࡖ ࡄࡀࡆࡉࡍ ࡐࡅࡂࡃࡀࡌࡀ ࡖ ࡔࡀࡌࡁࡓࡀ ࡕࡀࡎࡕࡉࡓࡉࡅࡍ ࡖ ࡌࡉࡕࡉࡒࡓࡉࡀ ࡏࡔࡊࡉࡀ ࡖ ࡂࡉࡃࡓࡉࡀ ࡅࡒࡓࡉࡀ ࡏࡋࡀࡅࡀࡉࡄࡅࡍ ࡅࡀࡔࡒࡇ ࡖ (ࡏࡋ?) ࡏࡍࡕࡀ ࡖ ࡁࡀࡉࡉࡀ ࡉࡌࡉࡐࡀࡊ (ࡋࡌࡉࡐࡀࡒ ?) ࡅࡃࡁࡀࡉࡋࡉࡋࡇ ࡁࡍࡉࡀ ࡔࡀࡓࡉࡓ ࡎࡀ
ࡄࡀࡆࡉࡍ ࡔࡀࡐࡕࡀ ࡅࡌࡉࡍࡉࡀࡍࡀ ࡖ ࡔࡀࡁࡓࡀ ࡖ ࡀࡍࡎࡉࡕ ࡀࡍࡀ ࡀࡍࡉࡀ ࡅࡃࡀࡍࡉࡀ.
درباره این سایت