apta pugdama ḏ-Mia
Source: apta pugdama D-mia based upon the only known surviving copy, DC 51. Copied in Margab, Suq es-uyukh, in 1277 AH (60-1 CE) by Ram Zihrun, son of Sam Bihram, Kupaia. Prepared by M. Morgenstern.
Published by: CAL project
Stable URL: http://cal.huc.edu/get_a_chapter.php?file=74703&cset=H
Unicode by: Ibrāhīm afiʿī (University of Tehrān)
ࡔࡀࡐࡕࡀ ࡐࡅࡂࡃࡀࡌࡀ ࡖࡌࡉࡀ
ࡌࡀࡓࡀࡉ
ࡌࡔࡀࡁࡀ
ࡊࡅࡔࡈࡀ ࡀࡎࡉࡍࡊࡅࡍ
ࡀ ࡁ ࡂ ࡃ ࡄ ࡅ ࡆ ࡇ ࡈ ࡉ ࡊ ࡋ ࡌ ࡍ ࡎ ࡏ ࡐ ࡑ ࡒ ࡓ ࡔ ࡕ ࡖ ࡀ ࡖ ࡀ ࡖ ࡀ
ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡒࡀࡃࡌࡀࡉࡉࡀ ࡍࡅࡊࡓࡀࡉࡉࡀ ࡌࡍ ࡀࡋࡌࡉࡀ ࡖࡍࡄࡅࡓࡀ ࡉࡀࡕࡉࡓࡉࡀ ࡊࡅࡋࡄࡅࡍ ࡏࡅࡁࡀࡃࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡄࡀࡉࡀࡋࡀ ࡔࡓࡀࡓࡀ ࡏࡌࡀࡓ ࡅࡔࡀࡌࡀ ࡄࡀࡃࡅࡀࡕ ࡋࡀࡁࡇ ࡔࡀࡅࡀࡒ ࡄࡀࡈࡀࡉࡉࡀ ࡍࡉࡄࡅࡉࡋࡉࡀ ࡋࡃࡉࡋࡇ ࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡀࡄ࡙ࡀ ࡌࡍ ࡄࡉࡉࡀ ࡅࡌࡍ ࡌࡀࡍࡃࡀ ࡀࡎࡉࡀ ࡌࡀࡓࡀࡉࡄࡅࡍ ࡖࡀࡎࡀࡅࡀࡕࡀ ࡅࡌࡍ ࡔࡊࡉࡍࡀࡕࡅࡍ ࡖࡄࡉࡉࡀ ࡒࡀࡃࡌࡀࡉࡉࡀ ࡀࡕࡉࡕ ࡌࡍ ࡀࡕࡓࡀ ࡓࡁࡀ ࡖࡍࡄࡅࡓࡀ ࡅࡏࡋ ࡔࡅࡌࡀࡊ ࡔࡅࡌࡀ ࡓࡁࡀ ࡊࡀࡁࡉࡓࡀ ࡖࡋࡀࡁࡀࡈࡉࡋ ࡆࡉࡅࡀ ࡊࡀࡁࡉࡓࡀ ࡖࡋࡀࡌࡉࡔࡕࡀࡍࡉࡀ ࡌࡃࡀࡋࡉࡀ ࡊࡅࡔࡈࡀ ࡖࡓࡁࡀ ࡓࡉࡔࡀࡉࡀ ࡖࡔࡓࡀࡓࡀ ࡏࡅࡕࡓࡀ ࡖࡓࡀࡄࡉࡈ ࡌࡀࡋࡀࡅࡀࡕࡀ ࡖࡁࡀࡉࡕࡀ ࡅࡋࡀࡌࡉࡈࡉࡅࡅࡉࡀ ࡀࡊࡅࡀࡕ ࡂࡅࡐࡍࡀ ࡖࡊࡅࡋࡇ ࡓࡀࡄࡌࡉࡀ ࡅࡏࡋࡀࡍࡀ ࡓࡁࡀ ࡖࡊࡅࡋࡇ ࡀࡎࡀ ࡅࡀࡕࡀ ࡏࡅࡕࡓࡀ ࡁࡎࡀࡁࡀ ࡅࡌࡀࡈࡉࡀ ࡅࡋࡀ ࡌࡉࡕࡊࡀࡌࡀࡓ ࡔࡅࡌࡇ ࡋࡒࡀࡋࡀࡉࡅࡍ ࡖࡓࡀ ࡄࡌࡉࡀ ࡔࡅࡌࡇ ࡋࡒࡀࡋ ࡃࡉࡋࡉࡀ ࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡀࡄ࡙ࡀ ࡀࡍࡀࡕ ࡌࡀࡍࡃࡀ ࡖࡄࡉࡉࡀ ࡀࡎࡉࡌ ࡏࡃࡀࡊ ࡏࡋࡀࡉ ࡅࡕࡓࡅࡑ {ࡅ}ࡀ<ࡉ>ࡍࡀࡊ ࡏࡋࡀࡉ ࡌࡍ ࡐࡀࡓࡀࡉ ࡅࡏࡋࡀࡉࡉࡀ ࡅࡌࡍ ࡁࡉࡕ ࡀࡋࡀࡄ ࡓࡁࡀ ࡅࡓࡀࡌ ࡀࡍࡀ ࡌࡀࡍࡃࡀ ࡖࡄࡉࡉࡀ ࡀࡎࡉࡌ ࡏࡃࡀࡊ ࡏࡋࡀࡉ ࡅࡕࡓࡅࡑ ࡀࡉࡍࡀࡊ ࡏࡋࡀࡉ ࡌࡍ ࡐࡉࡓࡉࡀ ࡅࡏࡋࡀࡉࡉࡀ ࡅࡌࡍ ࡁࡉࡕ ࡀࡁࡅ ࡓࡁࡀ ࡅࡓࡀࡌࡀ ࡀࡍࡀࡕ ࡌࡀࡍࡃࡀ ࡖࡄࡉࡉࡀ ࡀࡉࡍࡀࡊ ࡕࡓࡅࡑ ࡒࡋࡉࡌࡉࡀ ࡄࡀࡋࡉࡍ ࡄࡉࡍࡅࡍ ࡏ{ࡃ}<ࡓ>ࡉࡀ ࡅࡓࡀࡅࡆࡉࡀ ࡅࡁࡀࡄࡅࡉࡀ ࡁࡀ ࡈࡉࡍࡉࡀ ࡅࡉࡀࡃࡀࡋࡉࡀ ࡅࡔࡀࡕࡀࡍ ࡌࡀࡋࡀࡋࡀ ࡂࡀࡍࡆࡉࡁࡓࡉࡀ ࡍࡉࡄࡉࡀ ࡀࡁࡉࡋࡅࡓࡉࡀ ࡖ ࡀࡎࡀࡅࡀࡕࡀ ࡀࡔࡀࡓ ࡎࡉࡂࡉࡀ ࡃࡉࡋࡄࡅࡍ ࡖࡀࡕࡀࡉࡕࡅࡍ ࡌࡍ ࡏࡋࡀࡅࡉࡀ ࡐࡓࡀࡕ ࡖࡏࡋࡀࡅࡉࡀ ࡐࡓࡀࡕ ࡅࡌࡍ ࡏࡋࡀࡅࡉࡀ ࡃࡀࡅࡓࡀ ࡄࡉࡊࡋࡇ ࡅࡌࡍ ࡏࡋࡀࡅࡉࡀ ࡍࡉࡎࡊࡀ ࡍࡉࡎࡊࡀ ࡅࡌࡍ ࡏࡋࡀࡅࡉࡀ ࡂࡀࡓࡂࡋࡉࡀ ࡖࡓࡅࡄࡀ ࡅࡌࡍ ࡏࡋࡀࡅࡉࡀ ࡀࡓࡁࡉࡀ ࡆࡀࡅࡀࡉࡀࡕࡀ ࡖࡁࡀࡉࡕࡀ ࡅࡌࡍ ࡏࡋࡀࡅࡉࡀ ࡒࡀࡓࡍࡉࡀ ^ࡖ^ࡄࡔࡅࡊࡀ ࡅࡌࡍ ࡏࡋࡀࡅࡉࡀ ࡎࡀࡃࡀࡍࡉࡀ ࡏࡐࡉࡊࡉࡀ ࡅࡌࡍ ࡏࡋࡀࡅࡉࡀ ࡏࡁࡀࡃ ࡅࡌࡉࡁࡀࡃ ࡅࡌࡍ ࡏࡋࡀࡅࡉࡀ ࡏࡅࡁࡀࡃࡉࡀ ࡖࡔࡉࡁࡉࡀࡄࡉࡀ ࡅࡌࡍ ࡏࡋࡀࡅࡉࡀ ࡀࡋࡌࡉࡀ ࡅࡁࡉࡍࡉࡀࡍࡉࡀ ࡅࡌࡍ ࡏࡋࡀࡅࡉࡀ ࡀࡉࡀࡓ ࡁࡀࡓࡀࡉࡀ ࡅࡃࡀࡅࡓࡀ ࡕࡀࡒࡍࡀ ࡅࡌࡍ ࡐࡓࡀࡕ ࡐࡓࡉࡕࡀ ࡅࡌࡍ ࡏࡌࡀࡕ ࡏࡅ ࡕࡓࡉࡀ ࡍࡀࡐࡔࡉࡇ ࡅࡌࡍ ࡀࡕࡅࡕࡉࡇ ࡊࡅࡓࡎࡉࡀ ࡖࡉࡅࡔࡀࡌࡉࡍ ࡃࡀࡊࡉࡀ ࡁࡓ ࡄࡉࡉࡀ ࡓࡁࡉࡀ ࡓ ࡉࡔࡀࡉࡉࡀ ࡂࡀࡁࡓࡀ ࡖࡊࡅࡓࡎࡉࡇ ࡕࡓࡉࡑ ࡅࡉࡀࡕࡉࡁ ࡋࡓࡉࡔ ࡊࡀࡍࡀ ࡖࡌࡉࡀ ࡅࡐࡀࡎࡉ ࡌࡊࡀ ࡓࡁࡀ ࡖࡍࡄࡅࡓࡀ ࡊࡋࡉࡋ ࡀࡉࡀࡓ ࡕࡓࡀࡑࡋࡇ ࡁࡓࡉࡔࡉࡇ ࡕࡋࡀࡕࡌࡀ ࡅࡔࡉࡕࡉࡍ ࡄࡀࡅࡉࡍ ࡀࡈࡓࡅࡐࡉࡀ ࡖࡊࡋࡉࡋࡇ ࡍࡀࡄࡅࡓ ࡌࡍ ࡔࡀࡌࡉࡔ ࡁࡋࡀࡅࡀ ࡅࡕࡀࡒࡅࡍ ࡌࡍ ࡁࡎࡉࡓࡀ ࡁࡕࡅࡒࡍࡇ ࡍࡀࡐࡅࡒࡀ ࡓࡉࡄࡀ ࡁࡀࡎࡉࡌࡀ ࡌࡍ ࡀࡁࡉࡍࡉࡀ ࡀࡈࡉࡓࡐࡉࡀ ࡖࡊࡋࡉࡋࡇ ࡅࡌࡉࡕࡊࡀࡓࡊࡉࡁࡀ ࡍࡉࡔࡌࡀࡕࡀ ࡁࡀࡉࡀࡓ ࡎࡕࡀࡍࡀ ࡅࡎࡀࡋࡒࡀ ࡄࡀࡆࡉࡋࡇ ࡏࡋ ࡀࡉࡀࡓ ࡁࡀࡓࡀࡉࡀ ࡅࡋࡃࡀࡅࡓࡀ ࡕࡀࡒࡍࡀ ࡁࡉࡕ ࡀࡍࡀࡔࡀࡕࡀࡍ ࡒࡀࡃࡌࡀࡉࡉࡀ ࡅࡁࡈࡅࡓࡉࡀ ࡀ{ࡉ}ࡕࡀࡉࡕࡅࡍ ࡌࡉࡀ ࡋࡀࡄࡅࡀࡉࡕࡅࡍ ࡅࡁࡍࡀࡄࡅࡉࡀ ࡋࡀࡏࡁࡀࡆࡀࡒࡕࡅࡍ ࡅࡐࡀࡒࡀࡕࡀ ࡋࡀࡕࡁࡀࡃࡀࡓࡕࡅࡍ ࡋࡐࡀࡂࡓࡀ ࡖ ࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡀࡄ࡙ࡀ ࡍࡐࡀࡋࡕࡅࡍ ࡅࡋࡀࡏࡈࡀࡍࡀ<ࡐ>ࡕࡅࡍ ࡌࡍ ࡏࡎࡕࡊࡉࡀ ࡄࡆࡉࡍࡊࡅࡍ ࡌࡀࡄࡉࡒࡀ ࡁࡓ ࡌࡀࡄࡉࡒࡀ ࡁࡓ ࡊࡀࡍࡀ ࡖࡄࡔࡅࡊࡀ ࡁࡓ ࡏࡅࡑࡀ ࡁࡉࡔࡀ ࡖࡌࡓࡀࡓࡀ ࡖࡋࡀࡁࡀࡈࡋࡀ ࡅࡋࡀࡔ ࡀࡐࡀࡓࡋࡇ ࡖࡁࡓ ࡋࡀࡏࡕࡉࡒ{ࡒ}<ࡓ>ࡉࡀ ࡏࡋ ࡏࡅࡄࡓࡇ ࡖࡄࡉࡉࡀ ࡅࡋࡀࡌࡆࡀࡌࡀࡍ ࡋࡔࡁࡉࡋࡇ ࡖࡂࡅࡁࡓࡉࡀ ࡌࡄࡀࡉࡌ<ࡍ>ࡉࡀ ࡔࡓࡀ ࡏࡃࡇ ࡋࡐࡅࡌࡇ ࡐࡀࡔ ࡊࡀࡁࡃࡀ ࡁࡌࡓࡉࡓࡀࡕࡀ ࡅࡐࡀࡔ ࡌࡓࡉࡓࡕࡀ ࡁࡊࡀࡁࡃࡇ ࡅࡓࡀࡁࡅࡍ ࡓࡌࡀࡁࡊࡅࡍ ࡓࡅࡒࡀ ࡖࡌࡉࡓࡕࡅࡍ ࡏࡔࡕࡐࡉࡋࡅࡀࡋ ࡏࡋࡀࡅࡀࡉࡊࡅࡍ ࡌࡉࡀ ࡊࡉࡁࡉࡀ ࡔࡀࡉࡁࡈࡉࡀ ࡓࡉࡃࡉࡀ ࡅࡓࡅࡌࡀࡉࡉࡀ ࡅࡌࡀࡋࡅࡀࡈࡉࡀ ࡁࡉࡔࡉࡀ ࡖࡐࡀࡂࡓࡀ ࡅࡊࡉࡁࡇ ࡖࡓࡉࡔࡀ ࡑ{ࡀࡊ}<ࡉࡑ>ࡋࡉࡀ ࡖࡑࡀࡉࡃࡀ ࡅࡁࡅࡓࡅࡒࡕࡀ ࡏࡋ ࡀࡉࡍࡀ ࡕࡅࡋࡉࡕࡀ ࡋࡊࡀࡊࡀ ࡄࡀࡑࡁࡉࡀ ࡋࡃࡅࡐࡍࡀ ࡄࡀࡑࡁࡕࡀ ࡏࡅࡌࡀࡕࡍࡀ ࡏࡊࡀࡓࡉࡅࡕࡀ ࡏࡋ ࡋࡉࡁࡇ ࡑࡉࡌࡉࡓࡕࡀ ࡋࡄࡀࡍࡇ ࡅࡔࡀࡉࡉࡀ ࡅࡐࡀࡉࡉࡀ ࡋࡊࡅࡋࡄࡅࡍ ࡄࡀࡍࡃࡀࡌࡀ ࡋࡂࡀࡈ ࡓࡌࡀࡁࡊࡅࡍ ࡏࡔࡀࡕࡀ ࡄࡀࡉࡕࡀ ࡅࡌࡀࡓࡂࡀࡍࡉࡕࡀ ࡅࡓࡅࡉࡕࡀ ࡄࡀࡓࡔࡉࡀ ࡄࡀࡔࡊࡉࡀ ࡅࡀࡉࡍࡀ ࡁࡉࡔࡕࡀ ࡅࡊࡀࡅࡉࡄࡀࡕࡀ ࡅࡋࡅࡈࡀࡕࡀ ࡅࡒࡉࡓࡉࡀࡕࡀ ࡅࡀࡕࡀࡅࡀࡕࡀ ࡖࡌࡄࡀࡌࡁࡋࡀࡕࡀ ࡖࡉࡀࡕࡁࡉࡀ ࡋࡎࡀࡃࡀࡍࡀ ࡏࡐࡉࡊࡀ ࡌࡐࡀࡂࡌࡉࡋࡅࡍ ࡅࡌࡑࡀࡋࡐࡉࡋࡅࡍ ࡅࡌࡀࡁࡔࡉࡁࡅࡍ ࡏࡋ ࡏࡁࡍࡀ ࡖࡀࡃࡀࡌ ࡄࡀࡅࡀ ࡌࡍࡀࡎࡕࡊࡅࡍ ࡅࡄࡆࡅࡍࡊࡅࡍ ࡕࡋࡀࡕࡀ ࡂࡅࡁࡓࡉࡀ ࡀࡁࡅࡕࡄࡀࡕࡀࡍ ࡖࡕࡅࡔࡋࡉࡌࡉࡀ ࡒࡀࡓࡉࡀ ࡁࡄࡉࡓࡉࡀ ࡖࡋࡁࡉࡔࡉࡀ ࡏࡅࡑࡈࡋࡉࡀ ࡖࡆࡉࡅࡀ ࡌࡊࡀࡎࡉࡍ ࡈࡀࡓࡈࡀࡁࡅࡍࡉࡀ ࡓࡅࡓࡁࡉࡀ ࡖࡍࡄࡅࡓࡀ ࡅࡌࡀࡕࡍࡀ ࡁࡓࡉࡔࡀࡉࡄࡅࡍ ࡊࡋࡉࡋࡉࡀ ࡓࡀࡅࡆࡉࡀ ࡖࡆࡀࡊࡅࡀࡅࡀࡕࡀ ࡅࡍࡎࡉࡁ ࡃࡀࡅࡋࡇ ࡄࡀࡅࡀࡓࡀ ࡖࡋࡀࡌࡔࡀࡓࡀࡉ ࡅࡎࡋࡉࡒ ࡋࡊࡉࡐࡇ ࡖࡐࡓࡀࡕ ࡆࡅࡉࡀ ࡅࡂࡓࡀࡐ ࡌࡉࡀ ࡖࡏࡓࡉࡀ ࡅࡓࡀࡅࡆࡉࡀ ࡔࡅࡌࡀ ࡖࡄࡉࡉࡀ ࡌࡀࡃࡊࡀࡓ ࡏࡋࡀࡅࡀࡉࡊࡅࡍ ࡅࡌࡉࡀ ࡅࡁࡀࡉࡉࡀ ࡋࡌࡉࡁࡀࡈࡋࡇ ࡋࡃࡀࡅࡓࡀ ࡖࡁࡉࡔࡉࡀ ࡌࡊࡀࡃࡁࡉࡀ ࡄࡃࡀࡃࡉࡀ ࡀࡍࡀࡕࡅࡍ ࡌࡉࡀ ࡋࡀࡕࡉࡊࡀࡃࡁࡅࡍ ࡌࡉࡀ ࡄࡉࡉࡀ ࡁࡉࡋࡅࡓࡉࡀ ࡍࡀࡄࡉࡓࡉࡀ ࡀࡍࡀࡕࡅࡍ ࡏࡓࡉࡀ ࡅࡓࡀࡅࡆࡉࡀ ࡁࡀࡈࡉࡍࡉࡀ ࡅࡉࡀࡃࡀࡋࡉࡀ ࡔࡀࡕࡉࡀ ࡌࡉࡀ ࡍࡀࡄࡉࡓࡀ ࡁࡉࡋࡅࡓࡉࡀ ࡖࡀࡎࡀࡅࡀࡕࡀ ࡍࡎࡀࡁࡅࡍࡊࡅࡍ ࡂࡅࡁࡓࡉࡀ ࡀࡁࡀࡄࡀࡕࡀࡍ ࡌࡍ ࡊࡀࡍࡀࡉࡊࡅࡍ ࡍࡎࡀࡁࡅࡍࡊࡅࡍ ࡅࡓࡌࡅࡍࡊࡅࡍ ࡁࡓࡉࡔ ࡉࡀࡓࡃࡍࡀ ࡅࡉࡀࡓࡃࡍࡀ ࡐࡓࡀࡔ ࡁࡓࡉࡔ ࡐࡉࡓࡉࡀ ࡏࡌࡁࡉࡀ ࡅࡏࡋࡀࡍࡉࡀ ࡅࡁࡓࡉࡔ ࡁࡅࡈࡍࡀ ࡅࡌࡀࡅࡃࡀࡋࡀ ࡅࡁࡓࡉࡔ ࡌࡎࡅࡕࡀ ࡅࡁࡓࡉࡔ ࡑࡉࡐࡀࡓ ࡉࡀࡌࡀ ࡀࡕࡀࡉࡕࡅࡍ ࡋࡕࡉࡁࡉࡋ ࡅࡔࡕࡀࡐࡀࡉࡊࡕࡅࡍ ࡋࡊࡀࡍࡀ ࡖࡊࡅࡋࡇ ࡌࡀࡅࡃࡀࡋࡀ ࡅࡐࡀࡔࡉࡅࡓࡉࡀ ࡊࡉࡁࡉࡀ ࡌࡍ ࡐࡀࡂࡓࡀࡉ ࡃࡉࡋࡉࡀ ࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡅࡀࡎࡉࡅࡉࡀ ࡌࡍ {ࡌࡉࡄࡕࡀ} ^ࡌࡄࡉࡕࡀ^ ࡖࡄࡔࡅࡊࡀ ࡅࡍࡐࡀࡑ ࡊࡀࡍࡐࡇ ࡌࡍ ࡄࡉࡆࡃࡀ ࡏࡋ ࡌࡉࡊࡀࡐࡀ<ࡓ> ࡀࡉࡍࡇ ࡌࡍ {ࡌࡄࡉࡕࡀ} ࡃࡉࡌࡉࡄࡕࡀ ࡅࡏࡋ ࡌࡉࡕࡓࡀࡑ ࡅࡏࡋ ࡌࡉࡔࡓࡉࡀ ࡂࡉࡈࡓࡉࡀ ࡖࡌࡅࡕࡀ ࡅࡋࡌࡉࡔࡀࡍࡅࡉࡉࡀ ࡄࡀࡕࡌࡉࡀ ࡖࡄࡁࡉࡋࡀ ࡅࡋࡌࡉࡕࡁࡀࡓ ࡒࡅࡁࡋࡉࡀ ࡖࡁࡀࡉࡕࡀ ࡅࡌࡄࡀࡔࡀࡁࡀࡕࡀ ࡖࡓࡅࡄࡀ ࡅࡋࡌࡉࡌࡕࡀ ࡒࡅࡌࡕࡇ ࡖࡂࡉࡁࡀ ࡅࡋࡎࡀࡌࡅࡒࡉࡀ ࡀࡍࡐࡇ ࡖࡉࡅࡓࡀࡒࡉࡀ ࡅࡏࡋ ࡌࡉࡍࡐࡀࡑ ࡌࡉࡍࡇ ࡄࡉࡆࡃࡀ ࡅࡋࡌࡉࡊࡀࡐࡀࡓ ࡀࡉࡍࡇ ࡌࡍ ࡃࡉࡌࡉࡄࡕࡀ ࡅࡋࡌࡉࡕࡓࡀࡑ ࡅࡋࡒࡀࡉࡅࡌࡉࡀ ࡅࡋࡌࡀࡒࡅࡌࡉࡀ ࡒࡅࡌࡕࡇ ࡖࡂࡉࡁࡀࡁࡀ ࡅࡏࡋ ࡓࡀࡅࡆࡉࡀ ࡊࡅࡋࡇ ࡐࡉࡓࡀ ࡏࡌࡁࡀ ࡅࡏࡋࡀࡍࡀ ࡕࡅࡔࡋࡉࡌࡉࡀ ࡄࡆࡅࡍࡊࡅࡍ ࡅࡐࡀࡔࡓࡅࡍࡊࡅࡍ ࡅࡒࡓࡅࡍࡊࡅࡍ ࡋࡍࡀࡄࡓࡉࡀ ࡎࡁࡉࡓࡉࡀ ࡎࡀࡌࡀ ࡅࡀࡎࡅࡕࡀ ࡅࡋࡀࡅࡐࡀ ࡖࡋࡀࡐࡎࡀࡒࡀ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡁࡀࡕࡓࡀ ࡖࡌࡉࡍࡇ ࡀࡕࡀࡉࡕࡅࡍ ࡅࡁࡀࡉࡀࡓ ࡂࡅࡐࡍࡀ ࡅࡎࡉࡍࡃࡉࡓࡊࡀ ࡖࡌࡉࡍࡇ ࡀࡎࡂࡀࡉࡕࡅࡍ ࡁࡓࡀࡁ ࡏࡅࡕࡓࡉࡀ ࡖࡊࡅࡋࡇ ࡍࡉࡌࡅࡎࡇ ࡖࡏࡑࡈࡅࡍࡀ ࡖࡐࡀࡂࡓࡀ ࡖࡄࡀࡆࡀ ࡍࡉࡔࡉࡌࡕࡀ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡖࡀࡆࡋࡉࡕࡅࡋࡇ ࡕࡓࡅࡑ ࡒࡅࡌࡕࡇ ࡁࡀࡋࡁࡅࡔࡉࡇ ࡅࡀࡎࡌࡉࡒ ࡀࡍࡐࡇ ࡖࡉࡅࡓࡀࡒࡉࡀ ࡀࡂࡆࡀࡓ ࡅࡀࡍࡐࡉࡒ ࡌࡉࡍࡇ ࡌࡀࡄࡅ ࡅࡀࡍࡐࡉࡒ ࡌࡉࡍࡇ ࡐࡀࡎࡉࡒ ࡅࡀࡍࡐࡉࡒ ࡌࡉࡍࡇ ࡓࡅࡄࡉࡀ ࡅࡀࡍࡐࡉࡒ ࡌࡉࡍࡇ ࡔࡅࡁࡀ ࡏࡅࡑࡓࡉࡀ ࡖࡌࡅࡕࡀ ࡅࡕࡌࡀࡍࡉࡀ ࡌࡁࡀࡊࡀࡋࡀࡕࡀ ࡖࡄࡔࡅࡊࡀ ࡅࡌࡍ ࡄࡀࡓࡔࡉࡀ ࡁࡉࡔࡉࡀ ࡅࡌࡍ ࡎࡀࡃࡀࡍࡉࡀ ࡏ ࡐࡉࡊࡉࡀ ࡅࡌࡍ ࡄࡅࡌࡓࡉࡀ ࡆࡀࡃࡀࡍࡉࡀࡕࡀ ࡋࡂࡅࡈ ࡋࡄࡀࡆࡀ ࡍࡉࡔࡉࡌࡕࡀ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡁࡀࡐࡓࡀࡎ ࡉࡀࡌࡉࡍࡇ ࡅࡀࡐࡒࡇ ࡌࡍ ࡀࡕࡅࡕࡉࡀ ࡀࡎࡀࡓ ࡏࡃࡀࡉࡄࡅࡍ ࡖࡁࡉࡔࡉࡀ ࡅࡌࡍ ࡄࡀࡓࡀࡔࡕࡀ ࡖࡁࡉࡋࡃࡁࡀࡁࡉࡀ ࡅࡌࡍ ࡀࡁࡉࡍࡉࡀ ࡈࡅࡐࡓࡉࡀ ࡖࡋࡉࡂࡓࡇ ࡖࡂࡀࡁࡓࡀ ࡌࡄࡀࡌࡁࡉࡋࡀࡍࡀ ࡅࡀࡒࡌࡅ ࡁࡀࡎࡅࡕࡀ ࡖࡄࡉࡉࡀ ࡁࡓࡉࡊࡉࡕ ࡄࡀࡉࡋࡀ ࡖࡌࡉࡀ ࡁࡓࡉࡊࡉࡕ ࡆࡉࡅࡀ ࡖࡌࡉࡀ ࡅࡁࡓࡉࡊࡉࡕ ࡍࡄࡅࡓࡀ ࡓࡁࡀ ࡖࡌࡉࡀ ࡁࡓࡉࡊࡉࡕ ࡕࡀࡂࡀ ࡖࡌࡉࡀ ࡁࡓࡉࡊࡉࡕ ࡐࡀࡓࡑࡅࡐࡀ ࡓࡁࡀ ࡖࡌࡉࡀ ࡁࡓࡉࡊࡉࡕ ࡋࡀࡅࡐࡀ ࡖࡌࡉࡀ ࡁࡓࡉࡊࡉࡕ ࡔࡀࡓࡔࡀ ࡖࡌࡉࡀ ࡁࡓࡉࡊࡉࡕ ࡍࡉࡑࡅࡁࡕࡀ ࡖࡌࡉࡀ ࡁࡓࡉࡊࡉࡕ ࡀࡎࡅࡕࡀ ࡓࡀࡁࡕࡉࡀ ࡖࡌࡉࡀ ࡅࡁࡓࡉࡊࡉࡕ ࡐࡅࡌࡀ ࡓࡁࡀ ࡖࡐࡓࡀࡔ ࡁࡉࡍࡉࡀࡍࡀ ࡓࡁࡀ ࡖࡀࡁࡀࡄࡀࡕࡀࡍ ࡔࡅࡌࡀ ࡖࡏࡅࡕࡓࡉࡀ ࡌࡀࡃࡊࡀࡓ ࡏࡋࡀࡅࡀࡉࡄࡅࡍ ࡌࡉࡀ ࡅࡔࡅࡌࡀ ࡖࡉࡅࡆࡀࡈࡀࡒ ࡌࡀࡍࡃࡀ ࡖࡄࡉࡉࡀ ࡀࡎࡉࡀ ࡖࡌࡀࡎࡉࡀ ࡊࡅࡋࡄࡅࡍ ࡀࡎࡀࡅࡀࡕࡀ ࡅࡔࡅࡌࡀ ࡖࡄࡉࡉࡀ ࡓࡅࡓࡁࡉࡀ ࡍࡅࡊࡓࡀࡉࡉࡀ ࡖࡋࡃࡁࡀࡓ ࡃࡀࡅࡓࡀ ࡅࡎࡀࡊࡀ ࡅࡔࡀࡓࡔࡀ ࡅࡔࡓࡉࡍ ࡌࡀࡃࡊࡀࡓ ࡏࡋࡀࡅࡀࡉࡊࡅࡍ ࡌࡉࡀ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡁࡉࡅࡊࡀࡁࡀࡓ ࡆࡉࡅࡀ ࡌࡀࡋࡀࡋࡀ ࡓࡁࡀ ࡒࡀࡃࡌࡀࡉࡀ ࡏࡅࡑࡈࡅࡍࡀ ࡖࡃࡓࡉࡀ ࡌࡉࡀ ࡋࡁࡉࡔ ࡅࡃࡓࡉࡀ ࡖࡌࡉࡀ ࡌࡊࡀࡎࡀࡉ ࡅࡃࡓࡉࡀ ࡖࡌࡉࡀ ࡒࡅࡃࡀࡌࡇ ࡒࡃࡉࡌࡀ ࡒࡀࡃࡌࡀࡉࡀ ࡄࡀࡁ ࡀࡎࡅࡕࡀ ࡋࡊࡅࡋࡄࡅࡍ ࡁࡍࡇ ࡖࡀࡃࡀࡌ ࡅࡊࡅࡋ ࡍࡉࡌࡅࡎࡀ ࡅࡏࡑࡈࡅࡍࡀ ࡖࡐࡀࡂࡓࡇ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡀࡍࡀࡕࡅࡍ ࡌࡉࡀ ࡕࡉࡆࡋࡅࡍ ࡁࡂࡀࡅࡀࡉࡄࡅࡍ ࡄࡉࡓࡁࡉࡀ ࡋࡁࡉࡔࡉࡀ ࡅࡎࡉࡊࡉࡍࡉࡀ ࡎࡒࡉࡋࡀࡕࡀ ࡏࡋ ࡖࡄࡀࡈࡉࡀ ࡁࡐࡀࡂࡓࡇ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡄࡅࡍ ࡄࡉࡓࡁࡉࡀ ࡎࡒࡉࡋࡀࡕࡀ ࡋࡎࡀࡄࡓࡉࡀ ࡅࡋࡃࡀࡉࡅࡉࡀ ࡅࡋࡔࡉࡃࡉࡀ ࡅࡋࡐࡉࡒࡃࡉࡀ ࡅࡏࡋ ࡋࡉࡄࡀࡍࡉࡀ ࡅࡏࡋ ࡄࡅࡌࡓࡉࡀ ࡆࡀࡃࡀࡍࡉࡀࡕࡀ ࡅࡋࡍࡀࡋࡉࡀ ࡅࡋࡍࡉࡅࡋࡉࡀ ࡅࡋࡈࡀࡉࡀ ࡖࡈࡀࡉࡉࡍ ࡅࡋࡆࡉࡒࡉࡀ ࡁࡉࡔࡉࡀ ࡅࡋࡁࡍࡉࡀ ࡀࡍࡂࡀࡓࡉࡀ ࡅࡋࡃࡌࡀࡅࡀࡕࡀ ࡎࡀࡉࡍࡀࡕࡀ ࡖࡔࡓࡉࡉࡀ ࡁࡐࡀࡂࡓࡇ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡀࡂࡆࡀࡓ ࡅࡀࡍࡐࡉࡒ ࡐࡎࡅࡒ ࡌࡀࡄࡅ ࡃࡄࡅ ࡅࡀࡍࡐࡉࡒ ࡌࡉࡍࡇ ࡔࡅࡁࡀ ࡏࡅࡑࡓࡉࡀ ࡖࡌࡅࡕࡀ ࡅࡕࡌࡀࡍࡉࡀ ࡌࡁࡀࡊࡀࡋࡀࡕࡀ ࡖࡄࡔࡅࡊࡀ ࡌࡍ ࡒࡁࡀࡋ ࡌࡉࡀ ࡄࡉࡉࡀ ࡀࡍࡀࡕࡅࡍ ࡀࡕࡀࡉࡕࡅࡍ ࡌࡍ ࡀࡉࡀࡓ ࡁࡀࡓࡀࡉࡀ ࡅࡃࡀࡅࡓࡀ ࡕࡀࡒࡍࡀ ࡀࡍࡀࡕࡅࡍ ࡌࡉࡀ ࡀࡕࡀࡉࡕࡅࡍ ࡅࡊࡁࡀࡔࡕࡅࡍ ࡋࡄࡀࡈࡉࡀ ࡄࡈࡉࡕࡀ ࡅࡊࡁࡀࡔࡕࡅࡍ ࡋࡆࡀࡓࡕࡀࡉ ࡅࡆࡀࡓࡕࡀࡍࡀࡉ ࡅࡊࡁࡀࡔࡕࡅࡍࡇ ࡋࡏࡅࡓ ࡄࡀࡉࡋࡀ ࡓࡁࡀ ࡌࡀࡓࡇ ࡖࡄࡔࡅࡊࡀ ࡀࡎࡀࡓࡕࡅࡋࡇ ࡆࡉࡍࡉࡐࡕࡇ ࡔࡃࡀࡉࡕࡅࡋࡇ ࡁࡐࡅࡌࡇ ࡅࡍࡂࡀࡃࡕࡅࡍ ࡏࡋࡀࡅࡇ ࡓࡒࡉࡄࡀ ࡅࡕࡓࡀࡑࡕࡅࡍ ࡏࡋࡀࡅࡇ ࡌࡀ ࡓࡆࡀࡁࡀࡍࡀ ࡓࡁࡀ ࡖࡀࡓࡒࡀ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡁࡂࡅࡁࡓࡉࡀ ࡕࡋࡀࡕࡀ ࡀࡁࡀࡄࡀࡕࡀࡍ ࡕࡅࡔࡋࡉࡌࡉࡀ ࡁࡄࡉࡓࡉࡀ ࡄࡀࡃ ࡒࡀࡉࡉࡌ ࡁࡓࡉࡔࡀ ࡖࡃࡀࡓࡀ ࡄࡀࡃ ࡒࡀࡉࡉࡌ ࡁࡌࡉࡑࡀࡉ ࡃࡀࡓࡀ ࡄࡀࡃ ࡒࡀࡉࡉࡌ ࡁࡔࡉࡄࡋࡀ ࡖࡃࡀࡓࡀ ࡅࡕࡉࡕࡀࡉࡀ ࡅࡕࡉࡕࡀࡉࡀ ࡍࡀࡎࡉࡁ ࡅࡉࡀࡄࡉࡁ ࡋࡌࡉࡑࡀࡉࡀ ࡅࡌࡉࡑࡀࡉࡀ ࡌࡀࡌࡈࡉࡀ ࡋࡓࡉࡔࡀࡉࡀ ࡅࡓࡉࡔࡀࡉࡀ ࡍࡉࡐࡀࡓࡒࡅࡍࡇ ࡋࡄࡀࡆࡀ ࡍࡉࡔࡉࡌࡕࡀ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡌࡍ ࡀࡒࡀ ࡋࡓࡅࡀࡄࡀ ࡅࡌࡍ ࡏࡔࡀࡕࡀ ࡅࡓࡅࡉࡕࡀ ࡅࡌࡍ ࡔࡀࡐࡋࡅࡕࡀ ࡋࡌࡀࡋࡉࡅࡕࡀ ࡅࡌࡍ ࡓࡅࡄ ࡎࡉࡈࡉࡀ ࡅࡌࡀࡑࡈࡉࡀ ࡅࡌࡍ ࡊࡉࡁࡉࡀ ࡅࡌࡍ ࡌࡀࡄࡓࡉࡀ ࡅࡌࡍ ࡒࡉࡓࡎࡉࡀ ࡅࡌࡍ ࡌࡀࡎࡀࡎࡉࡀ ࡅࡌࡍ ࡊࡅࡄࡓࡀࡍࡉࡀ ࡅࡌࡍ ࡄࡀࡓࡔࡉࡀ ࡁࡉࡔࡉࡀ ࡅࡌࡍ ࡎࡀࡃࡀࡍࡉࡀ ࡏࡐࡉࡊࡉࡀ ࡅࡌࡍ ࡊࡅࡋࡄࡅࡍ ࡂࡅࡍࡀࡄࡉࡀ ࡖࡏࡕࡉࡂࡍࡀࡁࡅࡍ ࡅࡏࡕࡂࡀࡉࡀࡓࡁࡅࡍ ࡁࡐࡀࡂࡓࡀ ࡖࡓࡀࡌ ࡆࡉࡄࡓࡅࡍ ࡁࡓࡌࡀࡋࡉࡄࡀ ࡅࡍࡉࡎࡒࡅࡍ ࡅࡍࡉࡐࡋࡅࡍ ࡁࡕࡀࡎࡍࡉࡒࡀ ࡖࡀࡓࡒࡀ ࡕࡉࡕࡀࡉࡕࡀ ࡃࡅࡊࡕࡀ ࡖࡔࡀࡌࡉࡔ ࡋࡀࡃࡀࡄࡍࡀ ࡅࡎࡉࡓࡀ ࡀࡍࡐࡇ ࡋࡀࡌࡀࡄࡅࡉࡀ ࡅࡀࡎࡅࡕࡀ ࡕࡉࡄࡅࡉࡋࡇ ࡋࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡁࡄࡀࡆࡉࡍ ࡌࡉࡍࡉࡀࡍࡀ ࡖࡃࡀࡅࡋࡀ ࡄࡉࡉࡀ ࡆࡀࡊࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ ࡎࡀ ࡞
ࡁࡔࡅࡌࡀࡊ ࡆࡉࡅࡀ ࡓࡁࡀ ࡒࡀࡃࡌࡀࡉࡀ ࡅࡁࡔࡅࡌࡀࡊ ࡍࡄࡅࡓࡀ ࡓࡁࡀ ࡒࡀࡃࡌࡀࡉࡀ ࡅࡁࡔࡅࡌࡇ ࡖ ࡍࡉࡁࡈࡀ ࡓࡁࡀ ࡒࡀࡃࡌࡀࡉࡀ ࡅࡁࡔࡅࡌࡀࡊ ࡌࡀࡋࡀࡋࡀ ࡓࡁࡀ ࡒࡀࡃࡌࡀࡉࡀ ࡁࡔࡅࡌࡀࡊ ࡉࡅࡊࡀࡁࡀࡓ ࡆࡉࡅࡀ ࡁࡓ ࡔࡅࡌࡀ ࡓࡁࡀ ࡃࡀࡊࡉࡀ ࡅࡏࡋࡀࡉࡀ ࡖࡊࡁࡀࡓ ࡁࡆࡉࡅࡇ ࡅࡀࡎࡂࡉࡀ ࡁࡀࡍࡄࡅࡓࡇ ࡅࡁࡔࡅࡌࡀࡊ ࡂࡀࡁࡓࡀ ࡉࡀࡕࡉࡓࡀ ࡅࡐࡕࡀ ࡄࡀࡉ ࡖࡐࡀࡄࡕࡉࡀ ࡐࡉࡄࡕࡀ ࡖࡄࡉࡉࡀ ࡅࡍࡀࡑࡁࡉࡀ ࡍࡉࡑࡅࡁࡕࡀ ࡖࡍࡄࡅࡓࡀ ࡅࡎࡀࡎࡊࡉࡍࡉࡀ ࡅࡔࡀࡊࡍࡉࡀ ࡃࡌࡅࡕࡀ ࡒࡀࡃࡌࡀࡉࡕࡀ ࡁࡉࡕ ࡄࡉࡉࡀ ࡁࡏࡅࡑࡀࡓ ࡍࡄࡅࡓࡀ ࡎࡉࡌࡀࡊࡀ ࡅࡍࡉࡀࡄࡀ ࡓࡁࡀ ࡖࡄࡉࡉࡀ ࡅࡁࡄࡀࡔ ࡊࡀࡍࡀ ࡁࡓ ࡐࡉࡓࡉࡀࡅࡉࡎ ࡊࡀࡍࡀ ࡖࡀࡋࡉࡐ ࡀࡋࡉࡐ ࡄࡀࡅࡉࡍ ࡀࡋࡅࡀࡕࡇ ࡅࡏࡋࡀࡍࡀ ࡖࡌࡉࡍࡇ ࡐࡓࡀࡔࡕࡅࡍ ࡅࡍࡐࡀࡒࡕࡅࡍ ࡅࡀࡕࡀࡉࡕࡅࡍ ࡋࡀࡋࡌࡀ ࡌࡉࡀ ࡀࡍࡀࡕࡅࡍ ࡄࡉࡉࡀ ࡀࡍࡀࡕࡅࡍ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡁࡉࡅࡆࡀࡈࡀࡒ ࡌࡀࡍࡃࡀ ࡖࡄࡉࡉࡀ ࡁࡀࡁࡀࡕࡅࡓ ࡓࡀࡌࡀ ࡊࡀࡎࡉࡀ ࡅࡍࡈࡉࡓࡀ ࡗ ࡕࡉࡀࡁࡅࡕࡀ ࡄࡅࡀࡕ ࡄࡅࡀࡕ ࡏࡋࡀࡅࡀࡉࡊࡅࡍ ࡏࡋࡇ ࡌࡍ ࡁࡉࡕࡄࡉࡉࡀ ࡏࡋ ࡁࡀࡁࡀ ࡁࡀࡓࡀࡉࡀ ࡀࡅࡕࡁࡅࡉࡀ ࡌࡉࡕࡒࡀࡋ ࡏࡅࡕࡓࡉࡀ ࡕࡀࡒࡋࡉࡋࡇ ࡅࡒࡅࡃࡀࡌࡇ ࡕࡀࡒࡋࡉࡋࡇ ࡏࡋ ࡍࡉࡔࡌࡀࡕࡀ ࡏࡋ ࡏࡅࡁࡀࡃࡉࡀ ࡖࡀࡁࡃࡉࡀ ࡅࡌࡀࡎࡌࡉࡊࡉࡋࡉࡀ ࡋࡂࡉࡍࡆࡀ ࡓࡁࡀ ࡖࡄࡉࡉࡀ ࡖ ࡌࡉࡀ ࡀࡍࡀࡕࡅࡍ ࡄࡉࡉࡀ ࡀࡍࡀࡕࡅࡍ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡁࡆࡀࡓࡆࡏࡉࡋ ࡆࡉࡅࡀ ࡁࡍࡁࡀࡈ ࡍࡉࡁࡈࡀ ࡖࡆࡉࡅࡀ ࡑࡅࡓࡉࡊ ࡄࡉࡉࡀ ࡁࡊࡉࡍࡉࡀࡍࡅࡍ ࡀࡍࡀ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡁࡉࡅࡔࡀࡌࡉࡍ ࡃࡀࡊࡉࡀ ࡁࡓ ࡄࡉࡉࡀ ࡓࡁࡉࡀ ࡓࡉࡔࡀࡉࡉࡀ ࡍࡅࡊࡓࡀࡉࡉࡀ ࡖࡊࡅࡓࡎࡉࡀ ࡓࡌࡉࡋࡇ ࡅࡉࡀࡕࡉࡁ ࡋࡊࡀࡍࡀ ࡖ ࡌࡉࡀ ࡅࡋࡐࡀࡎࡉࡌࡊࡀ ࡓࡁࡀ ࡖࡍࡄࡅࡓࡀ ࡊࡋࡉࡋ ࡀࡉࡀࡓ ࡕࡓࡀࡑࡋࡇ ࡁࡓࡉࡔࡉࡀ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡁࡔࡉࡋࡌࡀࡉ ࡅࡍࡉࡃࡁࡀࡉ ࡕࡓࡉࡍ ࡐࡀࡃࡉࡁࡓࡇ ࡖࡌࡀࡍࡃࡀ ࡖࡄࡉࡉࡀ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡁࡄࡉࡁࡉࡋ ࡅࡔࡉࡕࡉࡋ ࡅࡀࡍࡅࡔ ࡂࡅࡁࡓࡉࡀ ࡕࡋࡀࡕࡀ ࡀࡁࡀࡄࡀࡕࡀࡍ ࡖࡁࡄࡉࡓb̤ࡀ ࡋࡀࡏࡕࡉࡍࡎࡉࡁ ࡅࡁࡉࡀࡒࡃࡀࡍࡉࡀ ࡖࡍࡅࡓࡀ ࡋࡀࡏࡒࡀࡃ ࡅࡁࡈࡅࡐࡀࡍࡉࡀ ࡌࡉࡀ ࡋࡀࡈࡀࡐ ࡗ ࡄࡀࡋࡉࡍ ࡂࡀࡁࡀࡓࡅࡀࡕࡀ ࡔࡀࡁࡀࡒ ࡌࡀࡓࡇ ࡖࡁࡀࡉࡕࡀ ࡋࡄࡀࡋࡉࡍ ࡄࡉࡍࡅࡍ ࡍࡄࡀࡂࡁࡇ ࡄࡉࡍࡂࡀ ࡁࡉࡀࡌࡀ ࡄࡁࡀࡒ ࡄࡁࡀࡒࡀ ࡁࡓ ࡁࡓࡁࡉࡕࡀ ࡎࡋࡉࡒ ࡆࡉࡄࡋࡅࡍ ࡄࡀࡁࡓࡅࡍ ࡋࡁࡉࡍࡉࡀࡍࡅࡍ ࡅࡌࡀࡈࡉࡀ ࡋࡌࡀࡓࡇ ࡖࡁࡀࡉࡕࡀ ࡌࡍ ࡁࡀࡉࡕࡀࡉࡅࡍ ࡅࡌࡍ ࡊࡅࡓࡎࡀࡉࡅࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ ࡉࡀࡄࡁࡀ ࡓࡅࡄࡀ ࡖࡒࡅࡃࡔࡀ ࡀࡍࡐࡀ ࡖࡍࡀࡐࡔࡀ ࡋࡁࡀࡄࡕࡅࡕࡀ ࡅࡏࡕࡀࡄࡆࡀࡕ ࡄࡆࡉࡕࡀ ࡅࡍࡉࡎࡁࡀࡕ ࡌࡍ ࡀࡅࡐࡉࡀ ࡖࡍࡀࡐࡔࡀ ࡑࡀࡓ ࡅࡍࡐࡀࡋ ࡎࡀࡄࡓࡀ ࡖࡀࡔࡉࡒࡀ ࡖࡋࡀࡄࡀࡆࡉࡀ ࡅࡈࡓࡅࡔࡀ ࡖࡋࡀࡔࡀࡌࡀ ࡅࡀࡌࡀࡓ ࡌࡀࡓࡇ ࡖࡁࡀࡉࡕࡀ ࡌࡀࡍ ࡌࡍ ࡄࡀࡋࡉࡍ ࡄࡉࡍࡅࡍ ࡂࡅࡁࡓࡉࡀ ࡕࡋࡀࡕࡀ ࡖࡋࡂࡀࡈࡁࡇ ࡄࡉࡍࡂࡀ ࡁࡉࡀࡌࡀ ࡄࡁࡀࡒ ࡄࡁࡀࡒࡀ ࡁࡂࡀࡅࡇ ࡅࡓ ࡁࡉࡕࡀ ࡅࡀࡓࡒࡀ ࡌࡎࡉࡍࡅࡍ ࡁࡋࡉࡂࡓࡀࡉࡄࡅࡍ ࡌࡉࡀ ࡋࡀࡏࡑࡈࡁࡀ ࡌࡉࡀ ࡀࡍࡀࡕࡅࡍ ࡄࡉࡉࡀ ࡀࡍࡀࡕࡅࡍ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀ ࡋࡊࡅࡍ ࡌࡉࡀ ࡁࡕࡀࡅࡓࡏࡉࡋ ࡏࡅࡕࡓࡀ ࡂࡀࡁࡓࡀ ࡖࡄࡅࡀ ࡁࡓ ࡒࡉࡅࡀࡉ ࡁࡓࡀࡉࡅࡍ ࡖࡄࡉࡉࡀ ࡅࡎࡋࡉࡒ ࡌࡍ ࡄࡀࡉࡋࡀ ࡖࡆࡉࡅࡀ ࡁࡓࡉࡔ ࡐࡀࡎࡉࡌࡊࡉࡀ ࡖࡍࡄࡅࡓࡀ ࡌࡉࡀ ࡕࡀࡄࡌࡉࡀ ࡀࡍࡀࡕࡅࡍ ࡎࡉࡀࡅࡉࡀ ࡀࡍࡀࡕࡅࡍ ࡄࡀࡌࡁࡀࡋࡉࡀ ࡀࡍࡀࡕࡅࡍ ࡗ ࡄࡃࡀࡃࡉࡀ ࡀࡍࡀࡕࡅࡍ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡁࡂࡀࡁࡓࡀ ࡆࡀࡃࡉࡒࡀ ࡀࡃࡉࡒ ࡄࡆࡉࡍࡊࡅࡍ ࡌࡍ ࡀࡓࡒࡀ ࡖࡍࡄࡅࡓࡀ ࡅࡍࡄࡅࡓ ࡏࡋࡀࡅࡀࡉࡊࡅࡍ ࡓࡌࡀ ࡅࡊࡀࡍࡐࡉࡍࡉࡍ ࡋࡃࡉࡍࡉࡁࡉࡀࡕࡊࡅࡍ ࡌࡉࡀ ࡎࡉࡀࡅࡉࡀ ࡏࡋࡀࡅࡀࡉࡊࡅࡍ ࡅࡁࡎࡉࡍࡊࡅࡍ ࡅࡁࡀࡋࡎࡉࡍࡅࡍ ࡏࡎࡉࡓࡉࡀ ࡁࡐࡅࡌࡀࡉࡊࡅࡍ ࡅࡌࡎࡀ ࡌࡎࡅࡕࡀ ࡏࡋࡀࡅࡀࡉࡊࡅࡍ ࡅࡍࡂࡀࡃ ࡓࡒࡉࡄࡀ ࡏࡋࡀࡅࡀࡉࡊࡅࡍ ࡅࡌࡎࡀ ࡌࡎࡅࡕࡀ ࡏࡋࡀࡅࡀࡉࡊࡅࡍ ࡅࡌࡎࡀ ࡌࡎࡅࡕࡀ ࡄࡆࡀࡕࡇ ࡐࡕ ࡓࡅࡄࡀ ࡅࡒࡓࡀࡕ ࡁࡒࡀࡋࡇ ࡅࡏࡑࡉࡍࡐࡀࡕ ࡅࡀࡌࡓࡀ ࡀࡁࡂࡀࡍ ࡄࡉࡉࡀ ࡌࡍ ࡂࡀࡁࡓࡀ ࡁࡀࡓࡀࡉࡀ ࡃࡀࡉࡀࡍࡀ ࡐࡀࡓࡅࡔࡀ ࡖࡀࡕࡀ ࡏࡋࡀࡅࡀࡉࡊࡅࡍ ࡕࡅࡌ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡁࡔࡅࡌࡀ ࡖࡉࡅࡊࡀࡁࡀࡓ ࡆࡉࡅࡀ ࡖࡆࡉࡅࡇ ࡋࡁࡉࡔ ࡅࡍࡄࡅࡓࡀ ࡌࡊࡀࡎࡀࡉ ࡄࡀࡉࡋࡇ ࡖࡍࡎࡉࡁ ࡅࡍࡀࡐࡉࡒ ࡒࡅࡃࡀࡌࡇ ࡖࡀࡁࡅࡉࡉࡀ ࡅࡋࡀࡎࡅࡉࡉࡀ ࡊࡅࡋࡄࡅࡍ ࡍࡀࡑࡅࡓࡀࡉࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡅࡁࡀࡎࡉࡌࡉࡀ ࡌࡉࡀ ࡀࡍࡀࡕࡅࡍ ࡄࡉࡉࡀ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡁࡄࡀࡉࡋࡀ ࡓࡁࡀ ࡖࡍࡀࡑࡅࡓࡀࡉࡉࡀ ࡌࡍ ࡌࡀࡃࡍࡀࡄࡀ ࡅࡀࡋࡌࡀ ࡋࡌࡀࡎࡌࡉࡊࡀࡍࡀ ࡅࡌࡍ ࡌࡀࡎࡌࡉࡊࡀࡍࡀ ࡅࡀࡋࡌࡀ ࡋࡌࡀࡃࡍࡀࡄࡀ ࡌࡔࡀࡁࡉࡀ ࡅࡌࡍ ࡌࡉࡀ ࡀࡍࡀࡕࡅࡍ ࡄࡉࡉࡀ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡀࡌࡉࡍࡀࡋࡊࡅࡍ ࡁࡂࡀࡁࡓࡀ ࡓࡁࡀ ࡖࡁࡉࡕ ࡄࡉࡉࡀ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡁࡌࡀࡍࡀ ࡓࡁࡀ ࡖࡄࡕࡉࡌࡁࡇ ࡁࡀࡁࡀ ࡖࡔࡅࡌࡉࡀ ࡅࡀࡓࡒࡀ ࡄࡉࡉࡀ ࡆࡀࡊࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ ࡆࡀࡊࡉࡀ ࡌࡀࡍࡃࡀ ࡖࡄࡉࡉࡀ ࡎࡀ ࡞
ࡀࡍࡀࡕ ࡌࡀࡍࡃࡀ ࡖࡄࡉࡉࡀ ࡁࡓࡉࡊࡀ ࡕࡓࡅࡑ ࡀࡉࡍࡀࡊ ࡋࡄࡀࡋࡉࡍ ࡌࡉࡀ ࡌࡉࡀ ࡀࡍࡀࡕࡅࡍ ࡄࡉࡉࡀ ࡀࡍࡀࡕࡅࡍ ࡏࡓࡉࡀ ࡅࡓࡀࡅࡆࡉࡀ ࡅࡁࡀࡈࡉࡍࡉࡀ ࡅࡉࡀ ࡃࡀࡋࡉࡀ ࡎࡀࡂࡉࡀ ࡅࡌࡉࡍࡉࡄࡓࡉࡀ ࡖࡀࡕࡉࡕࡅࡍ ࡌࡍ ࡏࡋࡀࡅࡉࡀ ࡒࡀࡓࡍࡀࡉࡄࡅࡍ ࡖࡔࡉࡁࡉࡀࡄࡉࡀ ࡅࡌࡍ ࡏࡋࡀࡅࡉࡀ ࡁࡀࡉࡕࡀ ࡅࡆࡀࡅࡀࡉࡀࡕࡀ ࡅࡌࡍ ࡏࡋࡀࡅࡉࡀ ࡃࡀࡅࡓࡀ ࡄࡉࡊࡋࡀ ࡁࡉࡀࡌࡀࡌࡉࡀ ࡖࡀࡕࡀࡉࡕࡅࡍ ࡌࡉࡀ ࡅࡋࡀࡐࡎࡉࡒࡕࡅࡍ ࡅࡁࡈࡅࡓࡉࡀ ࡖࡀࡕࡀࡉࡕࡅࡍ ࡅࡋࡀࡏࡕࡁࡀࡃࡀࡓࡕࡅࡍ ࡋࡐࡀࡂࡓࡀ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡖࡀࡍࡐࡀࡋࡕࡅࡍ ࡌࡉࡀ ࡌࡉࡀ ࡅࡋࡀࡏࡈࡀࡍࡀࡐࡕࡅࡍ ࡌࡀࡍ ࡏࡎࡕࡊࡉࡀ ࡄࡆࡉࡍࡊࡅࡍ ࡁࡉࡔࡀ ࡁࡓ ࡁࡉࡔࡀ ࡖࡋࡀࡈࡀࡁࡋࡇ {{ࡅࡋࡀ^ࡏ^ࡔࡐࡀ}} ࡅࡋࡀࡏࡔࡐࡀࡓࡋࡇ ࡁࡓ ࡊࡀࡍࡀ ࡁࡉࡔࡀ ࡁࡓ ࡏࡅࡑࡀ ࡖࡌࡓࡀࡓࡀ ࡖࡋࡀࡏࡕࡉࡒࡓࡉࡀ ࡋࡏࡅࡄࡓࡀ ࡖࡄࡉࡉࡀ ࡅࡋࡀࡌࡆࡀࡌࡀࡍ ࡋࡔࡁࡉࡋࡀ ࡖࡂࡅࡁࡓࡉࡀ ࡆࡀࡃࡉࡒࡉࡀ ࡍࡐࡀࡒ ࡀࡋࡀࡍࡐࡇ ࡁࡄࡀࡅࡌࡀ ࡅࡓࡅࡂࡆࡀ ࡅࡕࡉࡍࡉࡄࡕࡀ ࡅࡔࡃࡀ ࡏࡃࡇ ࡋࡐࡅࡌࡇ ࡅࡓࡌࡀ ࡊࡀࡁࡃࡇ ࡅࡊࡅࡋࡉࡀࡕࡇ ࡅࡐࡀࡔ ࡊࡀࡁࡃࡇ ࡅࡔࡃࡀ ࡁࡉࡌࡓࡉࡓࡕࡀ ࡐࡀࡔ ࡌࡓࡉࡓࡕࡇ ࡅࡔࡃࡀ ࡁࡊࡀࡁࡃࡀ ࡅࡋࡂࡀࡈ ࡅࡓࡌࡀࡁࡊࡅࡍ ࡎࡉࡍࡀ ࡒࡉࡍࡀ ࡐࡋࡅࡂࡕࡀ ࡏࡄࡀࡁ ࡄࡀࡅࡒࡀ ࡋࡋࡉࡁࡀ ࡏࡄࡀࡁ ࡂࡅࡍࡀࡄࡉࡀ ࡋࡓࡉࡔࡀ ࡑࡉࡑࡋࡉࡀ ࡏࡋ ࡑࡀࡉࡃࡀ ࡅࡁࡉࡓࡅࡒࡕࡀ ࡋࡀࡉࡍࡉࡀ ࡅࡕࡅࡋࡉࡕࡀ ࡋࡊࡀࡊࡉࡀ ࡅࡔࡀࡉࡉࡀ ࡅࡐࡀࡉࡉࡀ ࡋࡊࡅࡋࡄࡅࡍ ࡄࡀࡍࡃࡀࡌࡉࡀ ࡅࡓࡌࡀࡁࡊࡅࡍ ࡏࡔࡀࡕࡀ ࡅࡌࡀࡓࡂࡀࡍࡉࡕࡀ ࡅࡓࡅࡉࡕࡀ ࡄࡀࡓࡔࡉࡀ ࡅࡐࡅࡃࡓࡉࡀ ࡅࡌࡀࡎࡀࡎࡉࡀ ࡅࡌࡀࡋࡅࡀࡈࡉࡀ ࡁࡉࡔࡉࡀ ࡖࡐࡀࡂࡓࡀ ࡅࡀࡉࡍࡀ ࡁࡉࡔࡕࡀ ࡅࡊࡀࡅࡉࡄࡕࡀ ࡅࡋࡅࡈࡀࡕࡀ ࡅࡀࡒࡓࡀࡉࡀࡕࡀ ࡅࡀࡕࡅࡀࡕ ࡖࡌࡄࡀࡌࡁࡀࡋࡀࡕࡀ ࡖࡉࡀࡕࡁࡉࡀ ࡋࡎࡀࡃࡀࡍࡉࡀ ࡏࡐࡉࡊࡉࡀ ࡌࡐࡀࡂࡌࡇ ࡌࡐࡀࡂࡌࡉࡋࡅࡍ ࡅࡌࡑࡀࡋࡐࡉࡋࡅࡍ ࡋࡁࡍࡇ ࡖࡀࡃࡀࡌ ࡌࡍࡀ ࡏࡎࡕࡊࡅࡍ ࡅࡄࡉࡆࡉࡍࡊࡅࡍ ࡕࡋࡀࡕࡀ ࡂࡅࡁࡓࡉࡀ ࡀࡁࡀࡄࡀࡕࡀࡍ ࡔࡀࡋࡌࡀࡍࡉࡀ ࡖࡋࡀࡄࡅࡍ ࡄࡀࡎࡉࡓࡉࡀ ࡉࡀࡕࡉࡓࡉࡀ ࡖࡋࡀࡄࡅࡍ ࡁࡑࡉࡓࡉࡀ ࡖࡃࡀࡁࡓࡉࡀ ࡅࡎࡀࡋࡒࡉࡀ ࡋࡒࡅࡃࡀࡌ ࡄࡉࡉࡀ ࡓࡁࡉࡀ ࡁࡔ ࡊࡉࡍࡀࡕࡅࡍ ࡅࡍࡎࡉࡁ ࡃࡀࡅࡋࡀ ࡄࡉࡅࡀࡓࡀ ࡁࡓ ࡀࡕࡅࡍࡀ ࡖࡋࡀࡌࡔࡀࡓࡀࡉ ࡖࡁࡌࡉࡀ ࡋࡀࡑࡁࡉࡀ ࡅࡏࡋ ࡀࡓࡒࡀ ࡋࡀࡌࡀࡕࡍࡀ ࡅࡍࡎࡉࡁࡋࡅࡍ ࡋࡌࡉࡀ ࡅࡊࡉࡍࡉࡀࡍࡅࡍ ࡅࡓࡀࡌࡉࡋࡅࡍ ࡁࡓࡉࡔࡀ ࡖࡉࡀࡓࡃࡍࡀ ࡅࡉࡀࡓࡃࡍࡀ ࡐࡔࡀࡓ ࡅࡀࡕࡀ ࡅࡁࡓࡉࡔ ࡐࡉࡓࡀ ࡅࡏࡌࡁࡀ ࡅࡏࡋࡀࡍࡀ ࡅࡁࡓࡉࡔ ࡁࡅࡈࡅࡍࡕࡀ ࡅࡌࡀ ࡅࡃࡀࡋࡀ ࡅࡁࡓࡉࡔ ࡎࡉࡁࡓࡀ ࡎࡀࡌࡀ ࡅࡀࡎࡅࡕࡀ ࡖࡀࡕࡀࡉࡕࡅࡍ ࡌࡉࡀ ࡋࡕࡉࡁࡉࡋ ࡅࡔࡕࡁࡀࡉࡕࡅࡍ ࡋࡀࡋࡌࡀ ࡖࡊࡅࡋࡇ ࡌࡀࡅࡃࡀࡋࡀ ࡋࡐࡀࡔࡅࡓࡉࡀ ࡊࡉࡁࡉࡀ ࡅࡋࡃࡀࡋࡅࡉࡉࡀ ࡊࡅࡋࡄࡉࡍ ࡍࡉࡊࡅࡕࡉࡀࡕࡀ ࡅࡋࡌࡉ{ࡊࡀࡐࡀࡓ}<ࡍࡐࡀࡑ> ࡊࡀࡍࡐࡇ ࡌࡍ ࡄࡉࡆࡃࡀ ࡅࡌࡉࡌࡕࡀ ࡒࡅࡌࡕࡇ ࡖࡂࡉࡁࡀ ࡅࡌࡉࡊࡀࡐࡀࡓ ࡀࡉࡍࡇ ࡌࡍ ࡃࡉࡌࡉࡄࡕࡀ ࡅࡋࡌࡉࡎࡀࡌࡅࡒࡉࡀ ࡀࡍࡐࡇ ࡖࡉࡅࡓࡀࡒࡉࡀ ࡅࡋࡌࡉࡔࡀࡓࡅࡉࡉࡀ ࡂࡉࡈࡓࡉࡀ ࡖࡌࡅࡕࡀ ࡅࡕࡀ ࡁࡅࡓࡉࡀ ࡄࡀࡕࡌࡉࡀ ࡖࡄࡔࡅࡊࡀ ࡁࡓࡉࡊ ࡄࡀ ࡉࡋࡀ ࡖࡌࡉࡀ ࡁࡓࡉࡊ ࡕࡀࡂࡀ ࡓࡁࡀ ࡖࡌࡉࡀ ࡁࡓࡉࡊࡀ ࡀࡎࡅࡕࡀ ࡓࡀࡁࡕࡉࡀ ࡖࡌࡉࡀ ࡌࡀࡔ ࡁࡉࡍࡀࡋࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡂࡀࡁࡓࡀ ࡖࡔࡀࡃࡓࡉࡍࡊࡅࡍ ࡌࡍ ࡊࡉࡍࡉࡀࡍࡊࡅࡍ ࡖࡍࡀࡐࡔࡀࡉࡊࡅࡍ ࡅࡐࡀࡋࡂࡉࡍࡊࡅࡍ ࡁࡍࡀࡄࡋࡉࡀ ࡆࡀࡁࡉࡀ ࡅࡀࡉࡍࡀࡍࡉࡀࡕࡀ ࡁࡌࡃࡉࡍࡀࡕ ࡏࡅࡕࡓࡉࡀ ࡁࡀࡓࡒࡀ ࡄࡉࡅࡀࡓࡕࡉࡀ ࡅࡁࡃࡀࡅࡓࡀ ࡖࡓࡅࡓࡁࡉࡀ ࡖࡁࡂࡀࡅࡀࡉࡄࡅࡍ ࡒࡀࡉࡌࡉࡀ ࡄࡅࡃࡀࡉࡉࡀ ࡉࡀࡕࡁࡉࡀ ࡎࡌࡀࡋࡀ ࡁࡓ ࡀࡉࡀࡓ ࡁࡀࡓࡀࡉࡀ ࡅࡃࡀࡅࡓࡀ ࡕࡀࡒࡍࡀ ࡀࡍࡀࡕࡅࡍ ࡌࡉࡀ ࡕࡉࡄࡅࡍ ࡎࡉࡊࡉࡍࡉࡀ ࡎࡒࡉࡋࡀࡕࡀ ࡅࡏࡑࡈࡌࡅࡌࡉࡀ ࡅࡀࡊࡋࡉࡀ ࡖࡐࡀࡓࡆࡋࡀ ࡏࡋ ࡎࡀࡄࡓࡉࡀ ࡅࡍࡉࡒࡁࡀ ࡓࡁࡀ ࡖࡂࡋࡀࡋࡀ ࡏࡋ ࡃࡀࡉࡅࡉࡀ ࡅࡋࡉࡋࡉࡀࡕࡀ ࡄࡅࡌࡓࡉࡀ ࡁࡉࡔࡀࡕࡀ ࡅࡕࡉࡄࡅࡉࡋࡇ ࡋࡄࡀࡆࡉࡍ ࡍࡉࡔࡉࡌࡕࡀ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡄࡉࡓࡁࡀ ࡅࡎࡉࡌࡀࡊࡉࡀ ࡅࡌࡐࡀࡓࡒࡀࡍࡉࡀ ࡕࡉࡐࡀࡓࡒࡇ ࡅࡕࡀࡐࡒࡇ ࡌࡍ ࡀࡕࡅࡕࡉࡀ ࡀࡎࡀࡓ ࡏࡃࡀࡉࡄࡅࡍ ࡖࡁࡉࡔࡉࡀ ࡅࡌࡍ ࡀࡕࡅࡕࡉࡀ ࡈࡅࡐࡓࡀࡉࡄࡅࡍ ࡖࡂࡅࡁࡓࡉࡀ ࡌࡄࡀࡔࡀࡁࡀࡍࡉࡀ ࡅࡌࡍ ࡓࡀࡆࡀ ࡅࡓࡉࡌࡆࡀ ࡅࡀ ࡓࡆࡀࡁࡀࡍࡉࡀ ࡖࡁࡀࡉࡕࡀ ࡅࡌࡍ ࡀࡓࡊࡅࡍࡉࡀ ࡖࡌࡓࡀࡓࡀ ࡕࡀࡐࡒࡅࡍࡇ ࡅࡕࡀࡓࡌࡅࡍࡇ ࡏࡋ ࡏࡑࡈࡅࡍࡇ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡁࡀࡕࡓࡀ ࡖࡔࡓࡀࡓࡀ ࡄࡉࡉࡀ ࡆࡀࡊࡉࡍ ࡎࡀ ࡞
ࡉࡀࡅࡀࡓ ࡁࡄࡉࡌࡀࡕ ࡆࡉࡅࡇ ࡐࡉࡓࡔࡀࡕ ࡍࡉࡑࡅࡁࡕࡀ ࡁࡉࡊࡉࡎࡉࡀ ࡄࡅࡀࡕ ࡋࡀࡅࡐࡀ ࡏࡋ ࡌࡉࡀ ࡀࡍࡀࡕࡅࡍ ࡄࡉࡉࡀ ࡀࡍࡀࡕࡅࡍ ࡀࡁࡀࡃ ࡅࡊࡔࡀࡓ ࡔࡅࡌࡀࡉࡊࡅࡍ ࡐࡉࡓࡉࡀࡅࡉࡎ ࡒࡀࡓࡉࡋࡊࡅࡍ ࡌࡍ ࡏࡅࡑࡓࡉࡀ ࡖࡆࡉࡅࡀ ࡄࡅࡀࡉࡕࡅࡍ ࡅࡌࡍ ࡌࡀࡌࡁࡅࡂࡉࡀ ࡓࡅࡓࡁࡉࡀ ࡖࡍࡄࡅࡓࡀ ࡏࡔࡕࡀࡐࡀࡉࡕࡅࡍ ࡌࡍ ࡄࡀࡉࡋࡀࡉࡊࡅࡍ ࡁࡂࡉࡓࡌࡀࡉࡍ ࡅࡌࡍ ࡕࡅࡒࡐࡀࡉࡊࡅࡍ ࡁࡄࡀࡍࡃࡀࡌࡀࡍ ࡅࡌࡍ ࡆࡉࡅࡀࡉࡊࡅࡍ ࡁࡀࡍࡐࡀࡍ ࡅࡌࡍ ࡍࡄࡅࡓࡀࡉࡊࡅࡍ ࡁࡀࡉࡍࡀࡍ ࡅࡌࡍ ࡕࡅࡒࡐࡀࡉࡊࡅࡍ ࡁࡌࡀࡍࡀࡍ ࡅࡌࡍ ࡁࡅࡎࡌࡀࡉࡊࡅࡍ ࡁࡐࡅࡌࡀࡍ ࡅࡌࡍ ࡎࡉࡂࡉࡀࡉࡊࡅࡍ ࡁࡋࡉࡂࡓࡀࡉ ࡄࡁࡅࡋࡉࡀ ࡄࡆࡉࡕࡀ ࡋࡀࡉࡍࡀࡉ ࡅࡋࡄࡀࡆࡀ ࡍࡉࡔࡉࡌࡕࡀࡉ ࡅࡐࡀࡂࡓࡀࡉ ࡃࡉࡋࡉࡀ ࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡅࡌࡀࡋࡀࡋࡀ ࡋࡏࡅࡎ{{}}<<ࡐ>>ࡀࡉ ࡅࡀࡃࡓࡀࡊࡕࡀ ࡏࡋ ࡋࡉࡂࡓࡀࡉ ࡄࡀࡉࡋࡀ ࡋࡋࡉࡂࡓࡀࡉ ࡄࡀࡉࡋࡀ ࡏࡋ ࡒࡅࡌࡕࡀࡉ ࡕࡓࡅࡑ ࡋࡉࡁࡀࡊ ࡋࡋࡉࡁࡀࡉ ࡅࡁࡀࡋࡀࡊ ࡋࡁࡀࡋࡀࡉ ࡅࡕࡓࡅࡑ ࡋࡉࡁࡀࡊ ࡁࡀࡕࡓࡇ ࡅࡕࡉࡄࡀࡊ ࡁࡃࡅࡊࡕࡇ ࡖࡏࡆࡉࡁ ࡅࡃࡌࡉࡈࡀࡍࡀࡐ ࡍࡉࡔࡕࡓࡉࡀ ࡍࡉࡔࡕࡓࡉࡀ ࡅࡃࡌࡉࡈࡀࡍࡀࡐ ࡍࡉࡃࡀࡊࡉࡀ ࡅࡈࡉࡔࡉࡈࡅࡉࡀ ࡍࡀࡅࡒࡓࡅࡉࡀ ࡅࡃࡎࡀࡍࡉࡋࡇ ࡍࡉࡓࡉࡄࡌࡅࡉࡀ ࡅࡁࡀࡁࡀ ࡖ ࡓࡀࡄࡌࡉࡀ ࡍࡉࡐࡕࡅࡋࡇ ࡏࡋ ࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡁࡔࡅࡌࡀࡊ ࡌࡀࡍࡃࡀ ࡖࡄࡉࡉࡀ ࡌࡀࡓࡀࡉࡄࡅࡍ ࡖࡀࡎࡀࡅࡀࡕࡀ ࡍࡉࡄࡅࡉࡋࡇ ࡀࡍࡐࡉࡀ ࡔࡀࡐࡉࡓࡉࡀ ࡅࡐࡀࡓࡑࡅࡐࡉࡀ ࡓࡀࡅࡆࡉࡀ ࡍࡉࡄࡅࡉࡋࡉࡀ ࡋࡃࡉࡋࡉࡀ ࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡁࡀࡍࡐࡉࡀ ࡔࡅࡌࡉࡀ ࡅࡀࡓࡒࡀ ࡅࡁࡀࡍࡐࡉࡀ ࡔࡀࡌࡉࡔ ࡅࡎࡉࡓࡀ ࡅࡁࡀࡍࡐࡉࡀ ࡉࡀࡌࡀ ࡅࡕࡓࡉࡍ ࡊࡉࡐࡇ ࡖࡉࡀࡌࡇ ࡅࡁࡀࡍࡐࡉࡀ ࡌࡋࡀࡊࡉࡀ ࡅࡔࡀࡄࡀࡓࡉࡀࡋࡉࡀ ࡅࡔࡅࡋࡈࡀࡍࡉࡀ ࡅࡁࡀࡍࡐࡉࡀ ࡄࡀࡆࡀࡉࡀ ࡅࡌࡀࡄࡆࡀࡉࡀ ࡅࡁࡀࡍࡐࡉࡀ ࡀࡍࡀࡔࡉࡀ ࡖࡄࡀࡆࡉࡋࡉࡀ ࡍࡉࡓࡉࡄࡌࡅࡍ ࡅࡍࡉࡔࡀࡁࡅࡉࡀ ࡅࡍࡉࡔࡀࡁࡀ ࡁࡂࡀࡁࡀࡓࡅࡀࡕࡀ ࡖࡀࡁࡀࡄࡀࡕࡀࡍ ࡅࡌࡀࡍࡃࡀ ࡖࡄࡉࡉࡀ ࡋࡃࡀࡓࡃࡀࡓࡉࡀ ࡅࡋࡀࡋࡀࡌ ࡀࡋࡌࡉࡀ ࡄࡉࡉࡀ ࡆࡀࡊࡏࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ ࡅࡌࡀࡍࡃࡀ ࡖࡄࡉࡉࡀ ࡁࡆࡀࡊࡅࡀࡕࡀ ࡍࡉࡒࡀࡉࡉࡌ ࡎࡀ ࡞
ࡉࡅࡓ ࡁࡄࡉࡌࡀࡕ ࡆࡉࡅࡀ ࡐࡉࡓࡔࡀࡕ ࡌࡉࡀ ࡀࡍࡀࡕࡅࡍ ࡄࡉࡉࡀ ࡀࡍࡀࡕࡅࡍ ࡀࡁࡀࡃ ࡅࡊࡔࡀࡓ ࡔࡅࡌࡀࡉࡊࡅࡍ ࡐࡉࡓࡉࡀࡅࡉࡎ ࡒࡀࡓࡉࡋࡊࡅࡍ ࡌࡍ ࡄࡀࡉࡋࡀࡉࡊࡅࡍ ࡁࡂࡉࡓࡌࡀࡍ ࡅࡌࡍ ࡕࡅࡒࡐࡀࡉࡊࡅࡍ ࡁࡄࡀࡍࡃࡀࡌࡀࡍ ࡅࡌࡍ ࡆࡉࡅࡀࡉࡊࡅࡍ ࡁࡀࡍࡐࡀࡍ ࡅࡌࡍ ࡍࡄࡅࡓࡀࡉࡊࡅࡍ ࡁࡀࡉࡍࡀࡍ ࡅࡌࡍ ࡎࡉࡂࡉࡀࡉࡊࡅࡍ ࡁࡋࡉࡂࡓࡀࡍ ࡀࡍࡀࡕࡅࡍ ࡌࡉࡀ ࡄࡉࡉࡀ ࡖࡏࡋࡀࡅࡉࡀ ࡅࡀࡍࡄࡀࡓࡅࡋࡉࡀ ࡋࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡁࡀࡍࡐࡉࡀ ࡄࡀࡆࡉࡀࡉ ࡅࡌࡀࡄࡆࡉࡀࡉ ࡍࡉࡉࡅࡋ ࡁࡆࡉࡅࡀࡉࡊࡅࡍ ࡅࡍࡉࡐࡅࡒ ࡁࡀࡍࡄࡅࡓࡀࡉࡊࡅࡍ ࡅࡍࡉࡒࡅࡌ ࡁࡄࡀࡉࡋࡀࡉࡊࡅࡍ ࡍࡉࡔࡁࡅࡒࡋࡀࡍ ࡄࡀࡈࡀࡉࡀࡍ ࡅࡄࡀࡅࡁࡀࡍ ࡅࡎࡊࡉࡋࡀࡕࡀࡍ ࡅࡕࡉࡒࡀࡋࡀࡕࡀࡍ ࡅࡔࡀ ࡁࡀࡔࡀࡕࡀࡍ ࡃࡅࡊࡕࡀ ࡖࡌࡋࡀࡊࡉࡀ ࡀࡍࡀࡕࡅࡍ ࡄࡉࡉࡀ ࡕࡉࡆࡀࡋ ࡕࡉࡆࡋࡅࡍ ࡅࡕࡉࡐࡋࡅࡍ ࡅࡕࡉࡄࡅࡍ ࡀࡎࡅࡕࡀ ࡖࡓࡁࡀ ࡅࡋࡀࡆࡅࡈࡀ ࡅࡄࡉࡉࡀ ࡆࡀࡊࡉࡍ ࡎࡀ ࡞
ࡉࡅࡓ ࡁࡄࡉࡌࡀࡕ ࡆࡉࡅࡀ ࡐࡉࡓࡔࡀࡕ ࡅࡍࡉࡑࡅࡁࡕࡀ ࡁࡊࡉࡎࡉࡀ ࡄࡅࡀ ࡋࡀࡅࡐࡀ ࡋࡌࡉࡀ ࡀࡍࡀࡕࡅࡍ ࡄࡉࡉࡀ ࡀࡍࡀࡕࡅࡍ ࡀࡁࡀࡃ ࡅࡊࡔࡀࡓ ࡔࡅࡌࡀࡉࡊࡅࡍ ࡌࡍ ࡏࡅࡑࡓࡉࡀ ࡖࡆࡉࡅࡀ ࡄࡅࡀࡉࡕࡅࡍ ࡏࡅ ࡌࡍ ࡐࡉࡓࡉࡀࡅࡉࡎ ࡒࡓࡉࡍࡀࡋࡊࡅࡍ ࡌࡍ ࡌࡀࡌࡁࡅࡂࡉࡀ ࡓࡅࡓࡁࡉࡀ ࡖࡍࡄࡅࡓࡀ ࡄࡅࡀࡉࡕࡅࡍ ࡅࡌࡍ ࡄࡀࡉࡋࡀࡉࡊࡅࡍ ࡁࡂࡉࡓࡌࡀ ࡖࡄࡀࡆࡀ ࡍࡉࡔࡉࡌࡕࡀࡉ ࡃࡉࡋࡉࡀ ࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡌࡍ ࡆࡉࡅࡀࡉࡊࡅࡍ ࡁࡀࡍࡐࡀࡉ ࡅࡌࡍ ࡍࡄࡅࡓࡀࡉࡊࡅࡍ ࡁࡀࡉࡍࡀࡉ ࡅࡌࡍ ࡎࡉࡂࡉࡀࡉࡊࡅࡍ ࡁࡋࡉࡂࡓࡀࡉ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡖࡄࡀࡆࡉࡍ ࡏࡑࡈࡅࡍࡀ ࡄࡉࡊࡋࡀ ࡖࡀࡆࡋࡉࡕࡅࡋࡇ ࡕࡉࡄࡅࡍ ࡀࡊࡋࡀ ࡖࡐࡀࡓࡆࡋࡀ ࡅࡍࡀࡓࡂࡉࡀ ࡓࡅࡓࡁࡉࡀ ࡖࡔࡉࡓࡉࡀࡕࡀ ࡋࡆࡉࡓࡇ ࡖࡔࡉࡃࡉࡀ ࡅࡋࡁࡀࡆࡉࡓࡀ ࡓࡁࡀ ࡖࡋࡉࡋࡉࡀࡕࡀ ࡖ ࡕࡉࡔࡉࡌࡕࡅࡍ ࡅࡕࡉࡐࡉࡎࡒࡅࡍ ࡅࡕࡀࡆࡉࡄࡅࡍ ࡅࡕࡉࡔࡉࡒࡋࡅࡍ ࡑࡉࡑࡋࡉࡀ ࡌࡍ ࡑࡀࡉࡃࡀ ࡖ ࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡂࡅࡍࡀࡄࡀ ࡌࡍ ࡓࡉࡔࡉࡀ ࡅࡁࡉࡓࡅࡒࡕࡀ ࡌࡍ ࡀࡉࡍࡇ ࡅࡔࡀࡌࡓࡉࡓࡉࡀ ࡌࡍ ࡍࡄࡉࡓࡇ ࡅࡔࡀࡍࡂࡃࡉࡀ ࡌࡍ ࡀࡐࡒࡅࡕࡇ ࡅࡃࡉࡁࡒࡀ ࡅࡌࡉࡓࡎࡀ ࡅࡌࡉࡓࡕࡀ ࡌࡍ ࡐࡅࡌࡇ ࡖࡒࡅࡓࡒࡁࡀࡍࡇ ࡅࡔࡀࡄࡀࡉࡕࡀ ࡅࡂࡀࡈࡀࡐࡕࡀ ࡌࡍ ࡊࡅࡋࡄࡅࡍ ࡄࡉࡍࡃࡀࡌࡉࡀ ࡖࡐࡀࡂࡓࡀ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡅࡌࡀࡅࡌࡉࡍࡀࡋࡊࡅࡍ ࡅࡌࡔࡀࡁࡉࡍࡀࡋࡊࡅࡍ ࡌࡉࡀ ࡁࡐࡉࡓࡅࡍ ࡏࡅࡕࡓࡀ ࡖࡒࡀࡉࡉࡌ ࡋࡐࡅࡌࡀࡉࡄࡅࡍ ࡖࡆࡀࡁࡉࡀ ࡅࡌࡉࡑࡀࡓࡋࡊࡅࡍ ࡌࡉࡑࡓࡀ ࡅࡊࡉࡐࡇ ࡖࡉࡀࡓࡃࡍࡀ ࡅࡏࡋ ࡊࡀࡍࡀ ࡓࡁࡀ ࡖࡀࡎࡀࡅࡀࡕࡀ ࡄࡀࡆࡉࡍ {ࡄࡉ}<ࡀ>ࡊࡋࡀ ࡖࡐࡀࡓࡆࡋࡀ ࡅࡍࡀࡓࡂࡀ ࡓࡁࡀ ࡖࡔ^ࡉ^ࡓࡉ^ࡀ^ࡕࡀ ࡕࡉࡌࡄࡅࡍ ࡅࡕࡉࡐࡒࡅࡍ ࡅࡕࡀࡆࡉࡄࡅࡍ ࡅࡕࡉࡔࡉࡌࡕࡅࡍ ࡅࡕࡉࡔࡉࡒࡋࡅࡍ ࡊࡅࡋࡄࡅࡍ ࡊࡅࡄࡓࡀࡍࡉࡀ ࡅࡍࡉࡄࡅࡍ ࡀࡊࡋࡉࡀ ࡓࡅࡓࡁࡉࡀ ࡖࡔࡉࡓࡉࡀࡕࡀ ࡕࡉ<ࡌ>ࡄࡅࡍ ࡅࡕࡉࡐࡒࡅࡍ ࡅࡕࡀࡆࡉࡄࡅࡍ ࡅࡕࡉࡔࡉࡌࡕࡅࡍ ࡊࡅࡋࡄࡅࡍ ࡊࡅࡄࡓࡀࡍࡉࡀ ࡅࡊࡉࡁࡉࡀ ࡅࡍࡉࡄࡅࡍ ࡀࡊࡋࡉࡀ ࡓࡅࡓࡁࡉࡀ ࡖࡐࡀࡓࡆࡋࡀ ࡅࡍࡀࡓࡂࡉࡀ ࡓࡅࡓࡁࡉࡀ ࡖࡔࡉࡓࡉࡀࡕࡀ ࡋࡆࡉࡓࡀ ࡖࡔࡉࡃࡉࡀ ࡅࡋࡁࡀࡆࡉࡓࡀ ࡖࡋࡉࡋࡉࡀࡕࡀ ࡅࡋࡄࡉࡍࡂࡉࡀ ࡎࡀࡉࡍࡉࡀ ࡅࡋࡄࡀࡓࡔࡉࡀ ࡁࡉࡔࡉࡀ ࡅࡋࡂࡃࡅࡋࡉࡀ ࡁࡀࡈࡋࡉࡀ ࡅࡋࡎࡀࡃࡀࡍࡉࡀ ࡏࡐࡉࡊࡉࡀ ࡅࡋࡃࡌࡀࡅࡀࡕࡀ ࡖࡄࡔࡅࡊࡀ ࡅࡀࡎࡅࡕࡀ ࡕࡉࡄࡅࡉࡋࡇ ࡋࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡄࡕࡉࡌࡉࡕࡅࡍ ࡌࡉࡀ ࡅࡌࡄࡀࡕࡌࡉࡕࡅࡍ ࡌࡉࡀ ࡁࡄࡀࡄࡅ ࡂࡉࡋ ࡂࡉࡋ ࡏࡅࡕࡓࡀ ࡃࡀࡉࡀࡍࡀ ࡌࡀࡍࡀ ࡓࡁࡀ ࡓࡉࡔࡀࡉࡀ ࡖࡄࡕࡉࡌࡁࡇ ࡔࡅࡌࡉࡀ ࡅࡀࡓࡒࡀ ࡅࡀࡎࡅࡕࡀ ࡕࡉࡄࡅࡉࡋࡇ ࡋࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡅࡄࡉࡉࡀ ࡆࡀࡊࡉࡍ ࡎࡀ ࡞
ࡄࡀࡆࡉࡍ ࡐࡅࡂࡃࡀࡌࡀ ࡎࡀࡁ ࡊࡅࡆࡀ ࡄࡉࡅ<ࡓ>ࡀ ࡁࡓ ࡀࡕࡅࡍࡀ ࡖࡋࡀࡌࡔࡀࡓࡀࡉ ࡅࡂࡓࡅࡐ ࡌࡉࡀ ࡖࡎࡀࡂࡉࡍ ࡌࡍ ࡉࡀࡓࡃࡍࡀ ࡅࡒࡓࡉࡀ ࡏࡋࡇ ࡅࡈࡓࡉࡋࡇ ࡋࡌࡀࡍ ࡖࡄࡈࡉࡌ ࡅࡈࡓࡉࡋࡇ ࡕࡋࡀࡕࡀ ࡆࡉࡁࡍࡉࡀ ࡁࡀࡍࡐࡇ ࡅࡁࡇ ࡓࡀࡈࡉࡍ ࡄࡀࡅࡉࡀ ࡀࡎࡅࡕࡀ ࡎࡀ ࡞
ࡔࡅࡌ ࡌࡉࡀ ࡀࡌࡉࡍ ࡌࡉࡀ ࡍࡉࡔࡀࡓ ࡌࡉࡀ ࡀࡁࡀࡃ ࡅࡊࡔࡀࡓ ࡌࡉࡀ ࡀࡌࡉࡍ ࡌࡉࡀ ࡌࡉࡐࡉࡋ ࡌࡉࡀ ࡄࡉࡉࡀ ࡋࡐࡅࡌࡇ ࡖࡂࡀࡁࡓࡀ ࡆࡀࡃࡉࡒࡀ ࡍࡉࡐࡋࡅࡍ ࡋࡍࡅࡓࡀ ࡖࡏࡕࡋࡇ ࡁࡋࡉࡁࡇ ࡅࡀࡕࡅࡕࡉࡀ ࡏࡒࡁࡇ ࡖࡋࡉࡔࡀࡍࡇ ࡅࡋࡌࡄࡀࡔࡀࡁࡀࡕࡀ ࡁࡉࡔࡀࡕࡀ ࡖࡔࡓࡉࡋࡇ ࡁࡋࡉࡁࡇ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡅࡋࡀࡍࡀࡔࡉࡀ ࡖࡂࡍࡏࡉࡉࡀ ࡅࡃࡉࡀࡕࡁࡉࡀ ࡅࡃࡀࡕࡉࡍ ࡋࡒࡅࡃࡀࡌࡇ ࡄࡃࡀࡓ ࡄࡅࡃࡓࡀࡍࡀ ࡅࡕࡉࡃࡀࡊ ࡍࡅࡓࡀ ࡖࡁࡉࡔࡉࡀ ࡅࡀࡎࡅࡕࡀ ࡕࡉࡄࡅࡉࡋࡇ ࡏࡋ ࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡅࡄࡉࡉࡀ ࡆࡀࡊࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ ࡎࡀ ࡞
ࡏࡋ ࡐࡅࡌࡀ ࡖࡁࡉࡔࡉࡀ ࡍࡅࡓࡀ ࡅࡋࡐࡅࡌࡀࡉ ࡃࡉࡋࡉࡀ ࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡍࡄࡅࡓࡀ ࡅࡈࡀࡁࡅࡕࡀ ࡅࡆࡀࡊࡅࡕࡀ ࡔࡓࡉࡍ ࡌࡉࡀ ࡐࡉࡔࡓࡅࡍ ࡐࡉࡓࡉࡀࡅࡉࡎ ࡉࡀࡓࡃࡍࡀ ࡖࡌࡉࡀ ࡉࡅࡔࡀࡌࡉࡍ ࡍࡉࡑࡅࡁࡕࡀ ࡖࡌࡉࡀ ࡄࡉࡉࡀ ࡏࡋ ࡐࡅࡌ ࡖࡁࡉࡔࡉࡀ ࡍࡅࡓࡀ ࡅࡍࡅࡓࡀ ࡖࡁࡉࡔࡉࡀ ࡕࡉࡃࡅࡊ ࡅࡍࡉࡕࡓࡀࡄࡒࡅࡍ ࡖࡉࡀࡕࡁࡉࡀ ࡕࡀࡅࡌࡉࡀ ࡖࡓࡅࡄࡀ ࡅࡍࡉࡁࡈࡀࡋ ࡓࡀࡆࡀࡉࡄࡅࡍ ࡖࡁࡉࡔࡉࡀ ࡅࡔࡉࡁࡉࡀࡄࡉࡀ ࡅࡊࡅࡋࡄࡅࡍ ࡏࡅࡁࡀࡃࡉࡀ ࡎࡀ ࡞
ࡌࡉࡀ ࡀࡍࡀࡕࡅࡍ ࡄࡉࡉࡀ ࡀࡍࡀࡕࡅࡍ ࡌࡍ ࡀࡕࡓࡀ ࡖࡍࡐࡉࡔ ࡀࡕࡀࡉࡕࡅࡍ ࡅࡌࡍ ࡁࡉࡕ ࡄࡉࡉࡀ ࡀࡔࡕࡀࡐࡀࡉࡕࡅࡍ ࡋࡌࡉࡆࡀࡋ ࡋࡐࡅࡌࡇ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡕࡉࡐࡉࡔࡓࡅࡍ ࡅࡕࡉࡐࡒࡅࡍ ࡌࡉࡍࡇ ࡅࡕࡉࡃࡀࡄࡊࡅࡍ ࡍࡅࡓࡀ ࡅࡕࡉࡄࡅࡉࡋࡉࡀ ࡀࡎࡅࡕࡀ ࡋࡃࡉࡋࡉࡀ ࡅࡍࡉࡕࡀࡎࡉࡀ ࡅࡍࡉࡃࡀࡋࡉࡀ ࡄࡀࡆࡉࡍ ࡐࡀࡂࡓࡀ ࡖࡀࡆࡋࡉࡕࡅࡋࡇ ࡅࡀࡎࡅࡕࡀ ࡕࡉࡄࡅࡉࡋࡇ ࡋࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡌࡍ ࡄࡉࡉࡀ ࡄࡉࡉࡀ ࡆࡀࡊࡉࡍ ࡎࡀ ࡞
ࡏࡋࡀࡊ ࡁࡔࡅࡌࡀࡊ ࡒࡓࡀࡉࡕࡀࡊ ࡔࡕࡉࡀࡌࡀ ࡓࡁࡀ ࡖࡌࡉࡀ ࡄࡉࡉࡀ ࡂࡀࡍࡆࡉࡁࡓࡀ ^ࡖࡏࡅࡕࡓࡉࡀ^ ࡁࡍࡉࡀ ࡍࡄࡅࡓࡀ ࡎࡀࡁ ࡃࡀࡅࡋࡀ ࡄࡉࡅࡀࡓࡀ ࡖࡋࡀࡌࡔࡀࡓࡀࡉ ࡅࡀࡄࡁࡀࡋࡉࡀ ࡖࡏࡐࡔࡀࡓ ࡃࡀࡅࡋࡀ ࡖࡌࡉࡀ ࡌࡍ ࡉࡀࡓࡃࡍࡀ ࡖࡀࡎࡀࡅࡀࡕࡀ ࡅࡌࡃࡅࡋࡉࡀ ࡈࡀࡁࡀ ࡖࡀࡎࡉࡌ ࡀࡎࡉࡀ ࡖࡌࡉࡀ ࡅࡌࡃࡅࡋࡉࡀࡄࡅࡍ ࡖࡌࡃࡀࡋࡀࡅࡀࡕࡀ ࡄࡅࡀ ࡔࡀࡓࡉࡀ ࡏࡋࡀࡊ ࡉࡀࡓࡃࡍࡀ ࡋࡀࡎࡅࡕࡀ ࡖࡏࡅࡕࡓࡉࡀ ࡋࡍࡉࡔࡉࡌࡕࡀ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡌࡍ ࡄࡀࡓࡔࡉࡀ ࡅࡄࡉࡉࡀ ࡆࡀࡊࡏࡉࡍ ࡎࡀ ࡞
ࡌࡔࡀࡁࡉࡕ ࡀࡁ ࡌࡉࡀ ࡅࡌࡔࡀࡁࡉࡕ ࡆࡉࡅࡀ ࡓࡁࡀ ࡖࡌࡉࡀ ࡖࡋࡀࡁࡀࡈࡉࡋ ࡅࡌࡔࡀࡁࡉࡕ ࡍࡄࡅࡓࡀ ࡓࡁࡀ ࡖࡌࡉࡀ ࡖࡋࡀࡌࡉࡔࡕࡀࡍࡉࡀ ࡅࡌࡔࡀࡁࡉࡕ ࡀࡃࡉࡀࡅࡓࡀ ࡖࡌࡉࡀ ࡅࡌࡔࡀ ࡁࡉࡕ ࡏࡌࡓࡀ ࡅࡔࡉࡌࡀ ࡖࡌࡉࡀ ࡅࡌࡔࡀ ࡁࡉࡕ ࡀࡃࡉࡀࡅࡓࡀ ࡅࡓࡅࡀࡄࡀ ࡖࡌࡉࡀ ࡌࡔࡀࡁࡉࡕࡅࡍ ࡏࡑࡈࡋࡉࡀ ࡖࡆࡉࡅࡀ ࡅࡈࡀࡓࡈࡀࡁࡅࡍࡉࡀ ࡈࡀࡁࡉࡀ ࡃࡀࡊࡉࡉࡀ ࡖࡍࡄࡅࡓࡀ ࡖࡌࡉࡀ ࡌࡔࡀࡁࡉࡕࡅࡍ ࡊࡋࡉࡋࡉࡀ ࡊࡋࡉࡋ ࡆࡀࡊࡀࡅࡀࡕࡀ ࡖࡌࡉࡀ ࡁࡓࡉࡊ ࡔࡅࡌࡀࡊ ࡅࡌࡔࡀࡁࡀ ࡔࡅࡌࡀࡊ ࡂࡀࡁࡓࡀ ࡖࡒࡀࡋࡀ ࡒࡓࡀ ࡁࡂࡅ ࡌࡉࡀ ࡅࡔࡊࡉࡍࡕࡇ ࡔࡊࡀࡍ ࡁࡂࡅ ࡌࡉࡀ ࡐࡓࡀࡔ ࡐࡓࡀࡔࡀ ࡁࡂࡅ ࡌࡉࡀ ࡐࡔࡀࡓ ࡐࡉࡔࡓࡀ ࡖࡐࡔࡀࡓ ࡏࡅࡕࡓࡉࡀ ࡀࡁࡍࡉࡀ ࡍࡄࡅࡓࡀ ࡅࡁࡍࡉࡀ ࡁࡉࡍࡉࡀࡍࡀ ࡖࡓࡅࡓࡁࡉࡀ ࡉࡀࡕࡁࡉࡀ ࡏࡒࡀࡓࡀ ࡁࡔࡊࡉࡍࡀࡕࡅࡍ ࡌࡉࡀ ࡀࡍࡀࡕࡅࡍ ࡄࡉࡉࡀ ࡀࡊࡋࡉࡀ ࡄࡃࡀࡃࡉࡀ ࡀࡍࡀࡕࡅࡍ ࡄࡁࡅࡋࡉࡀ ࡃࡀࡅࡋࡀ ࡖࡌࡉࡀ ࡄࡉࡅࡀࡓࡀ ࡁࡉࡋࡅࡓࡉࡀ ࡍࡑࡉࡁࡉࡀ ࡏࡕࡉࡕࡉࡀ ࡅࡕࡅࡔࡋࡌࡉࡀ ࡄࡉࡉࡀ ࡃࡀࡊࡉࡉࡀ ࡅࡒࡀࡉࡀࡌࡉࡀ ࡖࡀࡕࡉࡅࡉࡀ ࡋࡏࡉࡋ ࡋࡏࡉࡋ ࡅࡌࡍ ࡏࡋࡀࡅࡉࡀ ࡃࡀࡅࡓࡀ ࡄࡉࡊࡋࡀ ࡀࡕࡀࡉࡕࡅࡍ ࡌࡍ ࡈࡅࡓࡉࡀ ࡖࡏࡋࡀࡅࡉࡀ ࡈࡅࡓࡉࡀ ࡅࡌࡍ ࡀࡓࡀࡌࡀࡕࡀ ࡖࡏࡋࡀࡅࡉࡀ ࡀࡓࡀࡌࡀࡕࡀ ࡅࡌࡍ ࡐࡀࡒࡀࡕࡀ ࡖࡏࡋࡀࡅࡉࡀ ࡐࡀࡒࡀࡕࡀ ࡀࡍࡀࡕࡅࡍ ࡌࡉࡀ ࡖ ࡁࡈࡅࡓࡉࡀ ࡖࡀࡕࡀࡉࡕࡅࡍ ࡅࡁࡀࡓࡀࡌࡀࡕࡀ ࡖࡋࡀ ࡏࡕࡁࡀࡃࡀࡓࡕࡅࡍ ࡋࡐࡀࡂࡓࡇ ࡅࡍࡉࡔࡉࡌࡕࡇ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡁࡅࡊࡓࡀ ࡒࡀࡃࡌࡀࡉࡀ ࡍࡐࡀࡋࡕࡅࡍ ࡅࡋࡀ ࡏࡈࡀࡍࡀࡐࡕࡅࡍ ࡁࡉࡔࡀ ࡁࡓ ࡁࡉࡔࡀ ࡖࡄࡆࡉࡍࡊࡅࡍ ࡁࡓ ࡊࡀࡍࡀ ࡖࡄࡔࡅࡊࡀ ࡁࡓ ࡄࡀࡈࡉࡀ ࡖࡋࡀࡏࡕࡉ ࡒࡓࡉࡀ ࡋࡏࡅࡄࡓࡀ ࡖࡄࡉࡉࡀ ࡅࡋࡀࡌࡆࡀࡌࡀࡍ ࡋࡔࡁࡉࡋࡀ ࡖࡂࡅࡁࡓࡉࡀ ࡆࡀࡃࡉࡒࡉࡀ ࡅࡔࡃࡀ ࡏࡃࡇ ࡋࡐࡅࡌࡇ ࡅࡓࡀࡒ ࡓࡅࡒࡀ ࡖࡌࡉࡓࡕࡀ ࡅࡓࡌࡀࡁࡊࡅࡍ ࡔࡕࡐࡉࡋ ࡅࡍࡐࡀࡋ ࡏࡋࡀࡅࡀࡉࡊࡅࡍ ࡊࡉࡁࡉࡀ ࡔࡉࡁࡈࡉࡀ ࡓࡉࡃࡉࡀ ࡅࡓࡅࡌࡀࡉࡉࡀ ࡅࡌࡀࡋࡅࡀࡈࡉࡀ ࡖࡔࡓࡏࡉࡀ ࡁࡐࡀࡂࡓࡉࡀ ࡀࡉࡍࡀࡉࡄࡅࡍ ࡖࡄࡉࡉࡀ ࡖࡄࡆࡀࡕࡉࡍࡊࡅࡍ ࡌࡀࡍࡀ ࡏࡎࡕࡊࡉࡀ ࡄࡆࡉࡍࡊࡅࡍ ࡕࡋࡀࡕࡀ ࡂࡅࡁࡓࡉࡀ ࡀࡁࡀࡄࡀࡕࡀࡍ ࡒࡀࡃࡌࡀࡉࡉࡀ ࡄࡉࡁࡉࡋ ࡅࡔࡉࡕࡉࡋ ࡅࡀࡍࡅࡔ ࡕࡅࡔࡋࡉࡌࡉࡀ ࡎࡃࡉࡓࡉࡀ ࡅࡌ ࡎࡀࡃࡓࡉࡀ ࡏࡅࡕࡓࡉࡀ ࡄࡃࡉࡃࡉࡀ ࡖࡉࡀࡕࡁࡉࡀ ࡋࡎࡌࡀࡋࡀ ࡅࡉࡀࡕࡁࡉࡀ ࡋࡉࡀࡌࡉࡍࡀ ࡖࡁࡍ<ࡉ>ࡀ ࡔࡅࡓࡅࡁࡕࡀ ࡄࡀࡉࡕࡀ ࡏࡓࡕࡀ ࡅࡓࡀࡅࡀࡆࡕࡀ ࡅࡕࡀࡒࡅࡍࡕࡀ ࡂࡅࡁࡓࡉࡀ ࡋࡁࡉࡔࡉࡀ ࡆࡉࡅࡀ ࡅࡍࡄࡅࡓࡀ ࡌࡊࡀࡎࡉࡀ ࡊࡋࡉࡋࡉࡀ ࡖࡆࡀࡊࡀࡅࡀࡕࡀ ࡁࡓࡉࡔࡀࡉࡅࡍ ࡕࡓࡉࡑࡋࡅࡍ ࡅࡍࡄࡉࡕ ࡅࡍࡄࡀࡂࡁࡇ ࡄࡉࡍࡂࡀ ࡁࡕࡉࡁࡉࡋ ࡅࡈࡀࡋࡀࡋࡁࡇ ࡈࡀࡋࡅࡋࡀ ࡁࡀࡋࡌࡀ ࡄࡀࡆࡉࡍ ࡖࡄࡔࡅࡊࡀ ࡅࡎࡋࡉࡒ ࡄࡀࡅࡒࡀ ࡅࡆࡉࡅࡉࡄࡕࡀ ࡅࡊࡎࡉࡍࡅࡍ ࡋࡌࡀࡓࡇ ࡖࡁࡀࡉࡕࡇ ࡁࡀࡁࡀࡉࡕࡀࡉࡅࡍ ࡅࡁࡀࡉࡕࡇ ࡍࡀࡃ ࡄࡉࡊࡋࡀ ࡅࡁࡉࡍࡉࡀࡍࡀ ࡏࡔࡕࡀࡓࡄࡀࡆ ࡅࡉࡀࡌࡉࡍ ࡌࡀࡓࡉࡀ ࡖࡁࡀࡉࡕࡀ ࡏࡃࡉࡋࡌࡀ ࡄࡀࡆࡉࡍ ࡅࡀࡌࡓࡉࡀ ࡄࡉࡓࡁࡀ ࡁࡃࡀࡓࡉࡀ ࡍࡉࡔࡁࡅࡒ ࡅࡈࡅࡐࡀࡍࡉࡀ ࡅࡉࡀࡒࡃࡀࡍࡉࡀ ࡖࡍࡅࡓࡀ ࡁࡃࡀࡓࡉࡀ ࡍࡉࡔࡁࡅࡒ ࡅࡌࡉࡀ ࡁࡃࡀࡓࡉࡀ ࡍࡉࡔࡁࡅࡒ ࡋࡄࡀࡌࡁࡅࡋࡉࡀ ࡐࡀࡂࡓࡉࡀ ࡖࡂࡁࡉࡋࡉࡀ ࡁࡉࡎࡓࡀ ࡅࡆࡌࡀ ࡅࡀࡌࡓࡉࡀ ࡕࡋࡀࡕࡀ ࡂࡅࡁࡓࡉࡀ ࡀࡁࡀࡄࡀࡕࡀࡍ ࡒࡀࡃࡌࡀࡉࡉࡀ ࡀࡍࡏࡍ ࡁࡄࡉࡓࡁࡀ ࡋࡀࡏࡕࡉࡍࡎࡉࡁࡍࡉࡍ ࡅࡁࡉࡀࡒࡃࡀࡍࡉࡀ ࡖࡍࡅࡓࡀ ࡋࡀࡏࡒࡉࡃࡍࡉࡍ ࡅࡁࡈࡅࡐࡀࡍࡉࡀ ࡌࡉࡀ ࡋࡀࡈࡀࡐࡍࡉࡍ ࡀࡓࡒࡀ ࡌࡎࡀࡍࡅࡍ ࡌࡉࡀ ࡋࡀࡏࡑࡈࡁࡀ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡁࡉࡕࡋࡀࡕࡀ ࡂࡅࡁࡓࡉࡀ ࡀࡁࡀࡄࡀࡕࡀࡍ ࡒࡀࡃࡌࡀࡉࡉࡀ ࡕࡅࡔࡋࡉࡌࡉࡀ ࡒࡓࡉࡀ ࡄࡃࡀ ࡒࡀࡉࡉࡌ ࡁࡓࡉࡔࡀ ࡖࡃࡀࡓࡀ ࡄࡃࡀ ࡒࡀࡉࡉࡌ ࡁࡔࡉࡄࡋࡀ ࡖࡃࡀࡓࡀ ࡅࡕࡉࡕࡀࡉࡀ ࡍࡀࡎࡉࡁ ࡅࡉࡀࡄࡉࡁ ࡋࡌࡉࡑࡀࡉࡀ ࡅࡌࡉࡑࡀࡉࡀ ࡉࡀࡄࡉࡁ ࡋࡓࡉࡔࡀࡉࡀ ࡅࡓࡉࡔࡀࡉࡀ ࡅࡌ{ࡉ}<ࡀ>ࡔࡓࡉࡀ ࡒࡀࡋࡀ ࡅࡌࡒࡀࡓࡉࡋࡇ ࡅࡌࡀࡎࡉࡒࡋࡇ ࡋࡄࡀࡆࡀ ࡍࡉࡔࡉࡌࡕࡀࡉ ࡃࡉࡋࡉࡀ ࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡌࡍ ࡀࡒࡀ ࡋࡓࡅࡀࡄࡀ ࡅࡌࡍ ࡔࡀࡐࡋࡅࡕࡀ ࡋࡌࡀ ࡋࡉࡅࡕࡀ ࡅࡌࡍ ࡈࡏࡉࡀ ࡋࡔࡓࡀࡓࡀ ࡅࡌࡍ ࡓࡅࡄ ࡈࡏࡉࡀ ࡄࡀࡌࡁࡀࡋࡕࡀ ࡌࡍ ࡄࡀࡓࡔࡉࡀ ࡁࡉࡔࡉࡀ ࡅࡌࡍ ࡎࡀࡃࡀࡍࡉࡀ ࡏࡐࡉࡊࡉࡀ ࡅࡌࡍ ࡊࡉࡁࡉࡀ ࡅࡌࡀࡎࡀࡎࡉࡀ ࡅࡌࡍ ࡌࡀࡄࡓࡀ ࡁࡉࡔࡀ ࡅࡌࡍ ࡏࡅࡁࡀࡃࡉࡀ ࡎࡀࡉࡍࡉࡀ ࡖࡄࡔࡅࡊࡀ ࡅࡌࡍ ࡊࡅࡋࡄࡅࡍ ࡂࡉࡍࡉࡀࡍࡉࡀ ࡖࡏࡕࡉࡂࡍࡀࡁࡅࡍ ࡅࡏࡕࡂࡀࡉࡀࡓࡁࡅࡍ ࡁࡐࡀࡂࡓࡀࡉ ࡃࡉࡋࡉࡀ ࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡅࡍࡉࡐࡉࡓࡔࡅࡍ ࡅࡍࡉࡐࡒࡅࡍ ࡅࡍࡉࡎࡒࡅࡍ ࡋࡕࡀࡎࡍࡉࡒࡉࡀ ࡖࡀࡓࡒࡀ ࡕࡉࡕࡀࡉࡕࡀ ࡖࡄࡔࡅࡊࡀ ࡃࡅࡊࡕࡀ ࡖࡔࡀࡌࡉࡔ ࡋࡀࡃࡀࡄࡍࡀ ࡅࡎࡉࡓࡀ ࡀࡍࡐࡇ ࡋࡀࡌࡄࡀࡅࡉࡀ ࡅࡊࡅࡊࡁࡉࡀ ࡅࡆࡉࡒࡐࡉࡀ ࡅࡌࡀࡍࡆࡀࡋࡉࡀ ࡖࡔࡅࡌࡉࡀ ࡄࡀࡕࡀࡌ ࡄࡀࡔࡅࡊ ࡍࡄࡅࡓࡀࡉࡄࡅࡍ ࡅࡋࡀࡍࡀࡄࡓࡉࡀ ࡕࡅࡌ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡌࡉࡀ ࡅࡌࡀ ࡅࡌࡉࡍࡀࡋࡊࡅࡍ ࡁࡏࡅࡕࡓࡉࡀ ࡕࡋࡀࡕࡀ ࡒࡀࡃࡌࡀࡉࡉࡀ ࡖࡆࡉࡅࡀ ࡋࡁࡉࡔࡉࡀ ࡅࡍࡄࡅࡓࡀ ࡌࡊࡀࡎࡉࡀ ࡅࡊࡋࡉࡋࡀ ࡊࡋࡉࡋ ࡆࡀࡊࡅࡀࡕࡀ ࡕࡓࡉࡑࡋࡅࡍ ࡁࡓࡉ ࡔࡀࡉࡄࡅࡍ ࡃࡀࡅࡋࡀ ࡄࡉࡅࡀࡓࡀ ࡋࡂࡉࡈࡉࡀ ࡁࡏࡃࡀࡉࡄࡅࡍ ࡅࡎࡀࡋࡒࡉࡀ ࡋࡊࡉࡐࡇ ࡖࡐࡓࡀࡕ ࡉࡀࡓࡃࡍࡀ ࡓࡁࡀ ࡖࡄࡉࡉࡀ ࡄࡀࡆࡉࡍ ࡉࡀࡓࡃࡍࡀ ࡌࡉࡕࡊࡓࡀࡊ ࡉࡀࡓࡃࡍࡀ ࡅࡏࡒࡀࡓ ࡄࡀࡓࡔࡉࡀ ࡁࡉࡀࡓࡃࡍࡀ ࡅࡒࡀࡓࡉࡋࡅࡍ ࡋࡐࡀࡔࡅࡓࡉࡀ ࡅࡀࡌࡀࡓࡋࡅࡍ ࡐࡔࡀࡓ ࡋࡀࡎࡀࡅࡀࡕࡀ ࡀࡌࡀࡓࡋࡅࡍ ࡀࡎࡅࡍ ࡋࡌࡀࡍࡅࡉࡉࡀ ࡀࡌࡀࡓࡋࡅࡍ ࡌࡍࡅࡍ ࡅࡋࡌࡀ ࡅࡋࡌࡃࡀࡋࡀࡅࡀࡕࡀ ࡀࡌࡀࡓࡋࡅࡍ ࡃࡀࡋࡅࡍ ࡍࡉࡕࡅࡍ ࡐࡀࡔࡅࡓࡉࡀ ࡍࡉࡐࡔࡉࡓࡅࡋࡇ ࡋࡄࡀࡆࡉࡍ ࡍࡉࡔࡉࡌࡕࡇ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡅࡌࡀࡍࡅࡉࡉࡀ ࡌࡍࡅࡋࡇ ࡅࡃࡀࡋࡅࡉࡉࡀ ࡃࡀࡋࡉࡅ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡁࡀࡕࡓࡀ ࡖࡌࡉࡍࡇ ࡀࡕࡀࡉࡕࡅࡍ ࡅࡁࡃࡀࡅࡓࡀ ࡄࡉࡊࡋࡀ ࡖࡌࡉࡍࡇ ࡏࡔࡕࡀࡐࡀࡉࡕࡅࡍ ࡕࡅࡌ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡁࡀࡉࡀࡓ ࡌࡉࡀ ࡖࡌࡉࡍࡇ ࡀࡕࡀࡉࡕࡅࡍ ࡅࡁࡃࡀࡅࡓࡀ ࡄࡉࡊࡋࡀ ࡖࡌࡉࡍࡇ ࡔࡕࡀࡐࡀࡉࡕࡅࡍ ࡕࡅࡌ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡁࡀࡉࡀࡓ ࡂࡅࡐࡍࡀ ࡓࡁࡀ ࡖࡎࡉࡍࡃࡉࡓࡊࡀ ࡖࡌࡉࡍࡇ ࡀࡎࡂࡀࡉࡕࡅࡍ ࡌࡉࡃࡊࡀࡓ ࡃࡊࡉࡓࡉࡕࡅࡍ ࡌࡉࡀ ࡏࡅ ࡏࡉࡀࡃࡊࡅࡓࡉࡀ ࡅࡉࡀࡃࡊࡉࡓࡉࡍࡊࡅࡍ ࡌࡉࡀ ࡗ ࡀࡕࡀࡉࡕࡅࡍ ࡌࡍ ࡂࡉࡍࡆࡀࡉ ࡊࡅࡍ ࡅࡌࡍ ࡐࡀࡓࡅࡀࡍ ^ࡍࡄࡅࡓࡀ^ ࡐࡓࡀࡔࡉࡍࡊࡅࡍ ࡅࡊࡁࡀࡔࡕࡅࡍ ࡄࡔࡅࡊࡀ ࡌࡍ ࡒࡅࡃࡀࡌ ࡍࡄࡅࡓࡀ ࡅࡊࡁࡀࡔࡕࡅࡍ ࡄࡁࡉࡋࡀ ࡌࡍ ࡒࡅࡃࡀࡌ ࡁࡉࡍࡉࡀࡍࡀ ࡅࡊࡁࡀࡔࡕࡅࡍ ࡈࡏࡉࡀ ࡌࡍ ࡒࡅࡃࡀࡌ ࡔࡓࡀࡓࡀ ࡅࡊࡁࡀࡔࡕࡅࡍ ࡌࡄࡉࡕࡀ ࡌࡍ ࡒࡅࡃࡀࡌ ࡀࡎࡅࡕࡀ ࡅࡊࡁࡀࡔࡕࡅࡍ ࡔࡅࡁࡀ ࡓࡉࡔࡀࡅࡀࡕࡀ ࡖࡄࡔࡅࡊࡀ ࡌࡍ ࡒࡅࡃࡀࡌ ࡔࡅࡁࡀ ࡓࡉࡔࡀࡅࡀࡕࡀ ࡖࡍࡄࡅࡓࡀ ࡅࡊࡁࡀࡔࡕࡅࡍ ࡋࡄࡀࡓࡔࡉࡀ ࡁࡉࡔࡉࡀ ࡅࡎࡀࡃࡀࡍࡉࡀ ࡏࡐࡉࡊࡉࡀ ࡅࡏࡅࡁࡀࡃࡉࡀ ࡖࡄࡔࡅࡊࡀ ࡅࡋࡊࡉࡁࡉࡀ ࡅࡋ ࡌࡀࡎࡀࡎࡉࡀ ࡅࡋࡌࡀࡄࡓࡉࡀ ࡁࡉࡔࡉࡀ ࡖࡀࡁࡃࡉࡋࡇ ࡏࡋ ࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡅࡋࡊࡅࡋࡄࡅࡍ ࡂࡅࡐࡍࡉࡀ ࡅࡂࡉࡍࡀࡍࡉࡀ ࡖࡏࡕࡉࡂࡍࡀࡁࡅࡍ ࡅࡏࡕࡂࡀࡉࡀࡓࡁࡅࡍ ࡁࡐࡀࡂࡓࡀ ࡖࡓࡀࡌࡆࡉࡄࡓࡅࡍ ࡁࡓࡌࡀࡋࡉࡄࡀ ࡍࡉࡐࡉࡓࡔࡅࡍ ࡅࡍࡉࡐࡒࡅࡍ ࡌࡉࡍࡇ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡅࡍࡉࡐࡋࡅࡍ ࡋࡕࡀࡎࡍࡉࡒࡉࡀ ࡖࡀࡓࡒࡀ ࡓࡀࡁࡕࡉࡀ ࡖࡄࡔࡅࡊࡀ ࡃࡅࡊࡕࡀ ࡖࡔࡀࡌࡉࡔ ࡋࡀࡃࡀࡄࡍࡀ ࡅࡎࡉࡓࡀ ࡀࡍࡐࡇ ࡋࡀࡌࡄࡀࡅࡉࡀ ࡅࡊࡅࡊࡁࡉࡀ ࡆࡉࡒࡐࡉࡀ ࡅࡌࡀࡍࡆࡀࡋࡉࡀ ࡖࡔࡅࡌࡉࡀ ࡄࡀࡕࡀࡌ ࡄࡀࡔࡊࡉࡀ ࡆࡉࡅࡀࡉࡄࡅࡍ ࡅࡋࡀࡍࡀࡄࡓࡉࡀ ࡕࡅࡌ ࡌࡀࡃࡊࡉࡓࡍࡀࡋࡊࡅࡍ ࡌࡉࡀ ࡏࡅ ࡏࡃࡊࡅࡓࡉࡀ ࡏࡃࡊࡉࡓ^ࡉ^ࡕࡅࡍ ࡗ ࡀࡕࡀࡉࡕࡅࡍ ࡌࡍ ࡄࡀࡈࡀࡉ ࡄࡈࡉࡕࡀ ࡅࡌࡍ ࡎࡉࡐࡀࡍ ࡎࡀࡐࡀࡐࡀࡍ ࡄࡀࡉࡀࡋ ࡄࡀࡉࡋࡇ ࡖࡄࡀࡉࡋࡀ ࡅࡒࡓࡀࡁࡀ ࡁࡀࡋࡌࡀ ࡖࡄࡔࡅࡊࡀ ࡔࡀࡁࡅࡉࡉࡀ ࡔࡀࡁࡉࡕࡉࡍࡊࡅࡍ ࡌࡉࡀ ࡏࡉࡀࡅࡒࡅࡓࡉࡀ ࡏࡉࡀࡅࡒࡉࡓࡉࡍࡊࡅࡍ ࡌࡉࡀ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡁࡂࡀࡁࡓࡀ ࡖࡒࡀࡉࡉࡌ ࡋࡐࡅࡌࡇ ࡖࡐࡓࡀࡕ ࡖࡌࡍ ࡐࡓࡀࡕ ࡖࡌࡍ ࡍࡀࡐࡔࡉࡇ ࡐࡓࡀ ࡄࡀࡆࡉࡍ ࡖࡄࡔࡅࡊࡀ ࡕࡅࡌ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡁࡉࡐࡕࡀ ࡀࡋࡀࡄࡀ ࡓࡁࡀ ࡒࡀࡃࡌࡀࡉࡀ ࡖࡄࡉࡐࡉࡀ ࡖࡌࡉࡀ ࡋࡁࡉࡔ ࡄࡉࡐࡉࡀ ࡖࡌࡉࡀ ࡌࡊࡀࡎࡀࡉ ࡅࡃࡓࡉࡀ ࡖࡌࡉࡀ ࡁࡓࡉࡔࡉࡇ ࡕࡓࡉࡑࡋࡇ ࡄࡀࡆࡉࡍ ࡖࡒࡀࡓࡉࡀ ࡅࡀࡌࡀࡓ ࡀࡍࡀ ࡁࡄࡀࡉࡋࡀࡉ ࡁࡍࡀࡉࡕࡇ ࡋࡁࡀࡉࡕࡀ ࡅࡁࡂࡀࡌࡁࡀࡓࡅࡀࡕࡀ ࡕࡀࡒࡉࡍࡕࡇ ࡋࡕࡉࡁࡉࡋ ࡄࡀࡆࡉࡍ ࡖࡌࡎࡀ ࡀࡓࡒࡀ ࡖࡋࡀࡌࡎࡅࡕࡀ ࡕࡅࡌ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡁࡂࡀࡁࡓࡀ ࡖࡀࡐࡓࡉࡔࡉࡍࡊࡅࡍ ࡌࡍ ࡊࡀࡍࡀࡉࡊࡅࡍ ࡒࡓࡉࡕࡉࡍࡊࡅࡍ ࡋࡀࡎࡀࡅࡀࡕࡀ ࡖࡏࡄࡀࡁࡉࡍࡊࡅࡍ ࡋࡁࡄࡉࡓࡉࡀ ࡆࡉࡃࡒࡀ ࡕࡅࡌ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡃࡅࡊࡕࡀ ࡖࡀࡍࡀࡕࡅࡍ ࡌࡉࡀ ࡕࡉࡆࡋࡅࡍ ࡅࡕࡉࡐࡋࡅࡍ ࡋࡐࡀࡂࡓࡇ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡀࡍࡀࡔࡀ ࡕࡉࡐࡉࡔࡓࡅࡍ ࡅࡕࡉࡐࡒࡅࡍ ࡌࡉࡍࡇ ࡄࡀࡓࡔࡉࡀ ࡅࡀࡓࡑࡉࡀ ࡅࡊࡉࡁࡉࡀ ࡅࡔࡉࡁࡈࡉࡀ ࡅࡓࡉࡃࡉࡀ ࡅࡓࡅࡌࡀࡉࡉࡀ ࡅࡌࡀࡋࡅࡀࡈࡉࡀ ࡖࡔࡓࡅࡍ ࡁࡐࡀࡂࡓࡀ ࡖࡓࡀࡌ ࡆࡉࡄࡓࡅࡍ ࡁࡓࡌࡀࡋࡉࡄࡀ ࡅࡍࡉࡎࡉࡌࡒࡅࡍ ࡀࡍࡐࡇ ࡖࡓࡀࡌ ࡆࡉࡄࡓࡅࡍ ࡁࡓ ࡌࡀࡋࡉࡄࡀ ࡖࡉࡅࡓࡀࡒࡉࡀ ࡅࡕࡉࡌࡕࡅࡋࡇ ࡒࡅࡌࡕࡇ ࡁࡀࡋࡁࡅࡔࡉࡀ ࡕࡀࡕࡍࡅࡋࡇ ࡄࡆࡉࡕࡇ ࡋࡀࡉࡍࡇ ࡅࡃࡓࡀࡊࡕࡇ ࡏࡋ ࡋࡉࡂࡓࡇ ࡅࡏࡅࡁࡀࡃࡉࡀ ࡏࡋ ࡏࡃࡇ ࡅࡌࡉࡌࡀࡓ ࡅࡌࡉࡔࡕࡌࡀ ࡋࡐࡅࡌࡇ ࡅࡕࡀࡒࡌࡇ ࡋࡊࡅࡋࡇ ࡏࡅࡑࡈࡅࡍࡇ ࡁࡉࡔࡓࡀࡓࡀ ࡕࡅࡌ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡌࡉࡀ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡃࡅࡊࡕࡀ ࡖࡀࡍࡀࡕࡅࡍ ࡌࡉࡀ ࡕࡉࡆࡋࡅࡍ ࡕࡉࡕࡅࡍ ࡕࡉࡄࡅࡍ ࡄࡉࡓࡁࡉࡀ ࡎࡉࡐࡉࡀ ࡕࡉࡕࡉࡒࡓࡅࡍ ࡋࡎࡀࡄࡓࡉࡀ ࡅࡃࡀࡉࡅࡉࡀ ࡅࡋࡐࡉࡂࡉࡀ ࡅࡋࡐࡀࡋࡂࡉࡀ ࡅࡋࡍࡀࡋࡉࡀ ࡅࡋࡍࡉࡅࡋࡉࡀ ࡅࡋࡄࡀࡓࡔࡉࡀ ࡁࡉࡔࡉࡀ ࡅࡋࡎࡀࡃࡀࡍࡉࡀ ࡏࡐࡉࡊࡉࡀ ࡅࡋࡓࡅࡄࡉࡀ ࡁࡉࡔࡀࡕࡀ ࡆࡀࡃࡀࡍࡉࡀࡕࡀ ࡅࡌࡀࡓࡂࡆࡀ ࡅࡏࡋ ࡋࡉࡋࡉࡀࡕࡀ ࡆࡉࡊࡓࡉࡀ ࡅࡍࡅࡒࡁࡀࡕࡀ ࡅࡋࡓࡅࡄࡉࡀ ࡆࡉࡊࡓࡉࡀ ࡅࡁࡉࡓࡅࡒࡕࡀ ࡍࡅࡒࡁࡀࡕࡀ ࡅࡏࡋ ࡏࡔࡀࡕࡀ ࡖࡄࡀࡈࡉࡀࡁࡇ ࡋࡐࡀࡂࡓࡇ ࡖࡓࡀࡌ ࡆࡉࡄࡓࡅࡍ ࡁࡓࡌࡀࡋࡉࡄࡀ ࡎࡀ
ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡍࡅࡊࡓࡀࡉࡉࡀ ࡅࡁࡔࡅࡌࡀ ࡖࡌࡀࡍࡃࡀ ࡖࡄࡉࡉࡀ ࡉࡀࡕࡉࡁ ࡀࡋࡌࡉࡀ ࡌࡉࡀ ࡀࡍࡀࡕࡅࡍ ࡄࡉࡉࡀ ࡌࡉࡀ ࡀࡍࡀࡕࡅࡍ ࡏࡓࡉࡉࡀ ࡅࡓࡀࡅࡆࡉࡀ ࡀࡍࡀࡕࡅࡍ ࡏࡔࡕࡉࡀ ࡌࡉࡀ ࡖࡂࡀࡍࡆࡉࡁࡓࡉࡀ ࡀࡍࡀࡕࡅࡍ ࡌࡍ ࡊࡅࡋ ࡖࡄࡅࡀࡉࡕࡅࡍ ࡌࡉࡍࡀࡉࡊࡅࡍ ࡄࡅࡀ ࡊࡅࡋ ࡆࡀࡊࡀࡅࡀࡕࡀ ࡊࡁࡀࡔࡕࡅࡍ ࡌࡍ ࡁࡉࡕ ࡄࡉࡉࡀ ࡀࡕࡀࡉࡕࡅࡍ ࡌࡍ ࡏࡋࡀࡅࡉࡀ ࡃࡉࡍࡀ ࡅࡍࡉࡎࡊࡀ ࡖࡀࡋࡌࡀ ࡅࡌࡍ ࡏࡋࡀࡅࡉࡀ ࡃࡉࡍࡀ ࡅࡃࡀࡅࡓࡀ ࡄࡉࡊࡋࡀ ࡅࡌࡍ ࡁࡀࡉࡕࡀ ࡅࡁࡉࡍࡉࡀࡍࡀ ࡅࡌࡍ ࡏࡋࡀࡅࡉࡀ ࡎࡀࡃࡀࡍࡀ ࡅࡌࡍ ࡏࡋࡀࡅࡉࡀ ࡃࡀࡅࡓࡀ ࡖࡀࡋࡌࡀ ࡅࡌࡍ ࡏࡋࡀࡅࡉࡀ ࡔࡉࡁࡉࡀࡄࡉࡀ ࡄࡉࡊࡋࡀ ࡅࡌࡍ ࡁࡀࡉࡕࡀ ࡖࡔࡅࡁࡀ ࡃࡌࡅ ࡖࡄࡅ ࡃࡀࡅࡓࡀ ࡖࡔࡉࡁࡉࡀ ࡄࡉࡀ ࡅࡔࡉࡓࡉࡀࡕࡀ ࡅࡌࡍ ࡐࡀࡒࡀࡃࡕࡀ ࡓࡀࡁࡕࡉࡀ ࡒࡀࡃࡌࡀࡉࡕࡀ ࡖࡊࡅࡋࡄࡅࡍ ࡐࡀࡒࡀࡃࡀࡕࡀ ࡖࡌࡉࡍࡀ ࡄࡅࡀ ࡏࡕࡐࡀࡒࡀࡃ ࡅࡁࡊࡅࡋࡄࡅࡍ ࡀࡌࡀࡌࡉࡀ ࡔࡐࡉࡋࡕࡅࡍ ࡁࡊࡅࡋࡄࡅࡍ ࡆࡀࡁࡉࡀ ࡖࡏࡓࡉࡋࡕࡅࡍ ࡅࡁࡊࡅࡋࡄࡅࡍ ࡍࡀࡄࡋࡉࡀ ࡅࡌࡎࡀࡉࡕࡅࡍ ࡅࡁࡊࡅࡋࡄࡅࡍ ࡄࡀࡍࡃࡀࡌࡉࡀ ࡏࡎࡉࡓࡉࡕࡅࡍ ࡏࡔࡐࡉࡋࡁࡊࡅࡍ ࡔࡀࡐࡀࡋࡀ ࡅࡌࡃࡀࡋࡉࡁࡊࡅࡍ ࡂࡅࡁࡓࡉࡀ ࡕࡀࡍࡂࡀࡓࡉࡀ ࡁࡑࡉࡑࡉࡀ ࡅࡌࡀࡋࡀࡄࡉࡀ ࡁࡋࡉࡒࡉࡀ ࡑࡀࡉࡃࡀ ࡁࡂࡀࡃࡅࡐࡀ ࡅࡀࡕࡅࡀࡕ ࡄࡀࡓࡀࡔࡕࡉࡀ ࡁࡈࡅࡐࡔࡀ ࡖࡏࡅࡃࡍࡀ {ࡖ}<ࡅ>ࡂࡀࡁࡓࡀ ࡐࡀࡔࡅࡓࡀ ࡁࡓࡅࡒࡀ ࡖࡐࡅࡌࡇ ࡋࡀࡏࡈࡀࡍࡀࡐࡕࡅࡍ ࡍࡀࡐࡋࡉࡕࡅࡍ ࡌࡉࡀ ࡄࡉࡉࡀ ࡏࡋ ࡊࡑࡉࡓࡀ ࡅࡍࡉࡕࡀࡐࡀ ࡅࡏࡋ ࡈࡓࡅࡔࡀ ࡅࡔࡅࡌࡀ ࡅࡏࡋ ࡏࡅࡉࡓࡀ ࡍࡉࡕࡐࡀࡕࡀ ࡀࡔࡊࡀࡕࡅࡍ ࡃࡀࡉࡅࡉࡀ ࡎࡃࡉࡌࡉࡕࡅࡍ ࡅࡋࡉࡋࡉࡀࡕࡀ ࡐࡀࡒࡉࡃࡕࡅࡍ ࡄࡅࡌࡓࡉࡀ ࡅࡌࡈࡀࡎࡉࡎࡉࡕࡅࡍ ࡋࡀࡈࡀࡁࡉࡀ ࡅࡌࡍࡀࡍࡂࡉࡓࡉࡕࡅࡍ ࡊࡉࡁࡉࡀ ࡅࡒࡉࡓࡎࡉࡀ ࡅࡊࡅࡄࡓࡀࡍࡉࡀ ࡖࡐࡀࡂࡓࡉࡀ ࡕࡀࡁࡓࡉࡕࡅࡍ ࡏࡔࡀࡕࡀ ࡌࡍࡀࡍࡂࡉࡓࡉࡕࡅࡍ ࡀࡓࡅࡉࡕࡀ ࡌࡃࡀࡄࡊࡉ ࡕࡅࡍ ࡍࡅࡓࡀ ࡌࡍ ࡂࡉࡓࡌࡀࡉࡄࡅࡍ ࡖࡁࡍࡉࡀ ࡀࡍࡀࡔࡀ ࡀࡍࡀࡕࡅࡍ ࡄࡆࡉࡍࡊࡅࡍ ࡁࡉࡔࡀ ࡁࡓ ࡁࡉࡔࡀ ࡏࡎࡉࡓ ࡐࡅࡌࡇ ࡅࡔࡀࡃࡉࡅࡉࡀ ࡐࡀࡉࡉࡔ ࡊࡀࡁࡃࡇ ࡁࡌࡓࡉࡓࡕࡇ ࡓࡀࡒ ࡔࡃࡉࡁࡊࡅࡍ ࡌࡓࡉࡓࡕࡇ ࡖࡌࡀࡓࡉࡓࡀ ࡖࡌࡀࡓࡉࡓ ࡍࡄࡅࡓࡀ ࡄࡅࡀ ࡏࡋࡀࡅࡀࡉࡊࡅࡍ ࡒࡀࡓࡉࡀ ࡕࡓࡉࡍ ࡃࡀࡅࡋࡉࡀ ࡄࡀࡃࡕࡉࡀ ࡏࡋࡀࡅࡀࡉࡊࡅࡍ ࡌࡀࡋࡀࡋࡉࡀ ࡊࡀࡎࡉࡉࡀ ࡅࡍࡈࡉࡓࡉࡀ ࡅࡌࡍ ࡏࡅࡑࡓࡉࡀ ࡖࡆࡉࡅࡀ ࡍࡉࡄࡉࡀ ࡅࡔࡃࡉࡊࡉࡀ ࡅࡊࡔࡉࡓࡉࡀ ࡅࡁࡀࡎࡉࡌࡉࡀ ࡖࡏࡔࡕࡀࡃࡀࡓ ࡏࡋࡀࡅࡀࡉࡊࡅࡍ ࡌࡍ ࡁࡉࡕࡄࡉࡉࡀ ࡏࡋࡀࡅࡀࡉࡊࡅࡍ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡁࡉࡐࡓࡀࡕ ࡐࡓࡀࡄࡀ ࡅࡐࡓࡉࡄࡀ ࡓࡁࡀ ࡖࡄࡉࡉࡀ ࡒࡀࡃࡌࡀࡉࡉࡀ ࡂࡅࡐࡍࡀ ࡖࡌࡉࡍࡇ ࡄࡅࡀࡉࡕࡅࡍ ࡁࡏࡋࡀࡍࡀ ࡖࡌࡉࡍࡇ ࡏࡕࡉࡍࡑࡉࡁࡕࡅࡍ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡁࡏࡅࡋࡀࡉ ࡅࡐࡓࡀࡕ ࡅࡃࡉࡂࡋࡀࡕ ࡀࡉࡍࡀࡍࡉࡀࡕࡀ ࡓࡅࡓࡁࡀࡕࡀ ࡍࡉࡁࡀ ࡅࡍࡅࡁࡀ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡁࡄࡉࡁࡉࡋ ࡅࡔࡉࡕࡉࡋ ࡅࡀࡍࡅࡔ ࡁࡄࡀࡉࡋࡀࡉࡄࡅࡍ ࡃࡉࡋࡄࡅࡍ ࡒࡀࡉࡉࡌ ࡀࡋࡌࡀ ࡕࡅࡌ ࡀࡔࡁࡉࡕ ࡏࡋࡀࡅࡀࡉࡊࡅࡍ ^ࡅࡌࡀࡅࡌࡉࡍࡀࡋࡊࡅࡍ ࡌࡉࡀ^ ࡁࡔࡀࡌࡉࡔ ࡅࡎࡉࡓࡀ ࡅࡌࡀࡓࡆࡉࡁࡀࡍࡉࡀ ࡅࡐࡀࡄࡓࡀ^ࡄࡓࡀ^ࡍࡉࡀ ࡖࡌࡃࡉࡍࡉࡀࡕࡀ ࡓࡅࡓࡁࡀࡕࡀ ࡖࡁࡄࡀࡉࡋࡀࡉࡄࡅࡍ ࡃࡉࡋࡅࡍ ࡍࡀࡄࡓࡉࡀ ࡊࡅࡋࡄࡅࡍ ࡀࡋࡌࡉࡀ ࡕࡅࡌ ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ࡌࡉࡀ ࡁࡔࡅࡌࡀ ࡖࡆࡄࡉࡓ ࡆࡉࡄࡓࡅࡍ ࡖࡒࡀࡉࡉࡌ ࡋࡎࡌࡀࡋࡀࡉ ࡅࡋࡉࡀ ࡌࡉࡍࡀࡉ ࡖࡁࡀࡁࡉࡀ ࡖࡏࡄࡉࡃࡉࡀ ࡐࡀࡄࡕࡉࡋࡉࡀ ࡅࡌࡔࡀࡅࡉࡋࡉࡀ ࡀࡂࡓࡀ ࡅࡆࡉࡃࡒࡀ ࡉࡀࡄࡁࡉࡋࡉࡀ ࡌࡍ ࡎࡌࡀࡋࡀࡉ ࡋࡉࡀࡌࡉࡍࡀࡉ ࡅࡕࡀࡍࡂࡀࡓࡅࡕࡀ ࡌࡍ ࡉࡀࡌࡉࡍࡀࡉ ࡆࡀࡁࡃࡉࡀ ࡕࡓࡉࡑ ࡁࡓ ,ࡌࡉࡀ ,ࡅࡌࡍ ,ࡌࡍ ,ࡄࡉࡉࡀ ,ࡆࡉࡄࡓࡅࡍ ,ࡆࡉࡄࡓࡅࡍ ࡁࡓ ,ࡁࡓ ࡌࡀࡋࡉࡄࡀ ,ࡀࡔࡁࡉࡕ ࡏࡋࡀࡅࡀࡉࡊࡅࡍ ,ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ,ࡖࡓࡀࡌ ࡆࡉࡄࡓࡅࡍ ,ࡀࡔࡁࡉࡕ ࡏࡋࡀࡅࡀࡉࡊࡅࡍ ࡅࡌࡀࡅࡌࡉࡍࡀࡋࡊࡅࡍ ,ࡆࡀࡊࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ ,ࡄࡉࡉࡀ ࡆࡀࡊࡉࡍ ࡋࡊࡅࡋࡄࡅࡍ ,ࡀࡍࡀࡕࡅࡍ ࡀࡔࡁࡉࡕ ࡏࡋࡀࡅࡀࡉࡊࡅࡍ
درباره این سایت